Аеродроми

ТАВ останува во Македонија

Александар Момировски	Коментари (0)

ТАВ со сопствени средства целосно ќе ги модернизира авиопристаништа

Августовското одложување на реконструкцијата на македонските аеродроми е последно, ветува Сани Шенер, првиот човек на турската компанија, кој денеска допатува во еднодневна посета на Македонија.

Во ексклузивното интервју за А1 тој вели дека ако не се најдат кредити од меѓународните институции, ТАВ со сопствени средства целосно ќе ги модернизира домашните авиопристаништа.

„Владата не извести дека ова е последно пролонгирање на тендерот за аеродромот, и ние се согласивме. Јас, како генерален директор на ТАВ Холдинг, можам да ветам дека на први март следната година ќе почнеме да работиме од постоечкиот аеродром, а и ќе започнеме со изградба на уште еден. Проблемот не беше во немањето финансии. Финансиите се тука, но условите во светот сосема се изменија. Како ТАВ, ние сме во состојба да финансираме, но ни треба малку време“, изјави Сани Шенер, генерален менаџер на ТАВ.

По проблемите со експропријацијата на земјиштето кои сега биле решени главниот менаџер на ТАВ, вели дека останува отворено и прашањето за карго аеродромот во Штип. Овој аеродром ќе се гради, но дури откако ќе се направат потребните анализи на терен, кои траат и по неколку години.

„Нема да се случи да не градиме во Штип. Карго аеродромот во Штип ќе биде изграден. Така стои во договорот. Но, се јавуваат инженерски проблеми, проблеми во авио-инженерингот. Мораме да ја провериме климата барем за пет години. На крај, можеби владата ќе го дислоцира аеродромот лево или десно, па затоа главниот план за Штип не е направен“, вели Шенер.

Македонија ја чувствуваме како братска земја на Турција

Македонија ја чувствуваме како братска земја на Турција и затоа ќе останеме овде вели Шерен, демантирајќи ги информациите дека ТАВ се вклучува во трката за концесионерство на приштинскиот аеродром.

„Ние нема да учествуваме на тендерот во Косово, зашто на Балканот дојдовме за Македонија, го одбравме и го добивме Скопје“, рече Шенер.

Турски ТАВ ги доби македонските аеродроми под концесија во траење од 20 години и од нив треба модерни европски авиопристаништа. Лани во октомври со владата ставија потпис на документот за реализација на оваа клучна инвестиција во авиосекторот тешка 200 милиони евра, но сепак поради финансиски проблеми, стартот на модернизацијата беше одложуван два пати.

Првиот човек на ТАВ денеска сигурен во тврдењата дека повеќе нема одлагања. Убеден е дека скопскиот аеродром под нивно раководство ќе стане балкански авиоцентар, чиј најголем конкурент ќе биде виенскиот аеродром.

Аеродромите ќе ја чекаат идната пролет

Турскиот инвеститор ТАВ доби ново продолжување до 1 март 2010 година да почне со модернизација на скопскиот и на охридскиот аеродром и со изградба на карго-аеродром во Штип

Владата втор пат му одобри на турски ТАВ да го одложи почетокот на работите за модернизација и изградба на македонските аеродроми. Турскиот инвеститор на завчерашната владина седница доби рок најдоцна до 1 март 2010 година да ја почне инвестицијата, изјави вчера министерот за транспорт и врски Миле Јанакиески.Според Јанакиески, 200-милионската инвестиција во македонските аеродроми се одложи поради неможноста ТАВ да обезбеди пари за нејзина реализација, како последица на светската економска криза.

- Светските аналитичари очекуваат економската криза да заврши или да биде ублажена до крајот на годинава и се очекува ТАВ во март да нема проблеми да ги обезбеди парите. Претставниците на турската компанија ТАВ повеќепати ја искажаа својата волја и тоа е дел од договорот. Ќе инвестираат и во скопскиот и во охридскиот аеродром, а ќе го изградат и карго-аеродромот во Штип - рече Јанакиески.

Првото одложување на стапувањето во сила на Договорот со ТАВ беше во декември лани, кога турската компанија се обврза да почне со инвестицијата во почетокот на септември годинава. Причина за одложување на инвестицијата и тогаш беше неможноста да обезбеди кредити за инвестицијата поради светската економска криза.Според Јанакиески, тековната гаранција од 6 милиони евра од турскиот инвеститор важи до 1 март, за кога се очекува да стапи во сила Договорот за реализација на инвестицијата.

- Договорот ќе стапи во сила на 1 март и тоа е последниот рок даден од Владата. Ако од 1 март не почне инвестицијата, гаранцијата ќе се ефектуира - тврди министерот за транспорт.

Прашан зошто Владата не го раскинува договорот поради одложувањата и да побара друг инвеститор за аеродромите, Јанакиески рече дека треба да се има предвид оти поради економската криза ниту една меѓународна финансиска институција не дава толкав обем на финансии.

- Гледаме дека голем број концесии во близина на Македонија и ширум Европа пропаѓаат, така што мислам оти е разумно ова пролонгирање од шест месеци. Очекувам дека по 1 март, а можеби и порано, сите да бидеме сведоци на инвестиција која се очекува во Македонија во последните 15 години- нагласи Јанакиески.

Најавата од ТАВ дека не се повлекува, но оти ги одлага работите на проектот за модернизација и изградба на македонските аеродроми за почетокот на идната година, вчера ја потврди Рифат Хисарџиклиоклу, претседател на Унијата на индустриските и трговските комори и берзи на Турција (ТОББ), кој престојува во посета на Македонија.

„Дневник“ неодамна објави дека турскиот инвеститор бара кредит од 125 милиони евра од две банки. Од Европската банка за обнова и развој бара 45 милиони евра и уште 80 милиони евра од Европската инвестициска банка.Атрактивноста на концесионерство на македонските аеродроми ја загрозува најавата на косовската влада дека за една недела ќе распише повик за концесија на приштинскиот аеродром, кој последнава година го презеде приматот на најфреквентен регионален аеродром.

Марјан Блажевски

http://www.dnevnik.com.mk/?ItemID=6456DE80D3598F479969F4904AE7A659

На истокот битка и за карго-аеродромот

Одново се постави прашањето за местото на инвестицијата, во Овчеполието или во Струмичко

Иван Бојаџиски

Штип - Неодамнешната посета на министерот за транспорт и врски, Миле Јанакиевски, на Штип, од каде што тој потврди дека карго-аеродромот ќе започнел да се гради веќе од 1 септември на локација која ги опфаќа општините Штип и Свети Николе, одново ги зовре страстите на истокот од државата. На јавна дебата одново се постави прашањето каде и' е вистинското место на една вака голема и значајна инвестиција, во Овчеполието или во струмичкиот крај.

Штипскиот градоначалник Зоран Алексов вели дека ова прашање, од стручен и од секаков друг аспект, одамна е елаборирано и затворено.

„Сегашнава локација е избрана од стручен тим како централна точка на еден регион кој има свои потенцијали, а ја има и сета друга потребна инфраструктура, како што се магистрален пат и железница, во својата близина. Карго-аеродромот е само дел од еден комплексен проект битен за развојот на овој дел од државата во кој како главна алка е предвидена изградбата на модерен автопат од Скопје до Штип преку Миладиновци, со што оваа релација се скусува за триесет километри. Тоа говори дека во сиот овој проект од големо значење е и близината до главниот град на државата“, вели Алексов. Тој смета дека и Штип, како и целиот регион, својата енергија ќе ја насочи кон реализација на идејата модерниот автопат да продолжи и кон Радовиш и Струмица заради сигурен транспорт на раноградинарските производи од тој дел на државата до аеродромот.

Од друга страна, струмичкиот градоначалник Зоран Заев тврди дека не верува оти карго-аеродромот ќе се гради кај Штип. Тој е убеден дека во блиска иднина Струмица ќе добие ваков објект.

„Светското искуство говори дека вакви објекти се градат откако сите калкулации ќе ја докажат нивната профитабилност. Во таа смисла, Струмица е во огромна предност поради огромното производство на раноградинарски производи на кои им е неопходен брз транспорт до светските потрошувачки центри. Минатата година само преку струмичкиот терминал кон светот е извршен извоз на раноградинарски производи за 150 милиони евра. Карго-аеродромот изграден на наша локација ќе има многу работа, бидејќи ќе транспортира градинарски производи од Струмичко, валандовско-гевгелиското подрачје, од околината на Петрич во Бугарија и од регионот на северна Грција. Тој факт ја прави целата инвестиција исплатлива, профитабилна“, потенцира Заев.

Градоначалникот на Струмица е категоричен дека кога ќе се донесат наредните фази од Законот за децентрализација, Струмица ќе најде инвеститор за изградба на карго-аеродром. Засега општините немаат право да располагаат со државното земјиште и тоа е кочницата поради која, според Заев, тие не можат да работат на реализација на својата идеја. Тој тврди дека интерес за раноградинарските производи од Македонија пројавуваат сите држави настанати од поранешниот СССР, вклучително и големата Русија, а државата треба да размисли зошто овие производи за тој пазар одат со 15 отсто царина, додека Турција ги извезува без царина.

Како и да е, до почетокот на градбата, макар кога и да биде, мора да се одговори и на едно друго суштинско прашање. Тоа е изјавата на претставникот на турски ТАВ, кој ќе ги гради трите аеродроми во Македонија, дека во пакет ќе го изградат и карго-аеродромот кај Штип, но не сакаат да го управуваат, туку ќе и' го подарат на државата.