ПО ИНИЦИЈАТИВАТА НА КОСТОВСКИ, И СОВЕТНИЦИТЕ СО ПРЕДЛОГ ЗА ИСКАЖУВАЊЕ ПОЧИТ КОН САД

Наместо паркот,„Водњанска“да се вика„Џорџ Буш“

Деновиве ќе се знае чија иницијатива ќе биде прифатена, дали таа на градоначалникот за преименување на Градскиот парк или онаа на советниците

Членовите на Советот на Град Скопје ја поддржуваат иницијативата на градоначалникот Трифун Костовски Градскиот парк да го носи името „Џорџ Буш“, но истовремено предлагаат, наместо паркот, улицата Водњанска да се именува според претседателот на САД. Костовски во петокот на советниците им ја испрати својата иницијатива за преименување на паркот во „Џорџ Буш“ како благодарност за поддршката што Македонија ја доби на НАТО-самитот во Букурешт и како израз на искрено пријателство и партнерство меѓу двете држави.Претседателот на Советот на Град Скопје, Ирена Мишева, потенцираше дека уште вчера попладне требало да направат консултација со скопскиот градоначалник за тоа која од иницијативите ќе биде посоодветна. Веројатно до крајот на неделава или на почетокот на наредната ќе одржиме вонредна свечена седница за преименувањето. Мој став е дека господинот Џорџ Буш навистина го заслужува ова. Граѓаните на Скопје треба да му оддадат признание и почит бидејќи се работи за човек што е вистински пријател на Република Македонија - рече Мишева.

БУШ ЗАСЛУЖУВА ПОЧЕСТИ

Независниот советник Тони Ѓуровски вели дека иницијативата на градоначалникот Костовски е за поздравување затоа што Американците на дело покажале дека ја почитуваат Македонија таква каква што е.Треба да се види дали е посоодветно паркот да биде именуван според претседателот Џорџ Буш или некоја од улиците. Ние, советниците, поднесовме иницијатива за преименување на „Водњанска“ - вели Ѓуровски.И Хамид Хајдари од ДПА се согласува дека или Градскиот парк или „Водњанска“ треба да го носат името на американскиот претседател.Буш тоа го заслужува зашто докажа дека ни е голем пријател. Јас лично би му дал предност на предлогот за улицата Водњанска бидејќи таа е пофреквентна - вели Хајдари.Мислењето на своите колеги го дели и советникот Александар Георгиев од ВМРО-НП. Тој смета дека идејата е израз на почит кон големите заложби на Џорџ Буш за поддршка на македонскиот национален и државен интерес и борбата за правичност.Сметам дека со преименување други улици треба да им се оддолжиме и на останатите американски официјални лица од надворешната политика, како Кондолиза Рајс, Даниел Фрид и Викторија Нуланд, како и на премиерот на Словенија, Јанез Јанша и на Турција, Реџеп Таип Ердоган. И останатите политичари, докажани пријатели на Македонија, треба да бидат почестени со тоа што определени мостови, паркови и други инфраструктурни објекти ќе ги носат нивните имиња. Тоа е еден нормален начин на пријателско оддолжување за поддршката што ни ја даваат и ние би требало да почнеме да го применуваме тоа во нашето секојдневно живеење - вели Георгиев.Од друга страна, советничката Софија Куновска од СДСМ смета дека Буш прво треба да го заврши активниот мандат и својата мисија за нашиот прием во НАТО, а потоа треба да му се заблагодариме на промислен начин. Ова е само уште еден доказ за нашиот незрел и импулсивен однос кон сериозни теми - смета Куновска.  

СОВЕТНИЦИТЕ И ГРАДОНАЧАЛНИКОТ КОСТОВСКИ НА РАЗЛИЧНА БРАНОВА ДОЛЖИНА

Тепачка за името на Џорџ Буш

Скопскиот градоначалник Трифун Костовски и градските советници не можат да се договорат како да му изразат почит и признание на американскиот претседател Џорџ Буш за поддршката што му ја дава на Македонија во решавање на спорот со името. Додека Костовски смета дека Градскиот парк треба да го носи неговото име, дел од советниците ќе побараат улицата Водњанска да се преименува по името на американскиот претседател. Советничката група на ВМРО-ДПМНЕ уште пред една година поднесе иницијатива до Советот една од скопските улици да се преименува во Џорџ Буш, како знак на благодарност, бидејќи САД ја признаа Македонија под уставното име.
Градоначалникот Костовски, пак, смета дека неговиот предлог е најсоодветен.

- Ние ќе се сретнеме со претседателот на Советот и ќе разговараме. Не би навлегол во детална анализа дали е подобро парк или е подобро улица да носи име Џорџ Буш, но лично го посочив паркот, бидејќи досега немал име. За мене е неприродно веќе еднаш именувана улица која асоцира на Водно да се менува во име на одредена личност. Сепак, за тоа нека одлучат советниците, изјави вчера Костовски.

ЗА 45 ГОДИНИ ОД СКОПСКИОТ ЗЕМЈОТРЕС

Костовски и Пенов ќе го организираат одбележувањето

Во составот на одборот кој годинава ќе ја организира 45-годишнината од катастрофалниот земјотрес во Скопје, покрај актуелниот градоначалник Трифун Костовски, ќе биде и екс-градоначалникот Ристо Пенов. Одборот е конституиран согласно Одлуката која беше донесена на седница на Советот на Град Скопје и со него ќе претседава Костовски, додека негов заменик е претседател на Советот на Град Скопје, Ирена Мишева. За одбележувањето ќе се погрижат и претседателите на Собранието на Град Скопје, Југослав Тодоровски и Јове Кекеновски, како и актуелните советници Коле Манев, Владимир Петрушевски, Иван Катарџиев, Жарко Јаневски, Раим Лимани, Есма Теодосиевска Реџепова и Мето Јовановски. Од јавните личности, член на одборот е и угледниот публицист Данило Коцевски. Програмата за одбележување на годишнината, ќе се реализира под мотото "Скопје, 45 години град на солидарноста и меѓународното пријателство".

Езерцата во Градски парк порибени со 400 килограми риба

Со пуштање на неколку риби во големото езеро во Градскиот парк, вчера, градоначалникот Трифун Костовски симболично го започна порибувањето на езерскиот систем во паркот. Во езерцата ќе бидат пуштени 400 килограми риба од видот сив тостолобик. Тоа е последна фаза од големата акција за чистење на езерскиот и каналскиот систем во паркот, која започна пред четири месеци. За зачувување на чистата зона за рекреација на граѓаните, градските власти апелираат до граѓаните да не фрлаат отпадоци во зелените површини и во езерцата и да не се оштетува урбаната опрема и едукативните табли поставени во паркот.