Аеродроми

Турската компанија “ТАВ“, е единствената што доставила понуда во втората фаза од постапката за давање на концесија на аеродромите “Александар Велики“ – Скопје и “Свети Апостол Павле“ – Охрид и за изградба на карго-аеродромот во Штип.

“Денеска до архивата на министерството за транспорт и врски пристигна само една понуда за концесија на аеродромите и тоа од турската компанија “ТАВ“, изјави претседателот на Комисијата за евалуација на тендерската документација Игор Јанушев на денешното јавно отворање на доставената понуда.

“На 15 јули беше објавена втората фаза за постапката на давање на оваа концесија. До денескан поминаа 42 дена, а согласно законот рокот е минимум 40 дена. Во меѓувреме беа организирани неколку настани се' со цел да се добие што поконкретна и подобра понуда. Со самото почнување на постапката на 15 јули започна да функционира базата на податоци. На шести август се одржа конференција на понудувачите во владата, додека на седми и осми август имаше посета на локацијата на аеродромите“, додаде Јанушев.

Во втората фаза од постапката за издавање на македонските аеродроми под концесија беа квалификувани четири компании и тоа “ТАВ“ од Турција, “Виена Интернационал Аирпорт“ од Австрија, “Хочтиф“ од Германија и “ЕГИС“ - Коуптхинг Сингер анд Фриедландер“ од Франција и Велика Британија. Јанушев соопшти дека согласно предвидената динамика, комисијата примила околу 500 прашања од сите четири понудувачи, како и голем број на забелешки и коментари во однос на предлог договорот за концесија. Одговорите биле доставени на 16 август до сите четири компании.

“Во наредниот период комисијата ќе заседава и ќе изврши целосна и темелна евалуација на целокупната доставена документација. Во наредниот период ќе следи потпишување на договорот и регистрација на фирма за посебна намена.