На 8 Септември треба да бидат пуштени живеалиштата за слонот и за жирафата, но нивните жители нема да пристигнат до тогаш

Објектот ќе биде завршен во предвидениот рок

Живеалиштата за слонот и за жирафата во Зоолошката градина забрзано се подготвуваат и треба да бидат готови до почетокот на септември, а официјално ќе бидат пуштени во употреба по повод 8 Септември. Но без животните. За нив сé уште се водат преговори и се очекува да бидат донесени до крајот на годинава. До отворањето на живеалиштата треба уште да се направат нивните фасади, огради, водени бариери, покриви и да се уредат надворешните делови.

Старото живеалиште на морските лавови, кое е распаднато и претворено во бара, за четири месеци ќе се обнови и ќе се донесат еден пар такви животни.. На слободниот простор до него, обраснат со дива трева, ќе никне ново живеалиште за розови фламинга.

- Распишан е тендер за избор на фирма што ќе го гради и ќе го реконструира живеалиштето на морскиот лав и на розовите фламинга. На почетокот на септември ќе се знае која фирма ќе ја изврши реконструкцијата, а дваесетина дена потоа работите треба да почнат. Ако оди сé според планираното, живеалиштата треба да бидат готови до Нова година - изјави Јордан Милошевски, биологот во Зоолошката градината.

Се прават преговори со повеќе зоолошки градини што ќе го донираат парот морски лавови и розовите фламинга.

Деновиве интензивно се работи на завршните елементи на мајмунарницата, која е направена во африкански стил, односно се ставаат мрежата и столбовите.

- До крајот на месецов терариумот ќе биде пуштен. Бидејќи рептилите се специфични животни, бараат посебни услови, па моравме да посветиме повеќе внимание на нивното живеалиште. Деновиве останува да се наместат електричните уреди, како ламбите и грејачите. Веќе шест месеци рептилите ни се во карантин, па редно време е да ги пуштиме - соопштуваат од Зоолошката.

Старото живеалиште на нилскиот коњ останува да се доработи во внатрешниот дел, но сé уште надлежните од Зоолошката немаат одлучено за што ќе го пренаменат.

-Останува да се доработат бехатон-патеките, осветувањето, патоказите. Да се расчисти делот спроти каналот, кој понатаму ќе послужи за нови живеалишта. Паркингот до крајот на месецот ќе се пушти во употреба. Во преговори сме со повеќе фирми за набавка на вовчето, кое ни е донација од „Т-мобиле“ - објасни Милошевски.

Деновиве, поради високите температури, одморите на граѓаните, намалена е посетеноста, дремливи се животните, дел од Зоолошката е претворена во градилиште, но во септември ќе се врати во форма, велат вработените.