Возен парк (ЈСП - двокатни автобуси)

Кинеските даблдекери ќе возат по улиците од октомври в година

Возењето во 202 двокатни автобуса ќе не' чини 35 милиони евра без пресметан ДДВ

Деспина Трајковска



Од идната година по скопските улици ќе почнат да возат првите 66 од вкупно 202 двокатни автобуса слични на оние од 1950-тите години. Владината набавка за поднова на јавниот превоз вчера ја официјализираа министерот за транспорт и врски, Миле Јанакиески, и Гуанминг Занг, генерален директор на кинеската компанија „Јутонг“ за пазарите во Европа и во Северна Америка.

Кинезите беа избрани како најповолни понудувачи на тендерот за даблдекерите, кој успеа дури во петтиот обид. За двокатните автобуси Владата ќе треба да плати 35 милиони евра без пресметан ДДВ, пари што ќе се издвојат од три фискални години. Автобусите ќе се исплаќаат по секоја испорака, а предвидено е до крајот на наредната година да стасаат првите 66 возила и во наредните две години по 68. Два од 202-та двокатни автобуса се со отворен покрив, наменети за туристички разглед и еден од нив ќе му се подари на Охрид за развој на туризмот.

„Овој проект ќе значи конечна обнова на застарениот јавен превоз на Скопје, имајќи предвид дека неодамна се потпиша и договорот за 84 едноподни автобуси од Украина, а во тек е и тендер за набавка на 16 минибуси“, рече министерот Јанакиески по потпишувањето на договорот со Кинезите, информирајќи дека од компанијата дале ветување оти е можно првите автобуси да ги испорачаат и пред крајниот рок, односно до октомври наредната година.

„Мило ни е што македонските граѓани ќе се возат во нашите автобуси. Ние сме компанија со реноме, една од светски најпознатите и имаме капацитет да одговориме на вашите барања. Автобусите за Скопје се вонсериска линија, вакви досега не се произведени, иако имаме изработено 100 вида автобуси, двокатни и обични“, истакна Гуанминг Занг.

Тој потврди дека ретродизајнот, кој покрај цената беше еден од главните услови за добивање на тендерот, автоматски ја поскапел набавката, но воопшто не сакаше да каже за колкава сума, па дури ни приближно. Занг демантираше дека локален партнер на компанијата во проектот е бизнисменот Орце Камчев. Се пофали дека „Јутонг“ лани произвела над 30.000 автобуси, а дневниот капацитет на производство, во зависност од типот на автобусот, изнесува околу 150 возила.

Автобусите што ќе се возат по скопските улици ќе користат мотор еуро 4, ќе имаат дигитален такограф, автоматска рампа, по 60 седишта за седење и 20 за стоење и ќе бидат целосно климатизирани.

Со официјализирањето на набавката се стави крај на речиси двегодишниот избор на најповолен понудувач за даблдекерите. Успеа петтиот тендер откако претходните беа поништувани поради нецелосни понуди, а првично и поради зголемувањето на бројот на бараните возила.

Министерството за транспорт и врски најостро реагира на денешната прес-конференција на компанијата „King Long Bulgaria“, чија понуда по огласот за набавка на 202 двокатни автобуси беше отфрлена од страна на Комисијата за спроведување на јавната набавка. 

Ја информираме јавноста дека Министерството за транспорт и врски спроведе јавен оглас за набавка на 202 новопроизведени двокатни автобуси, со цел да се врати духот на старото Скопје, но со возило кое ќе ги исполни техничките и функционални карактеристики на современите и модерни превозни средства. Согласно тендерската документација, економскиот оператор треба да понуди дизајн (изглед) на возило кое во најголем дел ќе го задржи изгледот и ќе наликува на автобусите за градски сообраќај кои се движеле по градските улици во педесеттите и шеесетите години од дваесеттиот век.

Оттука, целта на оваа набавка е да се набават автобуси кои ќе бидат препознатливи исклучиво за Скопје и нема да се возат на друга локација, што значи дека тие автобуси не се во сериско производство на потенцијалниот понудувач.

Комисијата за спроведување на јавната набавка изборот на најповолен понудувач го направи врз база на два критериуми:

1. Цена која носи 70 бодови,

2.Технички и функционални карактеристики со дизајн која носи 30 бодови.

Врз основа на првиот критериум, најповолна цена имаше компанијата King Long која освои вкупно 70 бодови, додека компанијата Yutong врз основа на овој критериум освои 65 бодови.

Најповолна цена во својата понуда имаше компанијата King Long, но сакаме да нагласиме дека понудената цена не беше единствениот критериум за избор на најповолен понудувач.

Имено, врз основа на вториот критериум, според кој се оценуваше ретро дизајнот и техничките и функционалните карактеристики на понудените автобуси, беше утврдено дека за прифатлива ќе се смета понудата која ќе има најмалку 21 бод според овој критериум. Нагласуваме дека овие критериуми им беа однапред познати на сите заинтересирани понудувачи и истите им беа дадени на увид.

Во овој дел, компанијата King Long освои вкупно 15.5 бодови, што значи дека не ги освои ниту минималните бодови кои беа потребни за да понудата се смета за прифатлива и оттука истата Комисијата ја оцени за неприфатлива и истата не беше предмет на понатамошна евалуација.
Нагласуваме дека секој член на Комисијата за спорведување на постапката по јавната набавка одлучуваше независно и во согласност исклучиво со условите од тендерската документација и Законот за јавни набавки.

Комисијата оцени дека компанијата King Long не понудила специјална производствена линија со ретро дизајн на автобуси наменети за јавен превоз во Скопје, туку понудените автобуси се со модерен дизајн и дел од нивната редовна сериска понуда и истите можат да се видат на нивната интернет-страница како дел од редовната понуда: http://www.king-long-bg.com/view.php?id=40&lang=en.

Компанијата Yutong по овој критериум освои 26,2 бодови, со што нивната понуда се смета за прифатлива. Во прилог (атачмент) Ви доставуваме копија од дизајнот кој е понуден од страна на најповолниот понудувач од каде е евидентно дека е дизајнирана специјална линија на автобусите кои наликуваат на автобусите кои биле користени во старо Скопје. 

Сметаме дека одржувањето на вакви прес-конференции во период кога е во тек постапката за жалби до Државната комисија за жалби по јавни набавки е само обид да се влијае на крајната одлука на оваа Комисија и оттука апелираме до учесниците во јавната постапка да се воздржат од вакви слични јавни настапи се до целосно завршување на истата.

Со почит, 

Министерство за транспорт и врски

http://mtc.gov.mk/new_site/mk/storija.asp?id=2368