Економски: Две клучни инветсиции во МЖ АД Транспорт треба да го подигнат нивото на квалитет на компанијата, една од нив е набавката на товарните вагони. До каде е процесот за набавака, колку би чинеле тие и дали со нив ќе се задоволат потребите на домашните компании?

Деркоски: Процесот за набавка на нови 150 товарни вагони е во претпоследна фаза. Имено на 10 септември 2013 година беше крајниот рок за поднесување на понуди од страна на заинтересираните производители на товарни вагони при што задоволителен број од осум компании поднесоа понуди. Сега следува процес на евалвација на понудите согласно критериумите наведени во тендерската документација и согласно правилата на ЕБОР по што ќе следува избирање на најповолен понудувач, потпишување на договор и да чекаме вагоните да бидат доставени. Овој дел од проектот е предвидено да чини околу 15 милиони евра и согласно анализите би требало да задоволи голем дел од потребите на домашните компании но исто така би се користеле и за превоз на стоки од регионов за ЕУ и обратно.

Економски: Како работи МЖ Транспорт со оглед на тоа дека кризата е присутна секаде во европските земји. Какви се приходите на компанијата и евентуална споредба со претходните години?

Деркоски: Функционирањето на МЖ Транспорт АД во услови на криза како и кај сите други железници во Европа е релативно тешко со оглед на тоа дека железницата како систем е директно поврзана со економските текови, односно во случајов колку повеќе европската и регионалната економија е во пораст толку повеќе се зголемува железничкиот превоз, со други зборови зависноста на железничкиот превоз во однос на економската активност на економиите во ЕУ и регионот е право-пропорционална. За надминување на проблемите кои се јавуваат од недостатокот на превоз но и од честите блокади и штрајкови кај нашиот јужен сосед МЖ Транспорт АД презема низа на мерки на штедење и намалување на непродуктивните трошоци особено во делот на потрошувачка на енергенси но и максимално ангажирање сопствените ресурси во процесот на реновирање и одржување на возните средства. Имено минатата и година МЖ Транспорт АД со сопствени ресурси (технички, човечки и финансиски) реновира два нови дизел – моторни гарнитури  за превоз на патници со кои на неколку линии класичниот состав на воз за превоз на патници се замени со ДМГ. На овој начин значително се зголеми ефикасноста во експлоатацијата во патничкиот превоз од проста причина што потрошувачката на гориво на ДМГ е четири пати помала од класичните гарнитури кои исто така имаат поголеми трошоци за одржување, а истовремено се зголеми квалитетот на услуги во патничкиот превоз бидејќи евидентни се реакциите на патниците кои имале прилика да се возат во овие реновирани возови. Дополнително доколку се земе во предвид дека кризата нема да трае вечно, проектот за обнова на возниот парк во соработка со Владата на Република Македонија, Министерството за транспорт и врски и ЕБОР ќе допринесе за заздравување и зајакнување на МЖ Транспорт АД и подготовка за успешно справување со предизвиците во ситуација кога ќе имаме подобрување на економската ситуација.

Економски: Другата инвестиција е набавка на патничките вагони. Кога реално тие ќе стигнаат во земјава и ќе бидат во функција?

Деркоски: Во рамките на проектот со ЕБОР исто така планирана е набавка на четири нови дизел моторни гарнитури (ДМГ) и 2 нови електро – моторни гарнитури. Дво – степениот тендер за овие гарнитури е веќе објавен, петнаесет заинтересирани компании веќе имаат подигнато тендерска документација и на 16 октомври 2013 година се очекува заинтересираните компании да поднесат понуди кога е и рокот за првата фаза, по што следува евалвација на техничките понуди по што компаниите кои ги исполниле условите од тендерот ќе бидат поканети да поднесат финални технички и финансиски понуди најдоцна до 11 декември 2013 по што следува избор на најповолната понуда и потпишување на договор, од кога за една година би требало да пристигне и првиот воз.

Економски;  Како ќе изгледаат тие, дали има компании кои веќе дотавија некаква понуда со некои првични нацрти?

Деркоски: Изгледот на гарнитурите за превоз на патници ќе зависи од дизајнот на производителот кој треба да биде одобрен од наша страна, но во секој случај сите понуди мора да ги задоволуваат највисоките европски стандарди за превоз на патници, како во поглед на технички и безбедносен аспект така и во поглед на комфор и пристапност на гарнитурите. Овие патнички гарнитури би биле целосно климатизирани, опремени со вакум тоалети, пристапни за лица со ограничена мобилност, со помала емисија на бука, енергетски ефикасни итн., односно ќе бидат дополнителен импулс во поглед на подобрување на квалитетот на услуги во патничкиот превоз со железница на едно повисоко ниво.

 Економски; Дали очекувате дека со нив ќе се зголеми обемот на патнички сообраќај?

Деркоски: Нормално очекувањата со воведувањето на новите возни средства во сообраќај се да имаме зголемување на обемот на патници кои би ги користеле нашите услуги што е и нормална реакција на патниците сои оглед на тоа дека новите возни средства би изгледале атрактивно и би биле значителна новина во железничкиот превоз со оглед на тоа дека последните нови возни средства за превоз на патници се набавени пред 30 години.

Економски:  Статистички бројот на патници во железничкиот сообраќај се зголемува, се разлислува ли да се зголеми бројот на линии на релации каде има зголемена фрекфренција на патници?

Деркоски: Со набавката на новите возни средства планирано е зголемување на фреквенцијата на возовите за превоз на патници што претставува уште еден критериум за подобар квалитет на услуги во превозот на патници но и наша интенција е да овозможиме што повеќе алтернативи во текот на денот за да патниците патуваат почесто со железница а со тоа би имале поефикасно искористување на патничките превозни средства.

Економски: Постои ли размилсување да се корегира цената на билетите?

Деркоски: Нашите планови се цената на билетите да остане иста а само нивото на услуга да биде на повисоко ниво. Со тоа очекуваме само зголемување на бројот на патници што заедно со намалените трошоци за енергенси и одржувањето на новите возни средства би дале позитивни резултати.

Eкономски: Грците најавија дека ќе го вратат возот Солун –Скопје, дали до вас имаат испратено некако барање?

Деркоски: Барање за повторно воспоставување на возот кон и од Солун од страна на јужниот сосед се уште немаме добиено. Кога ќе го добиеме нивното барање сериозно ќе го разгледаме повторното воспоставување на оваа линија.

http://ekonomski.mk/2013/09/21/%D0%B8%D0%BD%D1%82%D0%B5%D1%80%D0%B2%D1%98%D1%83-%D0%BE%D0%BB%D0%B8%D0%B2%D0%B5%D1%80-%D0%B4%D0%B5%D1%80%D0%BA%D0%BE%D1%81%D0%BA%D0%B8-%D0%BA%D0%B2%D0%B0%D0%BB%D0%B8%D1%82%D0%B5%D1%82%D0%BE%D1%82/