ЈСП со половни автобуси ќе го освежува возниот парк

Ќе се бара дипломатска помош за да се аплицира во странски фондови заради реализирање проекти

Снежана Калабакова


Јавното сообраќајно претпријатие „Скопје“ ќе иницира билатерални средби со дипломатските претставници во земјава од кои ќе бара помош како да аплицира во одредени фондови за да дојде до пари за реализација на проекти. Истовремено, ќе бара можност и за евентуална набавка на користени автобуси од некој европски град, кои привремено би ја ублажиле очајната состојба со стариот возен парк, барем додека не дојдат новите автобуси.

Претпријатието се надева дека со помош на дипломатите ќе најде средства и за да ги продолжи започнатите проекти за поставување електронски табли на автобуските постојки и за пренамена на дизел-моторите на автобусите со мотори на плин. Досегашните 225 илјади евра што ги доби од СП-7 фондовите на Европската комисија не се доволни за целосна реализација на двата проекта.

Мишко Николов, новиот директор на ЈСП, вели дека веќе остварил првична средба со Секретаријатот за европски прашања од каде што чека да го упатат каде да се обрати. Смета дека со билатерални средби со дипломатските претставници многу полесно ќе се дојде до некои решенија.

„Можеби би било добро некоја амбасада и да ни подари некој автобус или да ни помогне да набавиме расходовани автобуси од некој европски град. Во Холандија, на пример, градските автобуси ги возат пет години, а потоа ги расходуваат. Набавката на десетина такви автобуси значително ќе ја подобри состојбата со возниот парк на претпријатието, стар во просек 20-ина години, бидејќи дневно ни се расипуваат од 10 до 20 автобуси“, нагласи Николов.

Тој објасни дека наредниот месец ќе профункционираат десет електронски табли на автобуските постојки на линиите број „2“ и „5“. На нив патниците ќе можат да прочитаат за колку време ќе пристигне автобусот што го чекаат. Моментно се завршуваат административни процедури со ЕВН за поставувањето на електронските приклучоци за таблите. Од ЈСП тврдат дека доколку се изнајдат средства, а постои алтернатива и Градот да субвенционира со уште еден дел, проектот со електронските табли ќе се прошири и на други линии.

Истовремено би можел да се прошири и проектот за преадаптација на моторите, кој сега е лимитиран на дванаесет автобуси. Првиот автобус со мотор на плин ќе биде пуштен во сообраќај за две седмици.

Договорот за инсталирање електронска наплата во автобусите на ЈСП „Скопје“, кој требаше да биде склучен меѓу Град Скопје и најдобриот понудувач, фирмата „Ксмет карт“, најверојатно, нема да биде потпишан. Според надлежните, причина за тоа се низата забелешки што ги имале двете страни за инсталацијата на „смарт-тикетингот“, електронската локација на возилата, како и времето за поставување на апаратите. Првичните најави беа дека оваа наплата ќе стартува од март годинава, по што имаше неколку одложување, за сега надлежните да се двоумат за потпишувањето на договорот. Електронски читачи требаше да се постават во 250 автобуси.
- Најверојатно, тендерот за електронска наплата во нашите автобуси нема да биде потпишан, но ние како претпријатие сме подготвени и натаму да продолжиме со досегашната наплата. Имаме набавено хартиени картички до следното лето, со што реално сме во позиција да продолжиме со досегашниот начин на наплата и работење - вели Мишо Николов, директор на ЈСП „Скопје“.

Е.М.

Автобуските превозници во трка за профит ретко кога одбиваат да качуваат патници дури и во моментот кога ќе забележат дека автобусот е преполнет и дека патниците во него едвај дишат стиснати еден до друг. Притоа не размислуваат дека со претовареноста се доведува во опасност безбедноста на луѓето во возилото, особено ако се има предвид колку се стари и во каква лоша состојба се автобусите со кои скопјани секојдневно се возат. Преполнетите автобуси се редовна појава во утринските часови, особено кога учениците одат на училиште, но и во часовите кога граѓаните се враќаат од работа. Сепак, ова досега не било причина за полицијата да изрече казна за некој од возачите заради пречекорување на дозволената бројка на патници во возилото.

Наспроти тоа, за истиот прекршок казната не ги одминува граѓаните кои во своите автомобили би возеле повеќе патници од дозволеното. Од ЈСП „Скопје“, но и од приватните автобуски превозници, потврдуваат дека досега немаат добиено ваква казна зашто тврдат дека во нивните автобуси се внимава да нема турканици. Според нив, само во исклучителни ситуации се случува во некој од нивните автобуси да се качат поголем број граѓани отколку што е дозволено. - Досега ниту еден наш возач нема заработено казна затоа што превезувал поголем број патници од она што е дозволено затоа што кај нас единечните автобуси се регистрирани да превезуваат вкупно 85 патници, а дозволената бројка во зглобните автобуси изнесува околу 180 патници - вели Александар Бошковиќ, директор на ЈСП „Скопје“. Тој тврди дека се внимава да не се помине дозволената граница. - Кај нас многу ретко се случува да се качат повеќе патници од дозволеното затоа што нашите автобуси сообраќаат во просек од шест до десет минути. Така поради тоа што линиите се чести, патниците не чекаат само еден автобус и не се создава поголема метеж од таа што е дозволена при регистрација на возилото - вели Ленин Јовановски, директор на „Слобода превоз“. Јовановски и Бошковиќ велат дека како решение да не се создаваат турканици во автобусите, многу често нивните возачи се одлучуваат да не застануваат на следните автобуски постојки и покрај тоа што на нив чекаат патници.

Спротивно од тврдењата на директорите на ЈСП „Скопје“ и на „Слобода превоз“, од СВР Скопје тврдат дека сообраќајната полиција изрекува околу пет казни месечно за автобуси кои превезуваат поголем број патници од дозволеното. - Сообраќајната полиција на самото место го утврдува направениот прекршок, а казната која се изрекува, изнесува 45 евра или 25 казнени поени за физичкото лице, од 520 до 1.350 евра за правното лице и 330 евра за одговорното лице - објаснува Лиза Бендевска, портпаролка на СВР Скопје.

http://www.vreme.com.mk/DesktopDefault.aspx?tabindex=0&tabid=1&ArticleID=124512&EditionID=1844

Возилата во јавниот градски превоз се руинирани, со полузатворени врати и прозорци, без клима-уреди или парно греење, со покриви кои што пропуштаат, со скршени седишта, без држачи. Скопјани ги чекаат новите автобуси

Старите и дотраени автобуси на јавниот превоз се повеќе стојат во лер отколку во брзина. Руинирани, со полузатворени врати и прозорци, без клима-уреди или парно греење, со покриви кои што пропуштаат, со скршени седишта, без држачи. Со години не е купено ново возило, а старите се стари дури и за ремонт. Просечната старост им е 25 години.
- Сите се жалиме на старите крнтии на ЈСП, а ич не ни се допадна идејата да се купат 302 нови двоспратни автобуси. После имавме забелешка на тоа што биле кинески, па некако со олеснување ја примивме веста дека тендерот пропаднал. Сега е лесно. Уште си се возиме во скапаните смрдливи автобуси со кои никогаш не си сигурен дали ќе те однесат на правото место или ќе се расипат на сред пат - реагираат граѓаните. Тие тврдат дека условите во автобусите многу зависат и од возачите. Некои се пристојни, ама некои се катастрофа. "Ај што чекаш со саати, кога ќе влезеш внатре неуредно, смрди, а имам забелешка и на однесувањето на патниците и на возачите, велат тие.

Вакви реакции, вели директорот на ЈСП Скопје, Александар Бошковиќ има, но тврди дека во последниве месеци поплаките се се помали поради тоа што била зајакната внатрешната контрола и казнената политика.
- Како менаџерски тим инсистираме да се запази хигиената во автобусите, да се чистат и внатре и однадвор, да се санираат дефектите, да не се случи да се пушти во сообраќај расипан автобус, да се санираат штетите и мислам дека имаме направено чекор напред. Но, повеќето возила се стари и ние тука ништо не можеме освен да се надеваме дека Владата ќе го распише тендерот за набавка на 302 автобуси и дека првата пратка ќе ја дочекаме веќе во првата половина на идната година - вели Бошковиќ. Тој најави дека од 15 септември 10 автобуски постојки ќе бидат опремени со електронски информативни табли на кои ќе може да се гледа за колку време ќе пристигнат автобусите. Ова е пилот-проект со кој во прво време ќе бидат опфатени линиите 2 и 5, кои сообраќаат од Сарај до Автокоманда, односно од Ново Лисиче до Дексион во Ѓорче Петров. Поставувањето на таблите е дел од проектот "Ренесанса" што го реализира Град Скопје.