Вести

Валентина Стојанчевска


Се води вистинска борба за зградата во која до пред неколку месеци беше сместена Амбасадата на САД, а реакциите се заострија по одлуката на Владата таму да се пресели Институтот за духовното наследство на Албанците. Најголем интерес за објектот, покрај Институтот, покажаа и Општина Карпош и Министерството за труд и за социјална политика. За оваа зграда се интересирале и МНР и МВР, како и англиски, француски и германски дипломати, кои барале да се отвори градинка за децата на странските службеници во земјава. - Во зградата каде што беше сместена американската амбасада ќе се пресели Институтот за духовно наследство на Албанците, а за тоа кој ќе се смести во другите простории на зградата, допрва ќе се решава - ни изјави Мартин Мартиновски, портпаролот на Владата.
Првите реакции и незадоволство пристигнаа од Стевче Јакимовски, градоначалник на општина Карпош, кој инсистираше објектот да се пренамени во градинка.
- Нонсенс е објект наменет за детска градинка, граден по сите асеизмички стандарди за децата да бидат безбедни, да биде пренаменет во Институт за духовно наследство на Албанците. Владата прави голем гаф што на ваков начин ја игнорираше Општина Карпош. Ова не е прва грешка на Владата, претходно ни го зеде и базенот „Карпош“ - вели Стевче Јакимовски, градоначалникот на општина Карпош. Тој вели дека итно ќе реагира на оваа одлуката на Владата бидејќи досега неколку пати до Општината биле поднесени иницијативи во Карпош да се отвори градинка зашто во овој објект имало градинка и пред да стане амбасада. Поранешната американска амбасада се наоѓа на улицата „Илинденска“ во скопската општина Карпош и е во сопственост на Владата, а со објектот стопанисува Министерството за труд и за социјална политика.
Од Институтот за духовно наследство на Албанците, кој досега се наоѓаше во Куршумли-ан во Старата скопска чаршија, веќе почнаа со преселувањето. Се очекува Институтот свечено да биде отворен во присуство на премиерот Никола Груевски, лидерот на ДУИ, Али Ахмети, амбасадорот на САД, Филип Рикер и други претставници на дипломатскиот кор. Институтот, сепак, нема да ги зафати сите простории. За вселување во другите простории во игра се Трудовата инспекција и прекршочните органи на Министерството за труд и за социјална политика, Пазарната инспекција и некои инспекциските органи при Министерството за здравство.
Инаку, објектот е речиси празен од мај, кога амбасадата на САД по привремен 14-годишен престој во него и официјално се пресели во новоизградениот комплекс на Кале.

Амбасадите, главно, кираџии

Најголем дел од странските амбасади во земјава се сместени во приватни куќи за кои плаќаат кирија, а сопствен објект досега си изградија само Соединетите Американски Држави. За изнајмувањето на просториите во кои е сместена администрацијата на одредена амбасада, странците плаќаат високи суми. Официјално, ниту една амбасада не сака да даде информација колку изнесува месечната кирија, но, неофицијално, цената се движи од 10.000 евра, па нагоре.