Аеродроми

Турски „ТАВ“ ги презеде македонските аеродроми

Турската компанија нема да го стопанисува карго-аеродромот во Штип, туку само ќе го изгради, а потоа Владата ќе процени дали таа ќе оперира со него или ќе бара друг концесионер

Министерот Миле Јанакиески и директорот на „ТАВ“, Мустафа Сани Шенер (десно), најавија инвестиција од 200 милиони евра за модернизација и изградба на аеродромите

Турската компанија „ТАВ“ вчера потпиша договор со Владата со што ги доби под концесија аеродромите во Скопје и во Охрид, „Александар Велики“ и „Св. Апостол Павле“ во наредните 20 години и се обврза да изгради нов карго-аеродром во Штип.

Потписниците на договорот, министерот за транспорт и врски Миле Јанакиески и главниот извршен директор на „ТАВ“, Мустафа Сани Шенер, најавија инвестиција од 200 милиони евра во модернизација и изградба на аеродромите и подобрување на аеродромските услуги.

- Македонија заслужува ваква инвестиција, која ќе овозможи подобрување на услугите за македонските граѓани и за сите што ќе доаѓаат во државава. Владата нема да биде флексибилна ако концесионерот не ги исполнува навреме условите од договорот. Нема да има простор за одложување, затоа што постојат точно определени рокови - истакна Јанакиески.Модернизацијата на аеродромите треба да почне најдоцна за три месеци, при што за реконструкција на скопскиот аеродром се предвидени 20 месеци, за аеродромот во Охрид 12 месеци и 3 години за изградба на карго-аеродромот во Штип. Турската компанија, според договорот, нема да го стопанисува карго-аеродромот, туку само ќе го изгради. Владата потоа ќе процени дали таа ќе оперира со него или ќе бара друг концесионер.

Министерот за транспорт објасни дека сите вработени од државното аеродромско претпријатие ќе бидат преземени од новоформираното претпријатие „ТАВ Македонија“, кое, покрај компанијата „ТАВ“, како негов стопроцентен сопственик, е потписник на договорот за концесија.

Според Јанакиески, државата во наредните 20 години може да очекува прилив меѓу 30 и 40 милиони евра во буџетот од издавањето под концесија на аеродромите. Надоместокот што ќе го плаќаат турските инвеститори секоја година ќе зависи од бројот на патниците на аеродромите. Сегашната бројка од 500.000 патници годишно, според министерот за транспорт, треба да се зголеми на два до три милиони.Главниот извршен директор на „ТАВ“ вети дека ќе изгради модерни и современи аеродроми, за што во наредните три години ќе инвестира 200 милиони евра, како и дополнителни инвестиции ако биде потребно за успешно оперирање со аеродромите.

- Аеродромите се порти при влез во секоја земја. Патниците што доаѓаат во една земја го добиваат првиот впечаток кога пристигнуваат, а последниот кога си заминуваат. Веруваме во иднината на земјата - рече Сани Шенер.Турски „ТАВ“ беше единствена компанија на јавниот оглас што го распиша Владата за издавање на аеродромите под концесија. „ТАВ“ на скопскиот аеродром треба да изгради нова терминална зграда, да ја продолжи полетно-слетната патека, да изгради паркинг за автомобили, пристапен пат со нова клучка, да инсталира системи за земска навигација, да воспостави комунална инфраструктура, да ја догради административната зграда и да изгради нов карго-терминал, противпожарна станица и нов паркинг за воздухоплови. На охридскиот аеродром за една година е предвидено реконструирање на постјниот паркинг, реновирање на објектите во карго-ентарот, изградба на ВИП-објект, реконструкција на административната зграда и набавка на нова опрема. Карго-аеродромот во близина на Штип треба да биде готов за три години. Намерата на Владата е во иднина да функционира како алтернативен за цивилната авијација.

„ТАВ“ оперира со три аеродроми во Турција, вклучувајќи го и најголемиот истанбулски аеродром „Ататурк“. Во Тунис, исто така, оперира со три аеродроми и со уште два во Грузија. Во тек е изградба и на аеродроми во Катар и во Каиро.

Марјан Блажевски