Воен авион „ќе слета“ на кејот во Аеродром

Идејата за изградба на „Централ парк“ се оправдува со симболиката на името на општината

Школка од авион што била дел од Првата или од Втората светска војна поставена на осветлена импровизирана писта долга стотина метри, ќе го краси кејот во Аеродром, во правец од мостот „Близнак“ кон Ново Лисиче. Импровизираното аеродромско катче ќе биде осветлено со канделабри, а ќе го разубавува и урбана опрема. За реализација на оваа идеја во општина Аеродром веќе интензивно се работи. Постои готов проект за чија изведба во јануари општината ќе распише тендер за изведувач. Во меѓувреме, општинарите веќе постигнале и устен договор со Министерството за одбрана за обезбедување на авионската школка.

Изградбата на ова несекојдневно катче градоначалникот Ивица Коневски ја правда со симболиката на општината некогаш и сега.

„Речиси сите знаат дека некогаш во овој реон постоел аеродром, а и општината денеска го носи токму тоа име, па оттука и идејата за изградба на ваков симболичен парк, кој ќе се вика ‘Централ парк‘. Изградбата очекуваме да започне до пролет и веќе до крајот на наредната година тој да стане собиралиште за одмор и рекреација“, вели Коневски.

Пистата, која странично ќе биде осветлена, а поплочена со бехатон-плочи ќе биде долга стотина метри и ќе служи како шеталиште. Во околината ќе се засади зеленило, кое ќе се наводнува со современ електричен систем за наводнување. Според Коневски, со изградбата на ова катче не само што општината ќе добие уште едно рекреативно собиралиште туку и сегашната локација, која е дива депонија, ќе стане минато.

За реализација на овој проект, во буџетот општината има планирано 40 милиони денари. (Дс.Т.)

„АЕРОДРОМ“ – НОВ ПАРК СО ИМПРОВИЗИРАНА ПИСТА И АВИОН

27.01.2011 11:00

На денешната прес-конференција, 27.1.2011 година, градоначалникот на Општина Аеродром, Ивица Коневски, соопшти дека е распишан тендер за изградба на нов голем зелен парк „Аеродром" покрај кејот на реката Вардар во Ново Лисиче во близина на мостот „Близнак".

Според проектот, паркот ќе се простира на 35.000 квадратни метри со богати содржини, меѓу кои 2 детски игралишта со лулашки, тобогани, клацкалки и други рек­ви­зи­ти за игра, плато и бина за одржување разни манифестации, маси и клупи во зеленилото, клупи за седење по патеките, 5 чешми за пиење вода, голем број пешачки патеки, осветлување со канделабри низ целиот парк, канти за отпадоци и друга урбана опрема.

„Новиот парк очекуваме дека ќе донесе трикратен бенефит", изјави градоначалникот Коневски.

Прво, како што рече тој, граѓаните ќе добијат ново зелено катче за одмор и рекреација, а Аеродром уште еднаш ќе го потврди атрибутот на најзелена општина, што го носи поради фактот што во неа има 28 квадратни метри блоковско зеленило по глава на жител, во споредба со европскиот проектантски стандард од 8,5 квадратни метри по глава на жител.

Второ, со паркот ќе се облагороди овој со години наназад запуштен простор, ќе им се оневозможи на несовесните граѓани да го користат како дива депонија и ќе се спречат пожарите што повремено се случуваа по­ра­ди сувата трева.

И трето, но не помалку важно, нашата општина конечно ќе добие препознатливо место и симбол што ќе асоцира на аеродром. А, тоа е школката од авион што ќе биде поставена во централниот дел на паркот на импровизирана осветлена писта во должина од стотина метри. Речиси сите знаат дека некогаш во овој реон постоел аеродром, а и општината денеска го носи токму тоа име, од каде што, всушност, потекна и идејата за изградба на ваков симболичен парк.

Инаку, зеленило ќе се наводнува со автоматски систем за наводнување, а кон паркот ќе се пристапува преку 6 влеза, односно 2 од страната на булеварот „АСНОМ", а 4 од велосипедската патека на кејот. За посетителите на ова несекојдневно катче, пак, ќе се изгради и паркиралиште.