Новогодишно украсување

Скопје за Нова година во црвено-бел филм

Фирмата „Линк медиа плус“, која ги набави панцирите за МВР во вредност од 700.000 евра, го доби и огласот за украсување на центарот на градот во вредност од 93.000 евра

Градските власти годинава ќе потрошат 93.000 евра за новогодишното украсување на главните улици, булевари, плоштадот и на други локации во центарот на Скопје. Конкурсот за украсувањето го доби фирмата „Линк медиа плус“, која ја избрале на јавен оглас, кој беше распишан во септември. Оваа фирма го украсуваше градот и лани, но, сепак, повеќе се „прослави“ како фирма што ја изврши набавката на маици и панцири за Министерството за внатрешни работи во вредност од околу 700.000 евра.

Од Градот велат дека нема ништо спорно при изборот на „Линк медиа плус“.

- Фирмата е избрана на јавен повик, бидејќи даде најповолна понуда. Постапката беше регуларна, се јавија неколку фирми, но се решивме за оваа имајќи ги предвид најповолните услови - изјавија од одделението за односи со јавноста во Градот Скопје.

Според информациите од Бирото за јавни набавки, фирмата „Линк медиа плус“ изминативе години била ангажирана и за поставување табли за хоризонтална и вертикална сигнализација во Гази Баба, договор вреден околу 46.000 евра. За државните институции набавувале и униформи за вработените на аеродромите во Скопје и во Охрид за околу 38.000 евра, како и брендиран материјал за Секретаријатот за европски прашања од 26.000 евра.

Од Градот се' уште не ги соопштуваат имињата на ѕвездите што ќе ги забавуваат скопјани. Хрватските медиуми објавија дека на централната прослава ќе настапи познатиот пејач Џибони, но нема официјална потврда. Сите ѕвезди ќе бидат обелоденети откако операторот „Уан“, кој ја организира прославата, ќе потпише конечни договори.

За разлика од лани, кога градот блескаше во виолетова боја, годинава доминантни бои на плоштадот Македонија и околните улици ќе бидат црвената и белата. Во средишниот дел на плоштадот ќе биде поставена елка висока 21 метар.

- Украсувањето на улиците делумно ќе биде финансирано од телекомуникацискиот оператор „Уан“ за да се обезбеди уште посвечен новогодишен изглед. На плоштадот Македонија ќе блесне ѕвездено небо, а „Уан“ ќе обезбеди светилки во бела и во црвена боја, кои бидат поставени на елката. Круна на прославата на новогодишната ноќ ќе биде огнометот, кој ќе трае шест и пол минути - информираат градските власти.

Новогодишната прослава ќе трае четири дена. Забавата за скопјани ќе се одвива на повеќе локации во градот, со настапи на познати музички имиња од Македонија, Хрватска и од Словенија.

Освен плоштадот, со светилки и украси ќе блеснат и Паркот на жената-борец, булеварите Партизански одреди и Климент Охридски, како и Трговскиот центар „Мавровка“, Универзитетската библиотека „Свети Климент Охридски“ и делови од Стара чаршија. Низ центарот на градот, канделабрите ќе бидат обвиткани со светлосни црева, а ќе се украсуваат и жардиниерите.

Јорданка Ивановска