Социјални згради и населби

По неколку месечно задоцнување, поради влијанието на светската економска криза, "Хабитат Македонија", која е инвеститор на проектот, ги удри темелите на првите 24, од вкупно 90 станови

Во велешката населба Тунел 2 почна изградбата на станови наменети за семејства со ниски примања. По неколкумесечно задоцнување, поради влијанието на светската економска криза, невладината организација "Хабитат Македонија", која е инвеститор на проектот, ги удри темелите на првите 24, од вкупно 90 станови. Тие треба да бидат готови во наредните три години. Покрај изведувачот "Ива инжинеринг" од Велес во изградбата на првите четири станбени објекти, од кои во секоја ќе има по шест комплетни станови, учествуваат и шеесетина волонтери од Германија, Италија и од Македонија. Идните сопственици на првите 24 станови, чија бројка на конкурсот беше 128, во првата фаза нема да учествуваат во изградбата на становите, бидејќи се уште не е избрано кој од нив ќе бидат сопственици.

Во "Хабитат Македонија" велат дека до средината на идниот месец ќе бидат познати имињата на идните сопственици на становите во Велес. Освен супстандардните услови за живеење, семејствата кои аплицираат за становите треба да имаат месечни примања до 140 долари.
- Градежните работи, до фаза на карабина, ќе ги изведува "Ива Инженеринг" од Велес. Во моментов на четирите објекти работат и 16 волонтери од интернационалната школа од Дизелдорф од Германија, 11 од Милано, Италија и 70 волонтери од Нова школа од Скопје - вели Венди Аџиева, координатор за градба на населбата од "Хабитат Македонија".

Во изградбата на првите 24 станови, Хабитат веќе договори до октомври да работат и над 250 волонтери од Америка, Канада и од повеќе европски земји. Секоја група волонтери работи по седум денови.