Во Маџир Маало секој си гради по свое

Сопствениците на објекти, изморени од ветувањата на безброј градоначалници дека ќе донесат план и со тоа ќе ја осовременат населбата, одамна си градат по свое - некој сопче, гаража, а повеќето кат-два

Во Маџир Маало никој веќе не ја чека Општината Центар да донесе нов урбанистички план. Жителите, изморени од петдецениските ветувања на безброј градоначалници дека населбата ќе излезе од 19 век, одамна решија да ја прескокнат бирократијата и сами да ја внесат во 21-от. Поради тоа, долги години и без план си градат и доградуваат по свое.

Постојната регулатива не дозволува повеќе од приземје плус кат. Но, и покрај тоа, некој проширил за сопче, гаража, а повеќето доградиле кат-два или повеќе. Градежните активности, изминативе години, жителите ги изведуваа со дозвола за санација затоа што законски не им следува градежна дозвола. Во времето на градоначалничката Виолета Аларова во два наврата имаше обиди за усвојување на план за Маџир Маало, со визии за високи згради на местото на старите куќи, но без успех.

- Без план, рацете со децении ни се врзани. Семејствата се проширија, а услови за живот и понатаму немаме. Луѓето не можат да чекаат општината да се смилува, затоа и самите ги зедоа нештата во свои раце. Сами да си обезбедат пристоен живот - вели Томче Христовски, жител на оваа маало.

Тесни сокаци, влага и полски вециња

Проблем за немањето нов современ план за овој реон, како што е познато, е булеварот Крушевска Република, кој треба да поминува покрај Транспортниот центар. Зацртан е во Генералниот план за Скопје (ГУП) уште од 1964 година и предвидува уривање на 20-ина куќи од Маџир Маало. Но оваа експресна сообраќајница никогаш не се изгради, а за сето тоа време маалото не смееше да се развива во друг правец. Затоа и остана заробено во османлиска доба, со тесни нерамни сокаци, калдрма, половично решена мрежа, влага и примитивни услови за живот. Некои жители с` уште имаат полски вециња затоа што канализациската мрежа, како што рекоа од урбаната заедница „Раде Јовчевски-Корчагин“, е изградена само 50 проценти.

- Не го сакаме тој булевар, бараме да се избрише за да може еднаш засекогаш да се реши нашиот проблем - изјави Драган Атанасоски, претседател на оваа урбана заедница.

Проблем плус, пред пет години, излезе и одлуката на Конзерваторскиот центар-Скопје неколку куќи да бидат заштитени како амбиентална целина. Но, сега оттаму велат дека ја преиспитуваат состојбата. Сметаат дека поради самоволна промена на архитектурата, нема веќе основа и понатаму едно јадро од ова маало да биде заштитено.

Ќе се брише булеварот Крушевска Република?

Атанасовски е оптимист и верува дека по 50 години тоа и навистина ќе се случи затоа што како урбана заедница добиле информации дека во новиот ГУП, кој е во подготовка, овој булевар се брише. Воедно имале и средба со градоначалникот на Општина Центар, Владимир Тодоровиќ, од кој добиле смирувачки тон.

- На оваа средба беше истакнато дека постои можност со новиот детален план да биде предвидена висина на градбите од пет ката. Деновиве на терен во маалото можеа да се забележат луѓе што мерат. Нивното објаснување беше дека работат за потребите на донесувањето на ДУП - објасни Атанасоски.

Од Градот и од Центар пак изјавија дека не може да потврдат дали оваа сообраќајница ќе остане или не.

- Постапката за изработка на нов ГУП е во тек. Тој е во Агенцијата за просторно планирање на Македонија, која е задолжена да го изготви. Кога ќе има конкретни предлог-решенија Градот ќе ги информира граѓаните - одговорија од одделението за односи со јавност.

Истата судбина како Маџир Маало ја имаат и старите скопски населби Ново Маало и Крњево, кои исто така се наоѓаат во централното градско подрачје.

Жителите изброиле 78 дупки

Маџирмаалци револтирано раскажуваат како немаат елементарни услови за живеење, но и за секојдневно движење. Улиците се тесни, нерамни, оштетени.

- Речиси сите улици во маалово се со дупки. Низ улиците има 78 дупки, сме ги броеле. Тоа е ужас - се пожали жител од Маџир Маало, кој сакаше да остане анонимен.

Алармираше до општинарите да се погрижат за јавните површини, но и што поскоро да го донесат урбанистичкиот план со цел старите напуштени куќи да се санираат или урнат.

- Ако се урнат сами, може да предизвикаат штета на соседните објекти. Во нив сега се собираат бездомници и зависници, и се опасност за жителите - рече граѓанинот. http://dnevnik.com.mk/?ItemID=B2ACB24E54F39E4691A889ED1F585C91