Romanian Government has launched a tender for feasibility studies for Lugoj-Calafat Motorway (the south CIV corridor)



Со други зборови, во Романија се спремаат да почнат да ја градат врската помеѓу Лугој, Крајова и Калафат/Видин, со што коридор 4 се врзува на автопатот Трансилванија (Букурешт-Питешти-Сибиу-Арад-Унгарија). Ова го пишувам затоа што Коридорот 4 е паралелен на Коридорот 10 кој минува низ Македонија и негов главен конкурент (иако сум од оние кои мислат дека коридорите меѓусебно не се конкуренти а се комплементарни и за секој од нив има доволно сообраќај бидејќи се така зацртани да поврзуваат големи градови и извори на голема економска дејност). Сепак факт е дека побрзо изградениот коридор привлекува голем број на транзитен сообраќај!
К4 (Солун-Кулата-Софија-Видин-Крајова-Арад-Унгарија-..)
К10 (Солун-Скопје-Ниш-Белград-Хоргош-Унгарија-...)

На Коридорот 4 ситуацијата е моментално следнава:

Во Грција се скоро при крај со изградба на последните отсечки  од автопатот Солун-Промахонас-Кулата.

Во Бугарија К4 е поделен на две отсечки и тоа:

ЈУЖНА - АМ Струма (Софија-Благоевград-Кулата). Неодамна беше отворена делницата Софија-Даскалово (АМ Лјулин), надоврзување на постоечката  и веќе изградена делница на АМ Струма од Даскалово до Долна Диканија. ЛОТ 1 (Долна Диканија - Дупница) и ЛОТ 4 (Кулата - Сандански) се веќе дадени на тендер и нивната градба треба да почне во текот на оваа есен. ЛОТ 2 (Дупница - Симитли) и ЛОТ 3 (Симитли-Сандански) треба да бидат дадени на тендер до крајот на оваа година и нивната изградба да започне на пролет 2012 година, заедно со 13,3 км долгиот тунел низ Кресненската клисура. Целосното завршување на АМ Струма е најавено најкасно за до крајот на 2015 година, што е многу амбициозно, заради долгата делница и многу тешкиот терен низ кој минува.

СЕВЕРЕН - Софија-Ботевград-Видин-Дунав мост 2
Во овој дел влегува делницата помеѓу Софија и Ботевград, која е изградена и е веќе дел од АМ Хемус. Точно пред Софија има една кратка 8,5 км долга отсечка која не е изградена, за која во моментов тече тендер за изведувач и која ќе биде завршена доста брзо. Делот од Ботевград до Видин е предвиден да биде експресен пат (2*2, без лента за застанување и без вкрстувања на исто ниво, со дозволена брзина од 110 км на час). Тој е планиран да се гради по 2014 година, но од новата оперативна програма ќе биде пиоритетен, така што неговото завршување треба да се очекува кон 2017-2018 година.

Дунав Мост 2 е веќе во напредната фаза на изградба и се очекува да се заврши следната година. 

Во Романија се градат или се дадени на тендер многу делници од автопатот Трансилванија, кој ги сврзува Букурешт и Констанца со Европа, преку Унгарија. Новост е фактот што делницата Лугој-Крајова-Калафат/Видин се разгледува како автопат, кој ја зајакнува позицијата на К4.

Така според мене до 2018, Коридорот 4 помеѓу Солун и Романија, а можеби и Унгарија ќе биде една цела делница од непрекинат автопат.

На Коридорот 10 ситуацијата е следната:

Во Грција недостасува доста голем дел од Солун кон Евзони, кој треба да биде подигнат на ниво на класичен автопат (скоро целиот дел е со вкрстувања на едно ниво, при што има доста голем дел кој не е одвоен ниту со разделителна ивица).  Кога и како ќе се гради не е соопштено, но треба да се признае дека сегашната ситуација на патот дозволува задоволително брзо движење.

Во Македонија фалат делниците Демир Капија-Смоквица, која според најавите треба да се гради бесконечно долго (до 2018 ако се оди според планот), иако се работи за многу кратка делница, која може комотно да се изгради во рамките на 30-36 месеци). Потоа Табановце-Куманово, делница која исто така се гради веќе недопустливо долго време, многукратно пробивајќи ги сите рокови. Останува нејасно што се планира во делницата Велес-Катланово, односно кога ќе се реконструира постоечкиот коловоз и кога (и дали) ќе се гради нов, паралелен коловоз по автопатски стандарди за насоката Катланово-Велес.

Во Србија пак исто така Коридорот 10 може да се подели на два дела:

СЕВЕРЕН (Белград-Нови Сад-Унгарија), кој е моментално во изградба по целата своја должина. Оваа делница многукратно ги проби роковите, но се навестува дека би била завршена кон крајот на оваа година. Се работи и на паралелниот мост Бешка 2.

Далеку попроблематична  делница за изградба е ЈУЖНАТА (Белград-Ниш-Прешево), од кои делницата Белград-Лесковац е изградена, но останува најтешката делница од Лесковац до Прешево, на која нема изградено ниту еден километар автопат. Овој сегмент, поделен на неколку подсегменти е заглавен во отуѓувања и неговата изградба не е јасно кога же почне. Потребното време за завршување на ваква долга делница, низ тежок терен (Грделица), според мене а и многумина е 3-4 години од почнувањето со изградба. Значи, делницата од Ниш кон Макеоднската граница може  да се очекува во периодот 2016-2017 година.

Голем проблем останува и Белградската обиколница, која не е пробиена во целата своја траса, но и делницата која е отворена неодамна, се состои од полуавтопат (само едниот коловоз е изграден, другиот чека подобри времиња). Кога би почнала изградбата на целиот автопат, долж целата траса, сеуште е непознато.