Железници (општо)

ЖЕЛЕЗНИЧКИОТ СИСТЕМ ТРГНУВА ВО ЛИБЕРАЛИЗАЦИЈА

Државните возови никакви, со приватни до поголем профит

Со новите законски прописи се предвидува приватни возови да возат по пругите за што на претпријатието МЖ - Инфраструктура ќе му плаќаат соодветен надоместок. Се очекува најголем интерес да има за вложувања во товарниот транспорт

Делови од железничкиот систем во државава ќе се приватизираат со цел да се овозможи приватни возови да се движат по нашите пруги кои би се издавале под концесија. Ова се предвидува со предлог-законот за железнички систем кој веќе влезе во собраниска процедура, а со неговото профункционирање треба да овозможи влез на конкуренција во железничкото транспортно претпријатие кое произлезе од поделбата на ЈП Македонски железници пред две-три години.

Со законот се предлага до 2012 година од државниот буџет да се обезбедат средства за негово спроведување, при што 11,8 милиони евра се предвидуваат за реконструкција, ремонт, одржување и заштита на железничката инфраструктура, а околу 4,7 милиони евра ќе бидат наменети за компензација на услуги од јавен интерес во железничкиот превоз на патници. Со предлог-законот се предвидува издавање на дозволи за вршење јавен железнички превоз, како и за управување со железничка инфраструктура, издавање сертификат за сигурност и одобрение за сигурност, а и одредување на право на пристап до железничка инфраструктура во меѓународниот и внатрешниот превоз.

Со новите законски прописи се предвидува приватни возови да возат по пругите за што на претпријатието МЖ - Инфраструктура ќе му плаќаат соодветен надоместок. Се очекува најголем интерес да има за вложувања во товарниот железнички транспорт, и тоа особено од компаниите од металскиот индустриски комплекс. Неодамна во јавноста се појавија неофицијални информации за заинтересираност за вклучување со свои вложувања во железничкиот транспорт на Макстил и Фершпед, кои ги користат услугите или учествуваат во организацијата на транспортот со железницата. Што се однесува за железничкиот превоз на патници, тој, како нерентабилен, по се изгледа и натаму ќе мора да се субвенционира од државата, поради малите приходи што ги носи, а големите трошоци што се јавуваат при неговата реализација.
-Ако некој приватен превозник е заинтересиран и за патнички сообраќај и ако понуди подобри услови од сегашните, тогаш ќе може да добие дозвола и за вршење таков превоз - стои во образложението на предлог-законот.

Во врска со овој зафат, беше изработена посебна Студија за приватизација на идното АД МЖ Транспорт, за која средствата за подготовка беа обезбедени од финансиската помош на Светската банка, од која во септември 2005 година МЖ зеде заем од 15 милиони евра за реформи во железницата, кој треба да се врати до 2022 година.