Роза Петкова

Велосипедите што со месеци стојат пред зградата на „Македонски телеком“ ќе почне да ги изнајмува јавното претпријатие „Градски паркинг“, а проектот, конечно, би требало да почне од идниот месец. Оттаму велат дека деновиве, заедно со невладината организација „Екосвест“, која подолго време го најавува проектот, го разработуваат концептот како ќе функционира изнајмувањето. Намерата е велосипедите да можат да се подигаат од едно паркиралиште со кое стопанисува претпријатието и да се враќаат на друго. - На пример, еден граѓанин ќе може да си изнајми велосипед во Центар, па со него да стигне до Аеродром и таму да го врати во некое од нашите паркиралишта. Сметаме дека ние сме најадекватни во моментов за да стопанисуваме со паркиралиштата за велосипеди и затоа се вклучуваме во проектот - вели Панче Стојановски, директор на „Градски паркинг“. Тој објаснува дека работата ќе ја вршат сегашните вработени во претпријатието и затоа нема да имаат дополнителни трошоци. - По еден вработен од секое паркиралиште ќе се грижи за велосипедите, ќе внимава во каква состојба се земаат и како се враќаат. Инаку, ако проектот бараше нови вработувања, ќе беше прескап - смета Стојановски. Скопјани ќе можат да се повозат за десет денари од час, иако цената не е фиксна и може да се промени. Граѓаните ќе треба да покажат лична карта и да потпишат изјава дека ќе одговараат во случај да го оштетат велосипедот. Исто така, се разгледува и варијантата да се наплатува само паркирање автомобил, а потоа граѓанинот бесплатно да си изнајми велосипед, а со тоа во претпријатието очекуваат да го поттикнат користењето еколошки превозни средства. Од „Екосвест“ велат дека во разговорите е вклучена и фирмата „Некст сенс“, која го работеше зонското паркирање, па се разгледува можноста и за велосипедите да се плаќа преку СМС. За почеток, проектот ќе почне од пунктот кај „Македонски телеком“, каде што презимија педесетина велосипеди, донација од Глобалниот еколошки фонд. Иако невладината организација најавуваше дека ќе ги поттикнуваат скопјани велосипедите да ги користат и на снег, тоа не се случи. Велосипедите останаа на отворено цела зима, покриени само со стреа и со најлон. Од „Екосвест“ велат дека тоа не е по нивна вина затоа што договорот за донацијата од ГЕФ истекол лани, но тие како ентузијасти не се откажале од проектот и ќе го туркаат се додека не се оствари. - За жал, велосипедите останаа надвор затоа што проектот технички ни заврши во септември. Но, продолживме да работиме на него и преговараме со Град Скопје, како единствена институција која може да го организира јавниот превоз и со „Градски паркинг“ - вели Јулијана Даскалов, координаторка на проектот од невладината организација. Понатаму се планира да се продолжи со пунктови кај поранешна „Нова Македонија“ и кај „Треска“ и на два пункта во Аеродром.

Пумпата ги избрка велосипедите од Карпош


Од „Градски паркинг“ велат дека ќе го вклучат и пунктот во општина Карпош кој лани беше отворен во дворот на општинските бараки, а сега веќе не постои затоа што на неговото место се гради бензинска пумпа. Тој ќе се префрли кај „Лептокарија“, на паркиралиштето што претпријатието планира да го стопанисува. Од Општината не знаеја да ни кажат дали некој ги користи 30. велосипеди, а на прашањето што се случува сега со нив, ни рекоа дека најверојатно се сместени во месните заедници.