Брановите ги голтнаа плажите кај Лагадин

Се бара чаре за прекопите на улиците

На средбата на Координативното тело на скопските градоначалници договорено е решавање на повеќе градежни, комунални и административни проблеми

Одрон на земјиште и карпи зад Музејот - Робевци во Охрид

Кавадарци ќе прави урбан ред

Локалната власт на Кавадарци најавува средување на урбаниот хаос во градот, во кој во изминатите педесетина години нелегално се изградени многу куќи, но и згради на државни институции и производствени хали. Ваквата состојба ја потврди и градоначалникот Александар Панов. Тој вели дека некои од сопствениците на дивоградбите дури барале општината да им обезбеди и инфраструктура за нелегалните објекти.

- Наша заложба е со ниту една постапка локалната самоуправа да не го поттикнува дивото градење. Имајќи ја предвид економската криза на сите што едвај преживуваат, а имаат диви градби, им овозможувавме легализацијата да ја платат на рати. Вакво олеснување нема за тие што профитираат од нелегалните објекти - објаснува Панов.

Лани биле донесени 50 решенија за уривање, а било реализирано само едно. Но, и тоа уривање било насочено кон помалку вредните објекти како тераси, гаражи и тенди. Со тоа само се сакало да се покаже сериозноста дека нема да се толерираат дивоградби. Се најавува уривање таму каде што има екстремно нарушување на урбанизацијата.

Градоначалникот Панов откри дека цели населби, како тие на Тиквешкото Езеро и браната Моклиште, се со дивоизградени објекти. Бројот на дивоградбите е над 2.000. Постапката за легализирање ќе почне со населбите Брушани и Ново Брушани. Но, како што велат од локалната власт, имало и дивоградби што биле во зоната забранета за градење крај самото езеро и тоа ја усложнувало целата постапка.

Легализацијата или уривањето ќе го почекаат новиот Закон, кој треба да ја регулира ова проблематика. Додека се чекаат законските решенија, Панов тврди дека нема амнестија за никого од сопствениците на дивоградби. Тој тврди дека за дивоградбите нема партиски или каков било друг клуч при бележењето кои од нив треба да се уриваат.

- Мили ни се луѓето, мил ни е електоратот, но најмило ни е Кавадарци - е девизата на Панов.

Нему му е криво што некои од производствените објекти кои може да се легализираат мора да чекаат законски процедури.

- Со еден потег за легализација општината ќе добие 500.000 евра. Со тие пари Кавадарци ќе може да изгради инфраструктура. Да не зборуваме за тоа колку луѓе би можеле да се вработат во тие производствени хали. Ако погоните произведуваат, ќе имаат корист и граѓаните и општината - вели Панов.

Тој е дециден дека е против ново дивоградење и либерален за старите диви градби таму каде што постои можност за легализирање. Таму каде што немало можност ќе се урива, оти нема друго решение за тој што градел на место каде што е проектирана улица.

Светлана Дарудова

Забрзано се уредува Луда Мара

Роза Петкова


Екран поставен во центарот на градот ќе ни покажува колку штетни материи има во воздухот кој секојдневно го дишеме. Оваа активност е дел од програмата за работа на Секторот за заштита на животната средина, а Град Скопје наредниот месец ќе распише јавна набавка за уредот. Градските власти велат дека екранот ќе се монтира заедно со мерната станица и ќе дава податоци за присуството на азот, јаглерод диоксид, сулфур и на други отровни гасови во атмосферата. Истовремено ќе ја покажува и температурата, влажноста на воздухот, притисокот и брзината на движење на ветрот. Сите овие информации ќе може да се следат на видно поставени екрани и на веб-локаторот на Градот, а за нив ќе се потрошат пет милиони денари од буџетот или нешто повеќе од 80 илјади евра.
- Локацијата за станицата се уште не е точно утврдена, но една од посигурните е во паркот „Жена - борец“ - велат во Одделението за односи со јавноста. Сличен екран, кој покажува податоци за воздухот, освен оние за штетните материи, пред извесно време на истата локација постави и Управата за хидрометеоролошки работи, но тој ретко кога функционира или дава погрешни информации.
Покрај оваа, нова мерка со која Градот ќе ја штити природата е и поставувањето на обележувачи во парк-шумите кои се под негова надлежност. Откако се изгради половина Водно, а дивоградби никнаа и во Гази Баба, дури сега градските власти физички ќе ги исцртуваат границите на овие два локалитети, за да ги одвојат од урбанизираните делови. - Обележувањето на двата локалитети е за првпат физичко пренесување на границите од топографските карти. Обележувањето на граничните области во парк-шумите ќе се врши по целата граница. Подготовката за распишувањето на јавната набавка е во тек и истата треба да биде објавена идниот месец. Со неа ќе се утврди формата на обележувачите кои ќе бидат поставени, а потоа за нив ќе се грижат чуварските служби на јавното претпријатие „Паркови и зеленило“ - велат од Одделението. За оваа активност ќе се потрошат еден милион денари.
Исто така, Градот ќе даде предлог до Министерството да се прогласи еколошки коридор Водно-Сарај-Матка, како појас на заштитените локалитети на подрачјето на Скопје.
Меѓу другото, надлежните од Градот констатирале дека Скопје е прекумерно бучен, па затоа планираат да подготват и елаборат за влијанието на бучавата врз квалитетот на животната средина.
Задача на Секторот е да направи и годишно набљудување на површинските и на подземните води во скопскиот регион, пред се на изворот Рашче и на бунарското подрачје Нерези-Лепенец. Градот се уште не го реализирал проектот со кој треба да се регулира дел од коритото на Вардар, во близина на Рашче, за да не дојде до мешање на надојдените води на реката со изворските. „Во повеќе наврати водите на Вардар претставуваа многу сериозна закана за изворот „Рашче“ и со максимални залагања на вработените на ЈП „Водовод и канализација“ и АРМ, беше спречена можната еколошка катастрофа“, стои во програмата на Секторот. Иако е изработен главен проект за коритото на Вардар во должина од 5,5 километри, неговата реализација се планира по 2011 година.
Сите активности кои се вклучени во програмата на Секторот ќе чинат вкупно околу 80 милиони денари.

Ќе се вади азбестот

Градските власти дури годинава ќе почнат да го отстрануваат азбестот, а први ќе бидат некои од средните училишта. За реализирање на првата фаза ќе се потрошат 20 милиони денари, а изведувачот ќе се избира со јавна набавка и ќе мора да поседува сертификати за постапување на азбест.

Гробиштата ќе се прошират

Со измените на детаљниот план е овозможено гробиштата во Бутел да се прошируваат во фази, а за почеток нови гробни места ќе има на површина од 6,65 хектари

Градските гробишта „Бутел“ конечно ќе може да се прошират, со што ќе се реши проблемот со недостигот од нови гробни места, кој е изразен во последните години. Советот на Општина Бутел вчера ги усвои измените на детаљниот урбанистички план за гробиштата, со кои е предвидено проширувањето да се одвива во фази. Станува збор за површина од 6,65 хектари, десно од улицата Лазо Трповски, веднаш кај старите гробишта.

Според Слободан Невенов, раководител на Секторот за урбанизам во Општина Бутел, ова се прави по барање на Градот Скопје и по иницијатива на претпријатието за погреби и придружни активности, АД „Бутел“, поради ургентната потреба од нови гробни места.

- Постапката за подготвување на овој урбанистички план е почната по барање на АД „Бутел“ и на Градот. Инаку, веќе постои детален план на гробиштата со површина од 28 хектари, која го опфаќа просторот спроти капелата, минува покрај големиот паркинг и излегува на големиот пат за Чучер-Сандево. Но, поради тоа што се јавуваат нерешени имотно-правни односи, односно има сопственици на дел од земјиштето како резултат на денационализација, решивме тој план да се реализира во три фази. Ова е првата, почетна фаза, со која ќе се даде можност за побрзо проширување на градските гробишта - вели Невенов.

Невенов вели дека почнале со овој дел со површина од 6,65 хектари, бидејќи за него веќе се познати сопствениците на одредени парцели, а во другите делови на земјиштето се' уште тече постапката за денационализација.

Според Драган Гроздановски, претседател на Управниот одбор на АД „Бутел“, со проширувањето на гробиштата на површина од 6,65 хектари ќе се реши проблемот со гробни места за наредните пет години, а со вкупното проширување од 28 хектари проблемот со гробните места ќе биде решен за 25 до 30 години.

Гроздановски тврди дека со проширувањето нема да има потреба за изградба на нова инфраструктура, бидејќи ќе се користи постојната.

- На само 100 метри од новиот дел на гробиштата се наоѓа старата инфраструктура. Таму се капелите и ладилниците што ќе се користат и за новиот дел. Нема да биде проблем ниту спроведувањето вода, бидејќи водоводни цевки веќе постојат за старите гробишта. Единствено што ќе треба да се направи, ќе биде оградата и уличките, односно патеките меѓу гробните места и пристапните патишта - вели Гроздановски.

Тој додава дека Градот Скопје ќе треба да биде главниот инвеститор за уредување на просторот, пред се на изградбата на пристапните улици, но истакна дека и АД „Бутел“ ќе даде свој придонес.

- Можеби ние како претпријатие ќе ја финансираме оградата, а ќе помогнеме и во некои други работи. Сепак треба да седнеме на маса со градските власти и детаљно да се договориме за сето тоа - смета Гроздановски.

Од Градот се' уште немаат прецизни податоци за начинот на уредување на новите гробишта во Бутел.

- За тоа ќе се размислува дополнително. Сега првично се усвоени само измените на ДУП „Гробишта Бутел, нов дел, прва фаза“. Потоа, треба да се изработи проект, за да се види како сето тоа би изгледало - вели Неделчо Крстевски, портпарол во Градот Скопје.

Наскоро ќе се прошируваат и гробиштата во Камник и во Ѓорче Петров. За Камник градските власти информираат дека се откупени пет хектари земјиште, а набрзо ќе бидат откупени уште пет, додека во Ѓорче Петров купувањето нови парцели е при крај.