Градска инфраструктура (општо)

Пробиштип бара улици без капија

Граѓаните поведоа судски спор за отстранување на капиите од две улици, кои половина век беа затворени и користени само за потребите на рудникот „Злетово“

Граѓани и стопанственици од Пробиштип по судски пат бараат фирмата „Индо минерали и метали“, која го стопанисува рудникот „Злетово“, да ги отстрани капиите од двете градски улици за да може непречено да се користат. Во изминатите 50 години, додека рудникот го стопанисуваше државата, двете спорни улици беа користени само за потребите на рудникот „Злетово“.

Граѓаните реагираат затоа што улиците „Цветко Тонев“ и „Нада Панчева“ уште при формирањето на Пробиштип, имале функција на сообраќајници за поврзување на новоформираната рудничка колонија со соседната селска населба. Но, подоцна, со поставувањето на железните капии и оградата, овие две улици станаа дел од индустрискиот круг на рудникот „Злетово“.

- Пред десетина години, со постапката за приватизација на имотот на рудникот во Пробиштип, дел од помошните погони и објекти во индустрискиот круг добија нови сопственици, но поради пропусти и недоречености во купопродажбените договори, почнаа и несогласување за користење на трафостаниците и улиците. Двете улици и понатаму беа користени само од компанијата „Индо минерали и метали“ - изјави Синиша Цветановски, сопственик на фирма, која има производствен погон на „Цветко Тонев“.

Локалната власт на Пробиштип го поддржува барањето на граѓаните.

- „Индо минерали и метали“ бара да остане сопственик на целиот индустриски круг, во кој се и погоните што сега имаат нови сопственици. Тоа не е дозволиво. Индустрискиот круг повеќе не може да функционира како една целина со еден сопственик, бидејќи во него има приватен, општински и државен имот.

Со купопродажбениот договор „Индо минерали и метали“ купи конкретен имот, погонот флотација и управната зграда. Улиците се надлежност на општината. Фирмата треба да го ослободи и зелениот појас над улицата Цветко Тонев до стариот градски плоштад, кој е сопственост на Република Македонија. Компанијата може да си го огради само имотот што им припаѓа со купопродажбениот договор - велат во локалната самоуправа во Пробиштип.

Деновиве, по барање на судот, сопствениците на „Индо минерали и метали“ ги отворија капиите на улицата Цветко Тонев, но со тоа целосно не ги задоволија барањата на стопанствениците и граѓаните.

- Не е цел капиите само да се отворени. Бараме тие целосно да бидат отстранети од улиците Нада Панчева и Цветко Тонев. Со нивно отстранување овие улици ќе си ја повратат првобитната намена, да бидат слободни за сообраќај за возила и пешаци - изјави Невенка Нотевска, секретар на Општина Пробиштип.