Спoменик нa плoштaд Maкедoнијa

Фонтаната ќе се гради в година и заедно со споменикот ќе чини 4,5 милиони евра

Сања Наумовска


Фонтаната на плоштадот „Македонија“ ќе се гради идната година, а според најавите од градоначалникот на Центар, Владимир Тодоровиќ, ќе биде завршена за шест месеци. Засега не се соопштува нејзиниот конечен изглед. Градоначалникот Тодоровиќ досега неколкупати нагласуваше дека сликите што се појавија во медиумите не ја претставуваат вистинската слика на фонтаната. Засега во Општината не кажуваат ниедна официјална информација, иако неофицијално, по новогодишните празници се подготвува 3-Д анимација со која фонтаната ќе и' биде претставена на јавноста.

Според плановите, фонтаната ќе биде поставена во зелениот круг на плоштадот, а во неа за две години ќе се постави и споменикот на Александар Македонски. „Утрински весник“ дознава дека фонтаната ќе биде кружна, со дијаметар од 30 метри, а ќе почнува со скалила по кои ќе може посетителите од неколку страни да се качуваат и да дојдат до ѕидот на постаментот. Од скалите, како и преку пристапната рампа, ќе се доаѓа до пешачка патека околу фонтаната што ќе биде 60 сантиметри над нивото на плоштадот. Фонтаната ќе биде изработена од бел масивен мермер, а на дното ќе има мозаик со антички мотиви.

На скалилата околу постаментот треба да се постават лавовите што ќе бидат изработени од бронза. Веројатно ќе има вкупно осум лава, четири на секоја страна од фонтаната што ќе гледаат кон посетителите, а другите четири ќе бидат свртени кон фонтаната и од нивните усти ќе тече вода во фонтаната со посебен визуелен ефект.

Во средината ќе се постави и столбот на кој треба да стои споменикот на Александар Македонски на коњ. Столбот, заедно со споменикот, треба да биде висок 22 метра, од кои 12 метри е само споменикот. Околу столбот ќе се постават војниците на Александар. Планирано е да има осум, поточно седум, а осмиот е кралот Филип, таткото на Александар. И војниците, кои ќе бидат високи три метри, ќе се изработуваат во бронза. Столбот треба да се изработи со наизменични богати релјефни прстени направени од мермер и од бронза.

Целиот проект ќе чини 4,5 милиони евра. Изведувач на градежните работи ќе биде претпријатието „Бетон“ кое, пак, има ангажирано подизведувачи од Италија што ќе работат на монтирање на елементите од бронза, што се леат во Италија. Подизведувачите ќе ги прават и светлосните и водените ефекти на фонтаната.

Според градоначалникот Владимир Тодоровиќ, за време на изградбата на фонтаната механизацијата на плоштадот „Македонија“ ќе влегува по улицата покрај паркингот на „Телеком“, а околу 30 отсто од површината на плоштадот ќе биде заградена во функција на градилиштето.