Пејсажна архитектура

Како најчеста причина за сушење и за разболување на дрвјата се високите температури во летните периоди што го ослабуваат системот на растението, како и зголемена појава на инсекти, габи и на бактерии

Се препорачува садење повеќе листопадни дрвја за да ги апсорбираат штетните гасови

Во градот има околу 3.800 суви и болни дрвја што мора да се исечат 

Половина постари дрвореди во градот се суви и болни. Заболени, оштетени, исушени гранки и стебла се честа слика, која може да се забележи речиси на секоја улица каде што има дрворед што бил засаден пред неколку децении, факт што го потврдуваат и експертите. Според информации од ЈП „Паркови и зеленило“, во моментов во Скопје има 3.800 суви дрвја, кои е потребно да се отстранат бидејќи постои опасност да паднат и да направат штета или да повредат некого. Од јавното претпријатие посочуваат дека оваа година до ноември имаат исечено околу 1.300 суви дрвја на разни локации низ градот и неговата околина. Како најчеста причина за сушење и за разболување на дрвјата се високите температури во летните периоди, кои го ослабуваат системот на растението, како и зголемена појава на инсекти, габи и бактерии што дополнително влијаат на нивно оштетување, а понатаму и сушење.

Потребни се превентивни мерки

Според професорот на Шумарскиот факултет во Скопје, ентомологот Стерја Начески, климатските фактори, растителните вошки и инсектите живеат во листовите и ги напаѓаат дрвјата.

 - Поради сето ова дрвото физиолошки ослабува, стеблото е нападнато од штетните инсекти што живеат во кората на дрвјата. Во Скопје сега има многу болни дрвја и ако навреме се преземат заштитни мерки, тие што се во почетна фаза може да се излекуваат, но ако не се преземе ништо, ќе се исушат - вели Начески.
 Ентомологот додаде дека кај нас не се посветува доволно внимание на одгледување и превентивна заштита на дрвјата, дека само се сечат и се садат нови видови. 
 

- Не е само да се насадат дрвја туку треба и добро да се негуваат. Двапати годишно да се прават прегледи, еднаш напролет и еднаш наесен. Исто така мора да се внимава и кој период во денот се полеваат дрвјата - објаснува Начески.

- Дрвјата мора да се премачкаат со заштитна паста во време на поткастрување, затоа што во спротивно на стеблото веднаш ќе се залепат инсекти и ќе го оштетат дрвото - посочува ентомологот.

- Најранливо дрво е брезата, бидејќи е сибирско дрво и може да издржи екстремно ниски температури, но не е отпорно на високи температури, па затоа има и масовно сушење на брезите, бидејќи нема доволно вода во летните месеци - додава Авировиќ.

______________________________________________________________________

Се чека закон за зеленило сеуште

 Проблем што ни се наметнува веќе со години е недостиг од закон за зеленило. Македонија е една од ретките земји во Европа што немаат законска регулатива во случаите кога суви дрвја паѓаат врз автомобилите или луѓето. Законот за зеленило што е имплементиран во сите земји е поставен врз основа на меѓународни стандарди. Сепак, напредок е направен последниве две години и нацрт-законот за зеленило е даден на обработка во Републичкото собрание. Најверојатно тој ќе биде како еден дел од Законот за градење, но не е исклучено тој да биде самостоен закон.

http://www.novamakedonija.com.mk/NewsDetal.asp?vest=1129131817343&id=14&setIzdanie=23041