Ќе поскапува такси-превозот

Лиценцираните возила ќе имаат унифицирани табли
и бело-жолта боја

Сања Наумовска



Поскапува такси-превозот. Според најновата одлука, која пред Советот на Скопје ќе се најде идната недела, одделно ќе се наплатува стартот и секој нареден изминат километар од возењето. Само за седнување во такси, во иднина граѓаните ќе плаќаат 40 денари, а за секој километар по 25 денари. Досега стартот заедно со 2 изминати километра чинеше 50 денари, а секој нареден километар се плаќаше 20 денари. Така, за дестинација од 5 километри, ако досега се плаќаше 110 денари, во иднина цената ќе биде 165 денари, или приближно 10 денари повеќе за секој километар.

Поскапувањето, образложуваат во градската администрација, се должи на долгогодишните барања на такси-превозниците за зголемување на цената на превозот која тие ја сметаат за прениска. Сепак, дел од превозниците се на став дека на поскапувањето мора да му претходи обезбедување услови за одржување на цената. Од синдикалната организација „Плава лагуна“ велат дека дел од такси-компаниите за да привлечат повеќе патници нудат различни попусти и не ја почитуваат ниту сегашната цена.

„Не смееме да дозволиме да ги избркаме патниците, особено од компаниите кои ги почитуваат сите одлуки на Советот на Скопје и да ги препуштиме на несериозни превозници кои ќаруваат на нелегален начин. Сметаме дека иако е неопходно поскапување, за него сега нема услови“, вели Марјан Спасовски од синдикалната организација.

Новата одлука за такси-превоз предвидува и унифицирање на таблите на сите лиценцирани превозници. Идната година ќе ги набавува Градот, за што во буџетот за 2011 година ќе се предвидат 4 милиони денари. Секој таксист ќе има налепници со грбот на Градот и бројот на такси-возилото. Ќе се унифицира и бојата на возилата, која треба да биде бела „талк“, освен багажникот и хаубата, кои треба да се жолти. На овој начин, велат во Секторот за сообраќај, и визуелно ќе се одвојат лиценцираните од дивите таксисти.

По собирањето на предлозите од сите општини, со одлуката се утврдува и новата бројка од 152 такси-стојалишта. Обврска на Градот ќе биде да ги обележи такси-местата и да ги уреди со информативни табли и друга урбана опрема.

http://utrinski.com.mk/?ItemID=36F31E0A6DE6084A8C0FD155212CC8C4

Јагма за такси-стојалишта

Кога може да обележуваат паркинг-места по тротоарите за зонско паркирање, зошто да не се обезбедат повеќе стојалишта, реагираат таксистите, кои бараат соодветен простор за да можат полесно и побезбедно да си ја вршат работата

До крајот на март Градот Скопје ќе донесе нова одлука за регулирање на такси-превозот во Скопје, со што градските власти очекуваат конечно да стават ред во дејноста. Со оваа одлука ќе се зголеми бројот на такси-стојалиштата, што е долгогодишно барање на самите таксисти, а тие ќе почнат да се уредуваат во втората половина од годинава.

- Комисијата за сообраќај и стручните служби активно работат речиси една година за конечно да ставиме ред во такси-превозот. Одлуката нема до крај да го реши проблемот, бидејќи се работи за чувствителна проблематиката, а со дејноста се занимаваат голем број граѓани. Сепак сметам дека со оваа одлука ќе се надминат многу проблеми во оваа област - вели градоначалникот Коце Трајановски.

Стојалиштата се битен сегмент од одлуката, а Градот се консултирал и со таксистите за начинот на нивното користење.

- Дискутиравме дали такси-станиците ќе функционираат по принципот на кружен тек, по принципот кој прв стигне или ќе бидат закупувани. Тоа треба да го дефинираме до летово и во втората половина на годината да ги уредиме сите - најави Трајановски.

Скопските таксисти повеќе години бараат да се обележат и да уредат такси-стојалиштата, но и да се зголеми нивниот капацитет и број. Тие велат дека само половината од тие што се предвидени на хартија функционираат во пракса. Другите ги нема или поради тоа што на нив е изградено нешто или се поставени заштитни столпчиња.

- Потребни се нови стојалишта на пофреквентните места. Се' повеќе се зголемува бројот на таксистите, а градот се шири. Потребно е стојалиштата да се распределат по општините, за да не се преоптоварува центарот. Исто така треба да се зголеми и капацитет на постојните стојалишта, оти не е доволно да може да се паркираат само пет возила - вели Марјан Спасовски, претседател на Групацијата на автотакси-превоз при Регионалната комора на Град Скопје.

Тој смета дека е потребен поголем простор за паркирање такси-возила под Транспортниот центар, како и кај Клиничкиот центар. Спасовски предлага да се направат џебови на секое пофреквентно автобуско стојалиште, на пример на булеварот Партизански одреди, каде што таксистите би можеле да чекаат патници.

- Кога може да обележуваат паркинг-места по тротоарите за зонско паркирање, зошто да не се обезбедат повеќе стојалишта? Нема оправдување дека не може да се најде простор. Не може таксито да кружи и да чека патник со рака да го запре, па потоа да застане на недозволено место и да се доведе во опасност и себеси и патникот. Мора да постојат места каде што таксистите ќе чекаат - реагира Стојановски.

Раководителот на Секторот за сообраќај во Градот, Јани Христовски, вели дека се преземаат активности за зголемување на бројот на станиците.

- До крајот на месецов секоја од општините треба да достави предлози на локации за такси-станици за да може Градот да ги утврди најповолните. За такси-стојалиштата за кои имаме техничка документација обележувањето ќе почне од средината на мај, кога почнува и редовното обележување на улиците. Тоа ќе го реализираат екипи на јавното претпријатие „Улици и патишта“. Ќе се започне од централното подрачје, а ќе се бележи во ноќните часови, кога нема фреквенција на возила - најави Христовски.

Досега свои предлози за стојалишта доставиле општините Бутел, Ѓорче Петров, Аеродром, Чаир и Кисела Вода.

- Донесена е и одлука стојалиштата што се наоѓаат на булеварите, како, на пример, пред ТЦ „Бисер“, да бидат тргнати или да бидат вгнездени, за да не ја зафаќаат крајната десна лента - вели Христовски.

Во Скопје има 104 такси-станици, од кои според Христовски, 90 проценти се во функција.

Од Одделението за односи со јавноста велат дека откако ќе бидат уредени, стојалиштата и понатаму ќе ги одржува Градот.

- На стојалиштата, во зависност од просторот, може да се постават евентуално клупи и канти за отпадоци. Иако таксистите бараа и тоалети, тоа никаде во светот не се практикува, па нема ниту во Скопје. Постојките не служат за долго задржување на таксистите, туку за брзо преземање патници - велат оттаму.

Официјално во Град Скопје се регистрирани 3.000 такси-превозници. Од нив, 1.000 имаат лиценци во согласност со новата уредба во законот, според која тие важат четири години. На другите 2.000 рокот на важноста на дозволата им истекува во текот на оваа година и ќе мора да поднесат барање за продолжување.

Некои превозници ја користат неинформираноста
и наплатуваат екстра

Сања Наумовска


Лиценцираните таксисти имаат право бесплатно да влезат на паркинзите на ЈП „Градски паркинг“. Доколку патниците побараат таксистот да ги однесе на некоја локација што се наоѓа внатре во кое било од паркиралиштата на јавното претпријатие, влезот за такси-возилата е слободен.

Сепак, и покрај оваа одлука на „Градски паркинг“, голем број од таксистите дополнително им наплатуваат на своите патници за влегувањето во паркинг. Откако Јавното претпријатие ја укина поволноста за бесплатно паркирање во првиот половина час, поради злоупотреби голем број скопјани останаа неинформирани дека, сепак, таксистите и натаму имаат слична привилегија.

Најкарактеристичен е случајот со паркиралиштето „Камен мост“ каде што рампата на „Градски паркинг“ го ограничува пристапот кон повеќе јавни објекти, како хотелот „Стоун бриџ“, Комерцијална банка, Министерството за транспорт и врски, црквата „Свети Димитрија“ и уште неколку институции на овој потег.

Патници се жалат дека такси-возилата речиси секогаш застануваат на улицата пред наплатната рампа. Ако на инсистирање на патникот треба да продолжат за да ги остават до крајната дестинација, веднаш им се бараат дополнителни 45 денари, колку што чини еден час паркирање на паркингот. На тој начин, велат граѓаните, превозниците заработуваат на сметка на неинформираноста на луѓето.

Во „Градски паркинг“, пак, појаснуваат дека таксистите треба да покажат само важечка лиценца на вработениот на наплатниот киоск и влезот нема да им се наплати. Се разбира, влегувањето треба да биде само во функција на оставање на патникот, а паркингот мора да го напуштат најмногу за петнаесетина минути.

„Сите компании што имаат лиценци се информирани за оваа можност за користење на нашите паркиралишта. Не само кај Камениот мост, туку и кај Градска болница, Музејот на Скопје и секаде каде што има потреба да се донесе патникот што поблиску до институцијата“, информираат од јавното претпријатие и нагласуваат дека посочените ситуации може да се случуваат само доколку превозникот нема важечка лиценца со која ќе си обезбеди бесплатен влез.

Во дел од такси-компаниите, пак, велат дека знаат за поволноста што ја нуди „Градски паркинг“ и дека очекуваат возачите да ја применуваат. Сепак, признаваат оти не можат постојано да контролираат дали некој од нивните вработени ќе ја искористи неинформираноста на патникот и ќе наплати екстра пари.