Аеродроми

На јавниот повик што пред две недели го распиша Министерството за транспорт и врски, а заврши в петокот, се јавиле над дваесетина реномирани компании или конзорциуми кои веќе стопанисуваат со аеродроми

Голема заинтересираност од познати странски аеродроми за 20-годишно стопанисување со скопскиот и охридскиот аеродром. На јавниот повик што пред две недели го распиша Министерството за транспорт и врски, а заврши во петокот, се јавиле над дваесетина реномирани компании или конзорциуми кои веќе стопанисуваат со аеродроми. Меѓу најпознатите пристигнати пријави, како што неофицијално се дознава, се споменуваат виенскиот и парискиот аеродром, како и аеродроми од Германија, Грција и други.

- Деновиве ги очекуваме и изјавите што се доставени по пошта. Потоа изјавите ќе ги разгледаме за да имаме увид кои се заинтересираните и за нивниот профил. Потоа ќе ја информираме и Владата со предлог услови за тендерската документација. Очекуваме меѓународниот ограничен повик да биде распишан најдоцна за две недели - велат од Министерството за транспорт и врски.

Најдобриот концесионер кој истовремено ќе биде и инвеститор, треба да вложи во подобрување на техничката и финансиската состојба на аеродромите. Тој ќе биде добиен преку јавно наддавање и неговото име ќе се знае во текот на ова лето.

Владата се одлучи за моделот - скопскиот и охридскиот аеродром да ги даде под концесија на еден концесионер. Инвеститорот на "Александар Велики" ќе треба за 20 месеци од добивањето на концесијата да изгради нова терминална зграда, да ја продолжи пистата за 500 метри за слетување на големи воздухоплови, да ја дозаврши административната зграда и да изгради нов карго терминал и паркиралиште. "Свети Апостол Павле" пак, за 12 месеци од одењето под концесија треба да добие нов ВИП-објект и пречистителна станица, како и реконструирана аеродромска зграда.

Изградбата на трет аеродром во Штип, кој во почеток би бил за карго превоз и алтернатива за потребите на цивилната авијација, а подоцна би прераснал во главен аеродром во Македонија, би можел да добие друг инвеститор. Министерот за транспорт и врски, Миле Јанакиески најави дека како инвеститор би можела да биде и државата. Според него, од почеток повеќе ќе се инвестира во штипскиот аеродром, бидејќи местоположбата на скопскиот аеродром бара прескапи зафати за да се подигне неговата сегашна категорија.
Инвестицијата во трите аеродроми е планирано да изнесува 200 милиони евра.

Во насока на давањето на аеродромите под концесија, Владата донесе одлука за преобразба на ЈП за аеродромски услови "Македонија" кое стопанисува со двете домашни авиопристаништа, во акционерско друштво во државна сопственост.

ПРЕДВРЕМЕНИТЕ ИЗБОРИ ГО ОДЛАГААТ ЈАВНИОТ ОГЛАС

Ќе почека изборот на нов газда на аеродромите

Неопходно е да ги дадеме аеродромите под концесија за да се остварат значителни инвестиции,за што во овој момент немаме пари , вели министерот Миле Јанакиески

Се замрзнува планот на Владата за давање на македонските аеродроми под концесија ако се закажат предвремени парламентарни избори во јуни. Иако заврши претквалификацискиот повик, на кој над 20 странски компании изразија намера да станат стопанственици на аеродромите, Законот за спречувањето на корупцијата налага целата постапка да се одложи до изборот на новиот состав на Ссобранието.Од денот на донесување одлука за распишување избори до нивното завршување, вклучувајќи го и рокот за жалби, односно до издавањето решение за добиен мандат на пратеник, не може да се отуѓува државен имот - вели Мирјана Димовска, претседателка на Државната комисија за спречување на корупцијата.

ИНТЕРЕСОТ ГОЛЕМ

Деновиве се очекуваше да биде објавен огласот за доделување концесија за градба, реконструкција и за користење на аеродромите „Александар Велики“ во Скопје и „Св. Апостол Павле“ во Охрид и за изградба на нов карго-аеродром во Штип. Меѓу заинтересираните компании се споменуваат виенскиот и парискиот аеродром, како и аеродроми од Германија и од Грција. Македонските воздушни пристаништа ќе се издаваат на 20-годишна концесија. Инвеститорот треба да вложи 200 милиони евра во реконструкција и осовремување на аеродромите, при што има обврска да ги задржи сите вработени во аеродромското претпријатие „Македонија“ најмалку седум години.Утврдени се условите што концесионерот мора да ги исполни во определен рок. Неопходно е да ги дадеме аеродромите под концесија за да се остварат овие цели, за кои се потребни значителни инвестиции, за што немаме пари. Со доделување на концесијата на инвеститор што има значително искуство за користење и развој на аеродромски услуги ќе добиеме поефикасни аеродроми. Со тоа ќе се зголеми и бројот на превезените патници и товар - изјави министерот за транспорт Миле Јанакиески.

СЕРИОЗНИ ОБВРСКИ

Според условите од јавниот оглас, еден концесионер ќе ги добие аеродромите во Скопје и во Охрид, а штипскиот може да го добие и друг инвеститор. Концесионерот на „Александар Велики“ за 20 месеци треба да изгради нова терминална зграда со минимална површина од 40.000 квадратни метри и со шест порти за патници. Пистата ќе се продолжи за 500 метри, со што ќе се овозможи слетување на воздухоплови за директни прекуокеански летови. Концесионерот има обврска да постави системи за земска и за сателитска навигација, да изгради паркинг за автомобили и пристапен пат, нова клучка, да ја догради административната зграда и да изгради нов карго-терминал. „Свети Апостол Павле“, пак, за 12 месеци од одењето под концесија треба да добие нова навигациска опрема, ВИП-објект, пречистителна станица и реконструирана аеродромска зграда. Штипскиот аеродром треба да биде со полетно-слетна патека од 2.400 метри, со можност за продолжување до 3.000 метри. Системите за инструментална и визуелна навигација и радионавигациските уреди треба да се постават три години по потпишувањето на договорот.Аеродромот во Штип во почеток би бил за карго-превоз и алтернатива за потребите на цивилната авијација. Намерата ни е во иднина да прерасне во главен аеродром во Македонија. Местоположбата на скопскиот аеродром диктира прескапи зафати за да се подигне неговата категорија - истакнува Јанакиески.