Зоолошки градини во Македонија

Мунгоси и муфлони во скопската ЗОО

Најновите жители се подарок од Белград. Сите се сместени во нови живеалишта

Зоолошката градина предновогодишно се поднови со нови животни. Како подарок од белградската ЗОО, нови жители се два мунгоса, два муфлона и по еден црн лебед и бел питон. Сите, освен питонот, се сместени во нови живеалишта, а за питонот, кој е прв од ваков тип досега кај нас, наскоро ќе биде завршен новиот терариум. Од Зоолошката најавуваат дека очекуваат уште една тура нови животни. Овој пат, станува збор за подарок од софиската Зоолошка.

„Наскоро треба да ни стасаат крокодил, анаконда и боа. И тие ќе бидат сместени во нови живеалишта. Нови животни, веќе договорени донации, имаме и од Барселона и нив ги очекуваме најдоцна до март. Станува збор за 11 пигмејски мајмуни, многу ретки и ексклузивни видови“, вели Дане Кузмановски, директор на ЗОО.

Тој информира дека речиси е договорено напролет како подарок од градината од Берлин во Скопје да стасаат една камила и два бизона, а со зоолошките од Хановер и од Острава се преговара за донација гепарди.

Инаку, освен збогатување на животинскиот фонд, надлежните од ЗОО паралелно работат и на завршување на неколку живеалишта. Во завршна фаза е изградбата на новиот терариум, а се работи и новото живеалиште за Коко, кој е најавено дека ќе се врати од ресоцијализацијата од Холандија напролет.

Од Зоолошка информираат дека од неодамна ја продолжиле акцијата за посвојување животни. Обезбедување средства за исхрана на животното во период од една година е единствениот критериум што треба да го исполни заинтересираниот посвојувач, независно дали станува збор за физичко или за правно лице. (Дс.Т.)

http://www.utrinskivesnik.com.mk/default-mk.asp?ItemID=5ABFF81202063C418BC4832F8878B644