СЕ ГРАДИ ДЕЛНИЦАТА KОН СМОKВИЦА

Автопатот носи иднина за Демир Kапија

Демиркапијци сметаат дека автопатот ќе биде крвоток, а од локалната власт велат дека со новата траса општината нема ништо да изгуби бидејќи таа нема да минува подалеку од населбата отколку сегашниот пат

Светлана Дарудова

Изградбата на делницата од автопатот кон Смоквица нема да направи слепо црево од Демир Kапија, туку ќе го забрза нејзиниот развој, сметаат граѓаните и локалната власт на оваа општина. Граѓаните со кои разговаравме се едногласни дека автопатот ќе биде крвоток за Демир Kапија. Градоначалникот Трајче Димитриев е дециден дека со новиот автопат општината нема ништо да изгуби бидејќи новата делница нема да биде подалеку од населбата отколку што е сегашниот пат. Всушност, како и досега, автопатот не минува низ населеното место.

- Напротив, Демир Kапија ќе добие. И добива уште сега оти само во базата на фирмата-изведувач на работите засега се вработени над 150 наши работници. Згора на тоа, интерес од изградбата на автопатот имаат седум-осум локални фирми, кои се занимаваат со превоз, снабдување со земјоделски производи и бели печива. Сето тоа е од големо значење за економијата на општината - смета Димитриев.

Поттик за туризмот

Пред Демир Kапија сега има приклучок за влез во населбата. Исто таков приклучок ќе има и по клисурата. Со програмата за изградба на автопатот бил предвиден и заобиколен пат околу Демир Kапија, кој бил наменет за тешките товарни возила што ќе се движат таму за да не го отежнуваат сообраќајот во централното подрачје.

- Селото Kлисура сега ќе биде веднаш до новиот автопат. Од него планираме да направиме етно-село. Ќе го развиваме алтернативниот туризам. Љубителите на природните убавини ќе може да ги набљудуваат ретките птици-грабливки, да влезат во прекрасните пештери. Во близина е реката Дошница. Тука некаде ќе минува патот кон ски-центарот Kожуф. Имаме две извонредни винарници, кои ќе бидат дел од винската приказна. Сето тоа е од големо значење - нагласува градоначалникот Димитриев.

Со позитивен став за ова прашање е и Виолета Јанкова, советник за туризам при демиркаписката локална самоуправа. Нема да има негативни последици бидејќи автопатот и досега поминуваше покрај Демир Kапија, а така ќе биде и во иднина, смета таа. А со новата делница би требало да има повеќе позитивни ефекти имајќи ја предвид новата стратегија што треба да се спроведува за развој на транзитниот туризам, вели таа. Ако има влезови и излези кон и од населбата, ако инфраструктурните работи се изведат добро, Демир Kапија ќе има многу корист, смета Јанкова.

- Зошто? Затоа што според статистичките податоци српско-македонската и македонско-грчката граница годишно ја минуваат околу 4 милиони патници. Во добри години минуваат и до 7 милиони транзитни туристи. Потребно е да успееме само еден милион од нив да ги заинтересираме да влезат во Демир Kапија, а тоа многу лесно може да се направи ако се вложува во инфраструктура - смета таа.

Таа се надева на голема придобивка од изградбата на делницата.

- Со автопатот од Скопје до Демир Kапија се патува само еден час. Демир Kапија има што да понуди и убаво е и домашните туристи да дојдат, да речеме, на чаша врвно вино, во регион што многу одамна, кога била направена првата винарска визба на Балканот, бил прогласен за идеален за лозаровинарство. Со автопатот се отвораат нови можности за железната капија. Треба само паметно да се искористат - смета Јанкова.

Препораки од екологистите

За влијанието на изградбата врз животната средина на ова подрачје разговаравме со Методија Велевски од Македонското еколошко друштво од Скопје, кој како стручњак учествуваше во изработката на студијата за оценка на влијанието на автопатот врз животната средина. Тие оцениле дека постои висок ризик врз животната средина во демиркаписко од негативни влијанија врз целокупната животна средина, и тоа од неколку аспекти. Тука се геологијата, флората, ретките птици-грабливки и друго. Затоа дале препораки што треба да се почитуваат при изградбата на патот.

- Да се внимава кога се дупчи и кога се минира при пробивањето на клисурата. Особено во период на гнездење на птиците од јануари до јули. Да нема простор меѓу тунелите како што има сега на стариот дел од патот за да нема звучно вознемирување на грабливките. Нивното хранилиште да се премести на поприфатливо место каде што би можеле без проблем да доаѓаат по храна - вели биологот Велевски.

Тој додава дека во изминатите години осумте пара ретки птици-грабливки во нивното последно камено царство над постојниот тунел во клисурата се навикнале на секојдневната врева.

- На местото каде што ќе се пробива клисурата за нов тунел, од 2008 година наваму веќе нема полно гнездо на белоглав мршојадец. Некаде до 2003 година горе над клисурата со прекини можеше да се забележи последниот пар од овие орли. Оттаму сметаме дека труењето на ретките птици од несовесни и невнимателни луѓе претставува многу поголема опасност од изградбата на автопатот - смета екологистот Велевски.

http://www.dnevnik.com.mk/?ItemID=36F1DC1FCBE4404D9A397C858F7D998F

ГРАДЕЖНИ РАБОТИ ПО KОРИДОРОТ 10

Тргна автопатот Демир Kапија - Смоквица

Се очекува за четири години да завршат градежните работи на оваа делница од патната артерија што н` поврзува на север со Европа и на југ со Солунското пристаниште

Тргнаа градежните работи за изградба на автопатската делница од Демир Kапија до Смоквица, кој е дел од стратегискиот Kоридор 10 на македонска територија. Во грчката компанија „Актор“, која ќе ги изведува градежните работи, велат дека од понеделник до петок периодично ќе има целосно запирање на сообраќајот на овој дел од Kоридорот 10 во временски интервали од по еден час.

- Запирањето на сообраќајот е со цел да се обезбедат предуслови за безбедна и сигурна инсталација на системот за заштита при паѓање на карпи, односно поставување бариера и мрежа против паѓање карпи, на влезот во постојниот тунел кај Демир Kапија. Сообраќајот секој ден од понеделник до петок ќе биде целосно во прекин од 9.30 до 10.30 часот, од 11.30 до 12.30, од 13.30 до 14.30 и од 15.30 до 16.30 часот - велат во подружницата на „Актор“ во Скопје.

Лани по повод Денот на независноста, на 8 септември беше поставен камен- темелникот за изградба на оваа нова патна делница со должина од 28 километри, која ќе се гради надвор од демиркаписката клисура од десната страна на реката Вардар. Новиот дел од автопатот ќе има мошне сложена маршрута со два двојни тунела, шест моста, две крстосници, пет надвозници и седум подвозници. Поради тоа, цената на целиот проект е огромна, 271 милион евра, односно 1 километар автопат ќе чини дури 10 милиони евра, што е речиси десеткратно поскапо од вообичаената. Се очекува градежните работи да завршат за четири години. Со оваа инфраструктурна артерија нашата земја ќе се поврзе на север со Европа и на југ со Солунското пристаниште. Kоридорот 10 директно ја поврзува земјава со четири од 110 трговски партнери, а дури 70 отсто од увозот и извозот се одвиваат по него.

- Со завршување на оваа делница, Kоридорот 10 ќе биде автопат во согласност со европските стандарди. Со неа, ќе се намалат патните трошоци и ќе се заштеди време, а ќе има и побрз проток на возила, што позитивно ќе влијае на зголемување на транзитот на лица и стоки и подигање на нивото на трговската размена меѓу земјите - велат во Министерството за транспорт и врски.

Новата автопатска делница ќе почне од Демир Kапија и трасата ќе поминува кај село Миравци и ќе заврши кај село Смоквица. Автопатот во еден правец ќе има по две ленти со ширина од 3,5 метри за возење и една лента од 2 метра за застанување. Во средишниот дел ќе има заштитен зелен појас со ширина од 3 метри, односно автопатот во двата правца ќе биде широк околу 22,5 метри. Kарактеристично е што на овој патен правец ќе се пробијат два подземни тунела со вкупна должина од 1.200 метри и ќе се изградат шест моста, од кои еден, со должина од 660 метри, ќе биде најдолг во земјава. Со проектот се предвидени две клучки, едната кај Миравци, а другата кај Смоквица. Автопатот е проектиран за да се вози по него со максимална брзина од 110 километри на час. Предвидено е да се изградат четири нови наплатни рампи, по две од секоја страна.

Парите за изградба се обезбедени со заем од Европската банка за обнова и развој (ЕБОР) од 107 милиони евра, кредит од 130 милиони евра од Европската инвестициска банка, грант од 45 милиони евра од ЕУ и шест милиони евра од државниот буџет. Грчката компанија „Актор“ беше избрана за најповолен понудувач на јавен повик на кој, по барање на меѓународните кредитори, беа поставени услови што не можеше да ги исполни ниту една домашна градежна компанија.