Аеродроми

Турците, заедно со финансиери од ЕБОР, ги посетиле авиопристаништа и разговарале за деталите околу можното кредитирање на активностите за модернизација, како и за изградба на нов карго аеродром крај Штип

Турската ТАВ, која лани ја доби 20-годишната концесија за двата аеродроми, не се откажува од инвестицијата во земјава вредна 260 милиони евра. Подготовките за преземање на аеродромите од крајот на август се во тек. Како што дознаваме, делегација на турската компанија, која во земјава формираше своја компанија ТАВ Македонија, неодамна престојувала во земјава и извршила обиколка на аеродромите Александар Велики и Св. Апостол Павле, а била и на локацијата во Штип каде ќе се гради новиот карго аеродром. Во посета на двете авиопристаништа престојувале и претставници од Европската банка за обнова и развој (ЕБОР).
Од ТАВ работат темелна анализа на состојбата со аеродромите. Дознаваме дека на финансиерите од ЕБОР им ги презентирале своите инвестициски планови за модернизација на македонските аеродроми, а се разговарало и за техничките детали околу можното кредитирање на овие инфраструктурни проекти. Засега Турците не се директно вклучени во водењето и менаџирањето на аеродромите и тоа и натаму им е препуштено на домашни кадри и менаџери поставени од Владата.

За проширување на полетно-слетната патека на Александар Велики и за изградбата на новиот карго-аеродром во Штип треба да се експроприра земјиште од приватни сопственици. Од Министерството за транспорт и врски велат дека постапката за експропријација на градежно-неизградено земјиште за потребите на предвидените градежни инвестиции на аеродромите е во тек и се одвива согласно однапред предвидената динамика. На вчерашната собраниска Комисија за транспорт и врски беше усвоен Предлог-ребалансот на државниот Буџет, каде во делот што се однесува на буџетот на ресорното министерство беше дадено зелено светло за зголемување на ставката за експропријација на земјиште за потребите на аеродромите за 15 милиони денари или околу 243.000 евра.

Турскиот концесионер требаше да го преземе управувањето на скопскиот и охридскиот аеродром и да ги почне активностите за изградба на нов карго аеродром крај Штип уште во средината на декември минатата година, веднаш по потпишувањето на договорот со Владата. Поради финансиската криза, компанијата го пролонгира преземањето на македонските аеродроми за есеноска.

За менаџерите на ТАВ ова е одличен проект за чија реализација македонската влада нема да вложи ниту денар. Според договорот, во првите три години треба да инвестираат околу 260 милиони евра, при што најголем дел од средствата се за изградба на карго-аеродромот во Штип. Модернизацијата на аеродромите треба да почне најдоцна за три месеци од официјалното преземање, при што за реконструкција на скопскиот аеродром се предвидени 20 месеци, а за аеродромот во Охрид - 12 месеци.

Министерот за транспорт Миле Јанакиески веќе изнесе јасен и дециден став дека во оваа работа нема флексибилностт и дека во договорот има точно утврдени рокови за работите што треба да се реализираат. За незавршените работи во предвиден рок, ТАВ ќе плаќа пенали на дневна основа од 5.000 евра. Ако и во овој рок не ја заврши работата, договорот ќе биде раскинат.