Скопски сообраќај (општо)

Елена Мачевска

Железниот мост што ги поврзува скопските општини Сарај и Ѓорче Петров нема да се реконструира, туку во негова непосредна близина ќе се гради нов. Поради неговата дотраеност и лошата состојба во која се наоѓа во последните години, стариот мост ќе служи само за поминување на пешаците преку Вардар.
Според надлежните во општината, предвидено е оваа година, на оддалеченост од педесет метри на веќе постојниот Железен мост, да се изгради нов, бетонски, со современ изглед и функционалност. Новиот мост треба да има две коловозни ленти, по една во секоја насока, тротоари од двете страни на коловозот и велосипедска патека. Вкупната широчина треба да биде дванаесет метри.
Градоначалникот на општина Сарај, Беким Фазлиу, кој и на почетокот на минатата година најавуваше ваков градежен зафат, вели дека проектот за изградба на мостот е готов и дека треба да се избере фирма, за што веќе е распишан тендер, која ќе биде заинтересирана да ги изведува работите.
- За изградба на мостот ние како Општина добивме 30 милиони денари од Министерството за транспорт и врски – изјави Фазлиу.
Тендерот за избор на најдобра фирма-понудувач, која е заинтересирана за изградба на новиот бетонски мост, е распишан по вторпат откако првиот беше поништен од Општината. На првиот тендер, кој беше распишан минатата година, се пријавија само две заинтересирани фирми, а беше поништен, како што велат од Општината, поради законската одредба според која еден тендер се смета за неуспешен доколку на истиот се пријават помалку од две фирми-понудувачи.
Градоначалникот на Сарај вели дека, иако се обезбедени средства за изградба на новиот мост, нема да почне неговата изградба некаде до средината на март, односно додека траат изборите за нов градоначалник на општината.
- Најверојатно и ако се избере градежна фирма која ќе ги изведува работите за изградба на мостот, сепак додека траат кампањите, како и самите избори, нема да почне да се гради. Градењето пред избори, не остава добар впечаток кај граѓаните. Веднаш потоа, се надева, дека ќе почне долгоочекувана изградба - вели Фазлиу.
Експертите со години предупредуваат на дотраеноста на Железниот мост и на опасноста преку него да поминуваат товарни возила. Неговата реконструкција, односно изградбата на нов мост се најавува подолго време, но до денес целата работа не мрдна понатаму од тоа.

Градот ќе нарачува проекти за десетина нови сообраќајници

Идејните проекти треба да дадат информации за финансиите потребни за реализација

Стручњаците инсистираат на изградба на брзи магистрали за подобра врска на сите населби

Сања Наумовска

Сообраќајот во Скопје ќе доживее целосен колапс до 2020 година ако не се изградат неколку големи сообраќајници, предвидени со Генералниот урбанистички план, предупредуваат стручњаците. Обиколницата која се гради околу Скопје нема многу да влијае на олеснувањето на протокот на автомобили, освен што треба да ги снема тешките товарни возила што транзитираат преку нашата држава. Сообраќајните инженери инсистираат на изградба на брзи магистрали во границите на градот, со кои ќе се овозможи подобра врска на сите населби меѓу себе и со излезите од Скопје.

Сите неизградени сообраќајници што ги предвидува ГУП се разработени во Студијата за примарна сообраќајна мрежа на Скопје уште пред десетина години. Стручњаците велат дека студијата треба да биде основа за градските власти при планирањето на одржливиот сообраќај во градот.

Според Пламен Гавровски, сообраќаен инженер во Заводот за урбанизам и архитектура на Скопје, за постигнување на оваа цел, покрај изградбата на нови улици, треба да се вложи и во проширување на неколку раскрсници во центарот, во регулирање на паркирањето со изградба на катни гаражи и задолжително во решавање на застарениот јавен сообраќај.

„Во Студијата се содржани анализи и сознанија за развојот на сообраќајот во Скопје во иднина и тие треба да се основа за идното урбанистичко планирање на градот. Поради тоа, сметам дека Студијата не треба и не смее да стои во фиока, туку да се реализира, особено најважните проекти за брзи сообраќајници“, вели Гавровски.

Според него, една од најважните сообраќајници е Јужен булевар, кој заедно со „Партизански одреди“ и „Илинденска“ треба да го поврзува источниот и западниот дел од Скопје. Во Генералниот урбанистички план е предвиден и булеварот „Крушевска Република“, од Јужен булевар кај раскрсницата пред Тутунскиот комбинат, кон новата клучка „Континентал“. Тој би требало да се подигне на столбови преку Мичурин и Маџир Маало во правец на мостот кај Транспортен центар или, пак, кон нов мост што би требало да биде изграден во негова функција до поврзувањето со булеварот „Гоце Делчев“.

Важна сообраќајница за растоварување на секојдневните сообраќајни метежи е и продолжувањето на булеварот „Климент Охридски“, кој, исто така, подигнат на столбови, покрај зградата на Владата, треба да се движи со мост преку Вардар и тунел во Калето, кон улиците „Никола Карев“ и „Џон Кенеди“. „Партизанска“, објаснува Гавровски, мора да се продолжи од раскрсницата кај „Тифани“, под плоштадот „Македонија“, до раскрсницата кај Народна банка.

„Неопходно е растоварување и на раскрсниците кај Судска палата и на Бит-пазар, со денивелација на сообраќајот, бидејќи на овие две локации секојдневно има огромен проток на возила. Изградбата на клучката во форма на детелинка на Бит-пазар ќе реши дел од сообраќајниот проблем на овој потег“, нагласува Гавровски.

За вистински одржлив сообраќај, особено во централното градско подрачје, потребно е решавање и на хроничниот проблем со паркинг-местата преку изградба на катни гаражи. „Не треба да се дозволи катните гаражи да станат бизнис на приватни фирми кои сакаат да дојдат до евтин квадрат земја во центарот. Паркирањето е јавна функција која треба да ја врши градската власт или, пак, централната, доколку смета дека тука може да најде интерес“, вели Гавровски.