Француската инженерска компанија „Алстом“ ќе го гради метрото во Белград, известуваат медиумите, откако претставниците на српскиот главен град и на компанијата вчера постигнаа начелен договор за изградбата на првата линија. Студијата за изградба треба да биде готова до септември 2012 година, а градежните работи би требало да започнат во средината на 2013 година.

Франција ќе донира 3 милиони евра за изработка на студијата, а проценката е дека изградбата на првата линија би траела 3 до 3 и пол години со што метрото би било отворено во 2016 или 2017 година.

Од правна гледна точка за сето ова треба да се ратификува меѓудржавна спогодба меѓу двете земји, а потоа и да се потпише меморнадум за разбирање меѓу градот и „Алстом.“

Преговорите околу финансиската конструкција траеја околу година дена за на крај страните да се договорат Србија да купи возови од „Алстом“ а Франција да обезбеди поволни кредити во износ од 500 милиони евра за реализација на проектот. Дел од парите ќе бидат искористени за градежни работи, а каматите на кредитите би изнесувале како и оние што ги бараат развојните банки Како Европската инвестициска банка и Европската банка за обнова и развој.

Првата линија ќе биде во должина од 15 километри, а се проценува дека на градот му се потребни 3 линии. Секаде каде што тоа е можно метрото ќе поминува над земја со оглед на тоа што надземната градба е трипати поевтина од подземната. Под земја метрото ќе поминува низ центарот на градот, а ќе биде поврзано и со постоечките желенички пруги.