ПАТНИЦИТЕ СЕ ЖАЛАТ

ЈСП нe принудува на турбофолк

Во новите автобуси на ЈСП „Скопје“ ечи српски турбофолк иако надлежните ветија попристојна музика, се жалат патниците. Нервозни скопјани реагираат дека во попладневните часови, кога уморни се враќаат дома, наместо во мир да патуваат во новите тивки и удобни автобуси, доживуваат терор врз сетилото за слух. Бараат барем музиката да биде потивка.

ЈСП пред една и пол година вети дека во автобусите ќе се пушта одбрана поп, рок, електронска, диско и класична музика и едно време одлуката се почитуваше, но потоа изборот што ќе слушаат стотина луѓе во едно возило повторно се сведе на вкусот на возачот.

- Понекогаш не се поднесува музичката атмосфера во автобусот. Во некои денови, веројатно во зависност од тоа кој вози, на патниците им е пуштено „Фолк радио“ и музиката е буквално неподнослива. Во ЈСП треба да сфатат дека српскиот турбофолк е специфична музика, дали и воопшто може да се нарече музика, и не може да ја слуша секој, исто како што не може секој да слуша хеви метал. Се изнаслушав бесмислени стихови и гласни завивачки рефрени и тоа во моменти кога се враќам дома уморна од работа. Еднаш ме заболе главата и се симнав да чекам нов автобус. Така не се привлекуваат патници во јавниот превоз. Музиката мора да биде општоприфатлива и ненаметлива - вели скопјанката Христина Симоновска од Ново Село. 

Таа додава дека ако ЈСП сака да пушта фолк-музика, нека направи избор од македонскиот опус, а не да се форсира српското. 

Од Јавното претпријатие велат дека последниве месеци се пофлексибилни во однос на музиката во автобусите.

- Не се постигнаа резултати со присилното наметнување одреден вид музика. Луѓето сакаат различни жанрови. Наша препорака и понатаму останува да се пушта музиката од УСБ-стиковите што им беа поделени на возачите. Ние работиме на барање на граѓаните, а добивме поплаки од нив и решивме музичкиот избор да се прави во договор меѓу возачите и патниците. Може да се пушта и радио, но да биде тивко за да не се вознемируваат патниците - вели Мишо Николов, директор на ЈСП.

Тој вели дека на нивната веб-страница добиле десетина поплаки од граѓани што сакале да слушаат македонска народна музика.

- Не може секој да биде задоволен - додава Николов. 

Тој потенцира дека на почетокот биле ригорозни околу музиката и инсистирале да се почитува одлуката за строг избор. Kонтролорите проверувале и што се пушта во возилата, а некои возачи биле казнети. 

Во октомври 2011 година беше договорено каква музика ќе се пушта во автобусите и таа се почитуваше во сите возила. Наутро се пушташе помирна, класична музика бидејќи во тој период се возат постари патници, а напладне одеше подинамична музика, со актуелни домашни и светски хитови. Попладне повторно се пушташе порелаксирачка музика, а навечер, кога автобусите ги користат повеќе млади луѓе, се пушташе електронска музика. Kако причина за таквата одлука директорот Николов ги наведе поплаките од граѓаните дека возачите, од рано утро, ги дразнат со турбофолк. (А.П.)