Споменици и скулптури (општо)

Лавовите доаѓаат во блиндирани возила 

Општина Центар бара магацин кој ќе биде обезбедуван 24 часа

Деспина Трајковска


Нова тура споменици од „Скопје 2014“ ќе пристигне летово и тоа во блиндирани возила. Кои, колку и кога ќе стаса пратката од Фиренца, општинарите од Центар, како и досега, не откриваат. Неофицијално, овој пат, меѓу другите, ќе бидат транспортирани и преостанатите два лава од четирите што треба да се постават на мостот „Гоце Делчев“.

Иако од Општината и вчера штуро информираа за активностите врзани за спомениците тешки десетици милиони евра, дознаваме дека општинарите се во потрага по магацин во кој би ги складирале спомениците, а бараат и услуги за да реализираат меѓународен транспорт. Понудите, според процените, треба да финишираат најдоцна до средината на идниот месец. Надлежните не појаснуваат зошто им се потребни магацинот и услугата за транспорт, иако е повеќе од очигледно. Единствено велат дека изнајмувањето на магацинот е за складирање на моделите на скулптури. Во тајност ја држат и локацијата каде ги чуваа веќе поставените и се' уште не промовирани споменици, а не сакаат да ја откријат ни сумата која ја плаќаат за користење на просторот.

„Во магацините се складираат вратените модели. Во одредени случаи магацинот ќе се користи и за мали подготовки на спомениците. Во повеќето земји локалната самоуправа или Владата кога нарачуваат споменик, моделите ги чуваат во магацин. Како и досега, ќе бидете навремено информирани за пристигнувањето на спомениците и нивното поставување“, беше одговорот од кабинетот на градоначалникот Владимир Тодоровиќ на прашањето за јавните набавки и предвидената динамика за транспорт и поставување на преостанатите споменици од „Скопје 2014“.

Инаку, еден од условите што ги бара Општината за најмување магацин е тој да е оддалечен најмногу 5 километри од Скопје, да биде тврда градба, сигурноста на објектот да е загарантирана 24 часа и да обезбедува природна вентилација со заштитени отвори. Истовремено, еден од главните критериуми е објектот да е со површина од 600 квадрати во еден или, пак, поделен на два дела, широк 10, а висок 8 метри. Влезната врата на магацинот треба да овозможи пристап на натоварен виљушкар, односно таа да биде висока 7 метри и широка 3 метри. Параметри кои укажуваат дека, дефинитивно, во магацинот ќе се складираат споменици. Во јавната набавка, пак, за меѓународен транспорт, општинарите бараат транспорт по копнен пат во блиндирани возила.

И Јулија Тертила стаса за леење

Се бара леарница за 29 скулптури предвидени да го чуваат мостот „Око“

Деспина Трајковска


Општина Центар на дневен ред за леење ги стави скулптурите што се предвидени да се постават на мостот „Око“ иако е очигледно дека тие ќе можат да го „чуваат“ објектот дури за две години. Тогаш се очекува да биде изграден пешачкиот премин на Вардар, а во меѓувреме ќе треба да стане и „легална“ последната верзија на урбанистичкиот план „Мал ринг“ за да не бидат спорни скулптурите. Независно од тоа, Општината веќе бара леарница за нивно леење.

Општинарите велат дека јавниот повик за избор на леарница се однесува на 28 скулптури иако вкупно 29 се предвидени да се распоредат на „Око“. Всушност, виси леењето на пајонската свештеничка, која е предвидено да биде централната скулптура. Од Општината вчера не знаеја да објаснат зошто и таа не е дел од јавната набавка.

„Тендерот не се однесува на споменици, туку на уметнички скулптури, вкупно 28. Мотивите ќе бидат тематски ликови, избрани според условите на конкурсот за идејно решение. Скулптурите ќе бидат на историски личности за чие постоење и дејствување на нашите простори постојат потврдени археолошки наоди“, одговорија од Општината.

Избраната леарница ќе има обврска сите скулптури да ги излее во бронза со висина по два метра. На листата за леење се ликови од подалечната македонска историја, благородници, свештеници, кралеви меѓу нив и борецот за права Јулија Тертила, за која генерално пошироката јавност нема сознанија. Распоредени од двете страни на мостот, по 14 скулптури ќе се наоѓаат и ликовите на последниот македонски крал Персеј, на охридскиот архиепископ Прохор Доротеј, на сликарите иконописци Михаил и Евгениј, зографот Јован...

Инаку, неизвесно е дали леењето на оваа тура скулптури ќе се финансира со парите коишто наскоро ќе се префрлат на општинската сметка, трансферирани од Министерството за култура. Имено, нови 6,6 милиони евра Владата ќе и' префрли на Општината за намена „култура“ со што автоматски досега речиси 13 милиони евра државни пари се дадени на општинарите за да се реализира дел од „Скопје 2014“.