Мост на цивилизациите во Македонија (Мост Око)

 

„Окото“ ќе биде најголема атракција

Мостот ќе чини 1,5 милион евра, а треба да биде изграден за 18 месеци

Почна да се гради пешачкиот мост „Око“ на стотина метри од Камениот мост, кој ќе ги спојува Кејот 13 Ноември и новата зграда на Уставниот суд, која е во изградба. Темелите ги поставија премиерот Никола Груевски и градоначалниците на Скопје и Центар, Коце Трајановски и Владимир Тодоровиќ, спроти Денот на независноста - 8 Септември.

Премиерот истакна дека всушност се гради идната туристичка атракција во Скопје.

- Имам големо задоволство да го поздравам ова исклучително интересно инфраструктурно обележје и симбол на општина Центар и на нашата метропола Скопје. Замислата е мостот да има стаклен под, преку кој ќе се гледаат водите на реката Вардар, а истиот ќе биде збогатен и со водено-светлосни ефекти, кои ќе се добијат со изградба на фонтаната во неговата основа. Се работи за креативна замисла и се надевам дека мостот ќе претставува туристичка атракција и мамка на секој посетител, гордост за скопјани и гордост за секој што учествувал овој проект - рече премиерот Груевски.

Градоначалникот Тодоровиќ истакна дека мостот ќе се гради со општински пари, ќе биде готов за 18 месеци и ќе чини 92 милиона денари (1,5 милион евра).

- Се работи за специфична задача, која треба да ги обедини и редефинира историскиот идентитет и традицијата во централното градско подрачје, во која би се внеле нови идеи и содржини. Цел на вака проектираниот мост е да го зачува за сегашните, но и за идните генерации историскиот контекст на овој простор, кој истовремено ќе даде и ново обележје на Скопје. Во подалечното минато поврзувањето на левата и десната страна на реката Вардар се вршело исклучиво со Камениот мост. И овој пешачки мост е обид да им се обезбеди на сегашните и идните генерации уште една современа комуникација за брзо и ефикасно поврзување на двата брега - истакна Тодоровиќ.

Надлежните во Општина Центар објаснуваат дека новиот пешачки мост со архитектонско-уметничкиот изглед треба да се вклопи во постојната околина, но и да даде печат на денешното време.

На мостот е предвидено да се постават клупи за седење и фонтана со проѕирни делови. Објектот е креиран со три распони. Двата крајни распона се со помали димензии од 18 до 20 метри, за разлика од средниот, кој е поголем, со широчина од 56 метри. Средните столбови ќе бидат поставени на самиот крај на речното корито. Горната површина на мостот ќе биде шеталиште со гранитни плочки. Во средниот распон се предвидени два поголеми отвора во мостот и шест помали отвори на потесниот дел, кои треба да се пополнат со градежно слоевито проодно стакло. На крајните рабови ќе има мермерна ограда. Мостот ќе биде потполно осветлен во согласност со современите светски решенија за ваков тип објекти.

Градежните работи ќе ги изведе фирмата „Конструктор“ од Сплит.