Кривичен суд - Скопје

Камери ќе снимаат судења во скопскиот Кривичен суд

Нова зграда на пет ката со доволно простории и модерна опрема ќе се гради во март, а со неа ќе се реши хроничниот проблем од недостиг на простор во Основниот суд Скопје 1

Тесните и задушливи судници во кои половина од присутните со часови стојат на нозе, „рентањето“ сали во соседните судови, немањето соодветни простории во кои адвокатите и обвинителите ќе може да се подготват за судење и низа други проблеми со кои се соочува најголемиот суд во земјава, Основниот суд Скопје 1, наскоро ќе станат минато. Најавено е дека од март в година ќе почне изградбата на новата зграда за овој суд, која ќе биде лоцирана веднаш до стариот објект.

Според претседателка на Судот, Лидија Неделкова, проектот за изградба на новата зграда е на Светска банка и на Министерството за правда. Таа вели дека со префрлање на Кривичниот суд во нов објект ќе се обезбеди доволно простор за непречена работа на судиите, обвинителите, адвокатите, но и на странките и на медиумите. Планирано е објектот да има пет ката, а судниците да бидат опремени со сите потребни технички помагала. Неделкова рече дека судењата во новите судници ќе бидат снимани со камери и со тоа ќе се обезбеди поголема регуларност на целата постапка.

За големината и за важноста на овој суд говори фактот што само во 2008 година во работа имало 196.126 предмети, над половина од таа година, а останатите „наследени“ од претходните години. Лани овој суд решил 134.009 предмети, а нерешени останале 62.117 предмети.

Поради обемниот број предмети овој суд со години има хроничен проблем со недостиг на простор за работа. Многумина од судиите не можат да обезбедат судница бидејќи некој од колегите веќе ја „резервирал“. И вчера претседателката Неделкова со пример посочи дека просторот е проблем - тројца новоизбрани судии немаат свои работни простории од едноставна причина што секое ќоше во судот е „зафатено“. Често се случува поголемите судења со над десетина обвинети, кои ги има се' почесто во последните неколку години, да не можат да се судат во простории на Кривичниот суд. Тие се закажуваа во големата сала на Врховниот суд или, пак, во Апелацискиот суд во Скопје.

Поради неможноста сите оддели на Судот да се сместат во сегашниот објект, кој е на три ката, Одделот за прекршоци е сместен во бараките во Градскиот парк, а одделот за извршување на санкции, одделот за малолетници и дел од истражниот оддел што постапува по определени истражни предмети се сместени во зградата на Апелацискиот суд Скопје.

Вчера официјално беше соопштено дека во рамките на Основниот суд 1 во Скопје функционира Канцеларија за односи со јавноста, во која ќе може информации да добијат медиумите, но и граѓаните.

Како портпарол на судот ќе функционира истражниот судија Владимир Туфегџиќ од Одделот за борба против организираниот криминал и корупција. Претседателката Неделкова соопшти дека на официјалната интернет-страница на Судот редовно ќе се објавуваат донесените пресуди.

Кривичниот суд во Скопје, поточно Основниот суд Скопје 1 во почетокот на неговото формирање во 1945 година бил сместен во бараки што се наоѓале спроти Градежниот факултет во Скопје и пазарчето „Буњаковец“, а во сегашниот објект на булеварот Гоце Делчев е сместен во 1972 година.

http://www.dnevnik.com.mk/?ItemID=580DB7565594E041B965ADDDFBE4FEFC