Автор на трудот е: Љупчо pbanksвски, авторска шифра "wave 8".

Роза Петкова

Наместо годинава, како што беше првично најавено, плоштадот во населбата Влае 2 ќе се гради дури во 2012 година. Тој требаше да се направи во зелениот простор на почетокот од комплексот „Порта Влае“, а Општина Карпош лани избираше и идејно решение за неговиот изглед. Тогаш општинарите најавија дека плоштадот е влезен во програмата за работа за оваа година, но сега велат дека немаат предвидено пари за негова изградба. - Плоштадот во населбата Влае 2 ќе се прави, но во 2012 година. Се уште немаме конечен изглед за него бидејќи на конкурсот не се додели првата награда, туку две втори, што значи дека ќе се прави компилација од двете. Со оглед на тоа што годинава проектот нема да се реализира, пари за таа намена во годинешниот буџет не се предвидени - велат одговорните од Општината. Во Карпош се категорични дека на новиот плоштад нема да има споменици иако самите лани најавија дека ќе се определи место и за такво обележје. Што ги премислило, општинарите не кажаа. - На плоштадот во Влае нема да има ниту скулптури ниту споменици - велат од Одделението за односи со јавност на Карпош. За новата содржина во оваа населба голем интерес покажаа и архитектите, кои се пријавија со 20 труда. На двете избрани втори награди, едната на авторот Љупчо pbanksвски, а другата на Ана Митрушевска, Бојан Петровски, Владимир Деловски и на Дамјан Христовски, Општината им додели по 180.000 денари, а беа откупени и пет идејни решенија со по 30.000 денари. Според замислата на градоначалникот Стевчо Јакимовски, плоштадот треба да има поплочен простор на кој ќе може да се одвиваат различни настани, собири, концерти, претстави, изложби на отворено и да содржи бина и монтажни трибини. На локацијата ќе има и зелена површина, хортикултурно уредена со определен вид растенија, простор за седење, клупи, фонтана и детско катче. Целиот простор ќе се осветли соодветно. Намерата на Општината за оваа населба била да го заживее празниот простор, кој е запуштен и го посетуваат само кучиња-скитници, и од него да направат убав, урбан плоштад каде што граѓаните ќе може да се одморат и релаксираат. Освен во Влае 2, градоначалникот Јакимовски за годинава најави и уредување мини-плоштади на кејот, во близина на ТЦ „Лептокарија“, потоа на кај Млечен ресторан и кај Педагошки факултет, но досега се уште не се распишани конкурси за наведените локации.

На христијанскиот празник Голема Богородица, следниот четврток и официјално ќе биде пуштен во употреба плоштадот во населбата Влае, лоциран до станбениот комплекс „Порта Влае“, информираат од Општина Kарпош. Плоштадот ќе го отвори градоначалникот Стевчо Јакимовски , а потоа во 21 часот концерт ќе одржи Влатко Лозановски, во рамките на културното лето „Kарпош 2014“. Шеталиштето зафаќа површина од 6.500 квадратни метри, а од Општината информираат дека неговото име ќе биде плоштад Влае, по населбата во која се наоѓа.

Работите на терен веќе привршуваат. Kако што објаснија вработените од фирмата „Адмирал“,

која работи на изработка на фонтаната, 90 отсто од нивните обврски се завршени.

- Останува само уште машинскиот дел, поврзување на пумпите и осветлението, а потоа и пробното пуштање во работа на фонтаната - информираат од фирмата „Адмирал“, кои се подизведувачи на „Сандра инжинеринг“.

Работниците велат дека останува да се доправи и малото детско игралиште, кое е во рамките на плоштадот, односно да се постават реквизитите. Изработени се две партерни кружни патеки, сплотени една во друга. Од Општина Kарпош информираат дека фонтаната е изградена од мермер и гранит.

- Kористени се павер-елементи со завршна горна обработка од вулкански камен. Поставена е урбана опрема, клупи, канти за отпадоци од тикувано дрво, отпорно на надворешни влијанија - вели Виолета Цветковска, портпарол во Општината Kарпош.

Плоштадот е хортикултурно уреден со зеленило и цвеќиња, односно со 10.000 цветни садници. Поставени се 50 канделабри, 60 клупи за седење, 20 канти за отпадоци и три фонтани за пиење вода. На овој простор, наредната година ќе почне изградба на црква со површина од 130 квадратни метри.

Според општинските власти, целокупниот проект чини околу 30 милиони денари. Изведувач на градежните работи е фирмата „Лутарико“, а изведувач на фонтаната е „Сандра инженеринг“ .

Последната најава беше дека плоштадот ќе биде пуштен во употреба во јуни, но како што објаснија надлежните, работите се одолжија заради непогодните временски услови.

Плоштадот почна да се гради лани на 14 јануари, а требаше да биде готов до март. Но, со месеци на градилиштето немаше никаква активност затоа што, според општинските власти, првично избраната фирма „Сандра инженеринг“ не го почитувала рокот за завршување. Поради тоа лани на 10 септември договорот со оваа фирма беше раскинат, а во јануари годинава беше склучен нов договор со фирмата „Лутарико“, вреден 308.802 евра, од кога повторно почнаа работите. (А.П.)

http://dnevnik.mk/?ItemID=48DB26AE43F0C34886C226755E78CE0C