Порта Македонија

ВО ПОРТА „МАKЕДОНИЈА“ СЕ ПРОДАВА СУВЕНИР СО ГРЕШKА

Војводата Kарпош стана партизан

Грешка се провлекла во печатењето на името на еден од сувенирите кои може да се купат во продавницата во портата „Македонија“. Се работи за фигурета на војводата Петре Kарпата-Kарпош, која се продава како дел од асортиманот на Министерството за култура за промовирање на македонското историско и културно наследство. На постаментот наместо името на ајдучкиот војвода, испишано е името на народниот херој Христијан Тодоровски-Kарпош.

Се работи за две личности од нашата историја - војводата живеел и се борел против Османлиите во 17 век и е предводник на Kарпошовото востание. Додека Тодоровски-Kарпош е народен херој, партизан, кој умира во борба против фашистичкиот окупатор во 1943 година.



Ајдучкиот војвода и партизанот

Сувенирот што се продава е идентичен на споменикот на војводата поставен пред зградата на Ибни Пајко, односно во близина на Kамениот мост каде што е набоден на кол во текот на османлиското владеење.

Никој од вработените не ја забележал грешката.

Задолжени за набавки на сувенири во продавницата се одговорните од Музејот на Македонија. Но директорот Перо Јосифовски објасни дека како институција, кога се работи за потребите на продавницата, ги изработуваат само копиите од археолошките наоѓалишта низ Македонија, истовремено и теракотите. Оној дел за сувенири, во кој спаѓаат фигурите од спомениците кои се дел од „Скопје 2014“, приврзоци, чинии, знамиња, ги изработува фирма избрана на тендер од министерството.

- Ние имаме обврска само редовно да ги набавуваме од таа фирма - изјави Јосифовски.

Оваа фирма, рече тој, не изработува сувенири само за дуќанот во портата „Македонија“, туку и за другите три во Скопје, на улица Македонија, кај „Холидеј ин“ и на влезот во Старата чаршија. Меѓу другото, и за другите 16 низ цела земја.





Фигуретите повлечени

Директорот појасни дека некои од пунктовите допрва ќе се формираат. Не можеше да каже колку вакви фигури досега биле продадени преупатувајќи на своите колеги од министерството.

За десет дена, колку што е отворена портата, за количеството продадено со името на партизанот наместо на војводата, не можеше да каже ниту Емилија Андоновска, одговорна за работа на овој објект. Допрва надлежните ќе утврдат дали првата тура од фигурите исто така била со грешка или само втората.

Таа изјави дека по реакциите тие вчера се повлечени од продажба. Ја информирале и фирмата да им достави нови сувенири.

- Им наложивме да утврдат и чија е вината - рече Андоновска.

Јорданка Ивановска