Завршен проектот за трамвајот, изградбата стартува во март

Проектот од завчера е на ревизија, а Градот го подготвува тендерот за изведувач

По едномесечно задоцнување, градските власти минатата недела го добија проектот за трамвајот. И тоа не само неговата прва фаза, која се однесува на депото, туку и вториот дел, кој претставува проектно решение за изградба на првите три километри од делницата. Комплетниот проект од завчера го разгледуваат ревизорите од шпанската „Идом инженерија“. Од Градот објаснуваат дека македонско-италијанско-бугарскиот конзорциум, кој го работи проектот, го испочитувал пролонгираниот рок за доставување, истовремено изработувајќи ја и втората фаза од проектот, којашто на Градот требаше да му биде доставена за еден месец.

„Сега, покрај за депото, го добивме и делот за изградба на првите три километри од делницата. Ревизорите веќе го разгледуваат материјалот и за десетина дена ќе го дадат своето мислење. Ние истовремено работиме на подготовка на тендерот за избор на изведувач, кој ќе биде објавен кога Советот ќе даде зелено светло за изградба на шинскиот систем, одлука што ќе биде доставена пред советниците на седницата закажана на 28 јануари“, велат од Градот чии математики укажуваат дека по неколкуте пролонгирани рокови за старт на проектот на терен, сега се очекува првата лопата да биде фрлена кон крајот на март.

Трамвајското депо, како прв чекор во реализација на трамвајскиот систем во Скопје, ќе се гради на местото на недовршениот автобуски терминал во населбата Ново Лисиче. Тоа ќе се протега на површина од 13.000 квадратни метри и ќе се гради фазно. Освен простор за сервисирање и гаражирање на трамваите, во него ќе биде сместена и контролна соба за сигнализација и нивно управување. Првата фаза од проектот предвидува и изградба на првата трамвајска делница во должина од девет километри, која ќе води од Ново Лисиче до Центар. Во годинашниот буџет Градот има издвоено 7,5 милиони евра за трамвајскиот систем. (Дс.Т.)

Костовски објави тендер за трамвај

Роза Петкова

Со набавка на пет трамвајски возила и изградба на едно депо и 12-километарска траса, градските власти планираат да го почнат проектот за воведување на трамвајот како ново јавно превозно средство во Скопје. Меѓународниот конкурс на кој ќе се пријавуваат заинтересираните инвеститори, објавен кон крајот на јануари, ќе трае до 24 март кога е закажано отворање на понудите. Во тендерот се бара изведувач кој ќе има обврска да изгради депо кое ќе вклучува административна зграда со менаџерски центар, работилница, хала за миење на возилата, посебен дел за гаража за 40 возила и дополнителна гаража за шест возила. Исто така, се предвидува и изградба на единична трамвајска линија во должина од 12 километри, која ќе биде физички одделена од другите сообраќајни правци на патот, како и набавка на пет стопроцентно нископодни возила со должина до 33 метри. - Досега има неколку заинтересирани фирми што имаа можност да подигнат тендерска документација - велат во Град Скопје. Понудувачите ќе треба да достават обемна документација, од финансиски извештаи до изјави и потврди од релевантни органи дека против нив нема правосилни пресуди за криминално дело. Се бараат и потврди дека фирмата не е во банкрот, дека не е отворена постапка за нејзина ликвидација, дека плаќала даноци, придонеси и други јавни давачки, како и извештаи од ревизорски куќи и позитивен финансиски резултат реализиран во секоја од последните три години. Фирмата-кандидат би требало да има годишен приход од најмалку 80 милиони евра за завршени ангажмани во областа која е предмет на распишаниот тендер и приход од 36.000.000 евра за испорака на добра. Понудувачот треба да поднесе и листа со ангажманите кои ги завршил, оценки за нив и дали ги завршил навреме. Понатаму се бара информација за квалификациите на професионалниот кадар на фирмата, а во тимот мора да има барем еден проект-координатор кој ќе биде дипломиран инженер со минимум 20 години искуство и три инженери со десет години искуство. Понудувачот би требало да има изградено барем едно трамвајско депо во последните пет години, слично по големина со тоа кое се бара во огласот, да изградил најмалку 30-километарска трамвајска траса или подземна линија за истиот период. Од него се бара да изградил и испорачал најмалку 50 единици на нископодни трамвајски возила и да поседува пет потврди за нивна квалитетна и навремена испорака. Откако го објави конкурсот, Државната комисија за спречување корупција побара од Град Скопје да ја преиспита јавната набавка бидејќи се одвива во период непосредно пред локалните избори кога не се почнувале нови капитални проекти. Од Градот велат дека набавката е објавена според законските прописи и нема да ја повлечат. Инаку, градските власти имаа подготвена одлука за почнување со проектот за трамвај, која требаше да се најде пред советниците на Градот на последната седница, но ја повлекоа за, како што рекоа, доработка и дополнителни консултации.