Сончев Град

Игор Чавески

Изградбата на еколошката населба „Сончев град“ може да биде целосно откажана поради големиот број административни проблеми со кои се соочува инвеститорот на проектот. Израелската компанија, која требаше да го реализира проектор се уште нема побарано од Општина Сопиште издавање градежна дозвола која е неопходна за почнување на градежните работи на објектот. Инвеститорот „Индустријал билдинг корпорејшн“ при средбата со претставници на Владата се пожалил дека геодетските податоци за земјиштето се застарени и датираат од шеесеттите години на минатиот век направени при авионско снимање на теренот. Според нив, тие податоци не се совпаѓаат со моменталната состојба и парцелите означени за изградба се целосно неточни. Во Министерство за транспорт и врски потврдуваа дека изградбата на луксузната населба постојано се одложува, но не можат да кажат дали ќе биде прекинат проектот. Според нив, доцнењето на проектот е резултат на големиот број административни препреки при изградбата. - Точно е дека има застој во целиот проект поради уписот на земјиштето на име на инвеститорот, но тоа е надминато. Сега останува на инвеститорот да побара одобрение за градба од општината каде ќе се гради објектот - вели Драган Симоновски, портпарол на Министерството за транспорт и врски. Компанијата „ИБЦ“ во мај минатата година на лицитација го купи земјиштето од 630.000 квадратни метри во општина Сопиште за 3,6 милиони евра. Од Општината велат дека никој од надлежните од израелската фирма им се обратил, ниту, пак, знаат зошто се доцни со почетокот на градежните работи. - Општината Сопиште, на чија територија ќе биде објектот, треба да ја издаде градежната дозвола на инвеститорот, но тие досега немаат побарано такво нешто. Тие се должни во рок од шест месеци од уписот на земјиштето на нивно име да почнат со градба - вели Игор Трифуновски, портпарол на Општина Сопиште. Претставникот на фирмата „Сан сити“, македонски застапник на „Индустријал билдинг корпорејшн“, не сакаше да коментира кога и дали воопшто ќе почне изградбата на проектот. Причина за одложувањето на изградбата е и порастот на цените на градежните работи од моментот на купување на објектот до терминот за почеток на градбата. Поради светската криза, се очекува драматичен пад на побарувачката на недвижности, за што веќе постојат првите знаци. Изградбата на модерната населба за домување за околу 6.000 жители, според планот, требаше да почне по шест месеци од добивањето на тендерот, а да заврши најмногу за три години. Комплексот со околу шестотини куќи, единаесет згради и неколку придружни објекти, како спортски терени, училишта и градинки, беше проектиран по примерот на американски населби. При изградбата беше планирано да се употребуваат само еколошки материјали, според стандардите на ЕУ. За потребите на жителите на елитната населба градот беше подготвен да пробие и нов пат низ парк-шумата Водно и покрај протестите од многубројни еколошки здруженија.

http://www.vreme.com.mk/DesktopDefault.aspx?tabindex=1&tabid=1&EditionID=1557&ArticleID=102649

Пропаѓа ли проектот „Сончев град“?

Наташа Стојановска	Коментари (5)

Недоразбирања има и околу инфраструктурата-патот и водата, што требаше да бидат обезбедени

Се искомплицира изградбата на Сончев град, елитната населба на јужните падини на Водно. Грандиозниот проект вреден 100 милиони евра е на добар пат да пропадне, дознава А1. Израелската компанија за локацијата плати 3,6 милиони евра.

Но, настанале недоразбирања.

Според информациите на А1, авионските снимки од катастарот што им биле дадени на менаџерите од Израел не се совпаѓале со она што реално го добиле на терен. Побарале нови мерења. Недоразбирања има и околу инфраструктурата-патот и водата, што требаше да им бидат обезбедени.

Израелците имале средба и со високи владини претставници но тоа не вродило со плод. Сега според нашите информации тие размислувале и да го затворат и претставништвото во земјава. А1 ги консултираше менаџерите на израелската компанија, велат дека за ситуација немаат коментар.

Од Министерството за транспорт немаат информација дека проект е на пат да пропадне. На локација од 640 илјади метри квадратни требаше да се изгради елитен комплекс за 6 илјади луѓе.

Се одложуваат инвестициите во Македонија

Француската компанија „Монтипе“ ја одложува инвестицијата во Македонија. Министерот без ресор самак за А1 вели дека производителот на автомобилски делови не се откажува, туку само го пролонгира рокот за два до три месеци.

Компанијата требаше да започне со производство на алуминиумски глави за мотори на возила во април. Сега целата работа се одложува бидејќи, „Монтипе“ очекувал од автомобилските гиганти „Форд“, „Рено“ и „Ауди“ да соопштат колку делови да се произведат.

Аналитичарите велат дека сите инвестиции идната година ќе бидат блокирани поради светската финансиска криза, која во најголем дел удри врз автомобилската индустрија.

„Светската криза е предизвикувач на ваков развој на настаните. Сведоци сме дека големите компании, кои се поврзани со странски директни инвестиции, ја штедат и чуваат готовината и сè што им од аспект на план за раст и развој го намалуваат, посебно во автомобилската индустрија“, изјави Јанко Тренкоски, економски аналитичар.

Но, не е само светската криза во прашање. Странските инвеститори во земјава се соочуваат и со реални проблеми. Турската компанија „Тав“, која требаше да ги модернизира скопскиот и охридскиот аеродром, исто така ја одложи инвестицијата.

„Во постапка е експропријација, правење на проекти, треба дислокација во делот на Министерството за одбрана. Можеби ќе има мало задоцнување, но никако нема да пропадне. Очекуваме за еден-два месеци кога ќе се заврши целокупната постапка за експропријација да започне изградбата на аеродромите“, изјави Миле Јанакиевски, министер за транспорт и врски.

Бирократски бариери го кочат и грандиозниот проект Сончев град, вреден 100 милиони евра. Министерството за транспорт потврдува дека има проблеми, но не се наведуваат конкретни детали каде е заглавена процедурата.

Израелците платија 3,6 милиони евра за локацијата. Според информациите на „А1“, тие имаат намера да си заминат од земјава. Официјално не сакаат да ја коментираат ситуацијата.

Локалните власти уверуваат дека странците не се откажуваат од проектот тежок 100 милиони евра кој ќе почне да се гради по елиминирањето на недостатоците.

http://a1.com.mk/vesti/default.aspx?VestID=116982

A1 - Сунчица Николоска - 30.11.2009