Ски центар Кожуф

Пандев ќе гради, Иванов допрва ќе печали

Засега фудбалската ѕвезда и претседателот на државата се соседи на хартија, но Пандев веќе намерачил плац на кој се токми да изгради комплекс за подготовки на спортистите, токму во планинскиот рај во кој се гради според еколошки стандарди

Вие сте новинар? Новинарите немаат многу пари, ама ако сакате плац, ете ви го таму новинарското маало - со овие зборови и со насмевка не' дочекаа деновиве мајсторите што градеа куќа во ски-центарот „Кожув“.

Багерите наоколу работат без прекин, од што станува јасно дека таму интензивно се гради. Во населбата веќе никнале спортско, политичарско, бизнис-маало. И почнаа да ни бројат кој се' купил плац сакајќи да биде дел од кожувската приказна.

- Чувајте ми место во спортското маало - порачал врвен македонски спортист - ни открија тие.

Малку подалеку од нив мајстори од Србија работеа на брвнарата за која рекоа дека е сопственост на македонскиот репрезентативец кој игра во странство, Горан Мазнов.

- Градиме со природни материјали. Скапо е, ама убаво. Пари треба да има човек, па да не' викне да градиме. Веќе имаме неколку други понуди за соработка - задоволен беше Станко Богосавац, водач на групата.

Меѓу оние што решиле да инвестираат во сопствен објект и да бидат дел од македонскиот бисер, е и македонската фудбалска ѕвезда Горан Пандев. Според првите луѓе на ски-центарот, тој ќе инвестира во атрактивен комплекс за висинско-кондициски подготовки на спортисти.

Пандев: Кожув е прекрасен

„Кожув е прекрасен“, напишал Пандев на листот хартија кој од ски-центарот го чуваат закачен на посебна табла.

Веднаш до него го ставија парчето хартија на кое претседателот на државата Ѓорге Иванов ги запиша своите импресии од планината.

„Прекрасно е чувството да се престојува на овој простор, кој е идеален спој на она што го создала природата и она што го изградиле вредни луѓе - запиша Иванов.

Го прашавме дали и тој ќе си купи плац во новиот ски-центар во државата.

- За плац ќе размислам. Се' уште треба да заработам - одговори со широка насмевка.

Но, ако му дозволеле обврските, секако дека ќе дошол на скијање.

Беше воодушевен од природата на Кожув. Беше изненаден што таму снегот се задржувал и до првите денови од месец мај. Од толку што му било убаво на планината, ниту снегот не сакал да си оди.

- Додека не дојде човек овде не може да ја почувствува моќта на тоа што се гради тука - изјави претседателот Иванов.

Тој изрази желба на највисоката точка на центарот да се искачи со жичарницата, но раководните луѓе не го дозволија тоа.

- Деновиве треба да се спроведе редовната проверка на исправноста на жичарницата, па не би ризикувале. Иако сме сигурни дека нема да има никаков проблем - му рекоа на претседателот првите луѓе на центарот.

За својот гостин тие подготвија богата трпеза со јагнешко, на која не изостанаа малините, капините и боровинките набрани од планината. Пријатното чувство не го наруши ниту неколкуминутниот прекин на електрична енергија. Луѓето од центарот се снајдоа веднаш. Со кабли спроведоа струја од генератор.

Господ не штедел на Кожув

Ангел Наков, извршен директор на ски-центарот, потенцираше дека Кожув е туристички комплекс во изградба, кој веќе ја стави Македонија на светската туристичка мапа. Рече дека изминатите неколку години изоделе трнлив пат за овој голем проект да ја види светлината на денот. Идната сезона очекуваат да заврши изградбата на регионалниот пат кој го поврзува центарот со Гевгелија. Исто така, одобрен е и проектот за новиот пристапен пат од Демир Капија преку селото Крњево до ски-центарот.

- Господ навистина бил дарежлив и не штедел кога го дарувал Кожув. Кога давал, дал се'. Убавините на оваа планина ќе бидат достапни до љубителите на природата не само во зима, туку преку целата година. Овде нема да уживаат само оние што сакаат и што умеат да скијаат. Шумските и речните потенцијали се фантастични. На мал простор нудиме многу природни богатства. Реката Дошница е можеби единствената река во Македонија од која може да се пие вода - рече тој.

Нивен приоритет, исто така, е недопрената природа наоколу да ја задржи еколошката димензија. Во тоа имаат целосна поддршка од туристите што ги сретнавме таму. Ги имаше многу, и домашни и странски. Рекоа дека ја сакаат планината во сите четири годишни времиња. Береа шумски плодови и разни чаеви додека ни објаснуваа колку се импресионирани од таа планинска идила.

- Велат дека имало мечка. Луѓето виделе траги. Не знаеме дали е вистина или само измислена приказна. Не се плашиме, само се прашуваме дали е наша или е грчка - рекоа смеејќи се.

Поминавме еден прекрасен ден на Кожув, дишејќи чист воздух. Наместо 32 степени во градот, добро ни дојдоа тие петнаесетина степени на околу 2.000 метри надморска височина.

Светлана Дарудова