Такси превоз

„Наше такси“ - нова компанија на скопските улици

„Наше такси“ се 50 жолти возила „шкода октавија“ и се повикаат на 151 52

Новата такси-компанија „Наше такси“ од вчера и официјално започна со работа. Педесет возила „шкода октавија“, со унифицирана жолта боја и дополнителна опрема, се дел од компанијата која може да се повика на бројот 151 52, на бесплатната линија 0800 151 52 и на 070/ 415-152. Сите возила ќе носат реклами на покривот, слично на такси-возилата во други метрополи, а безбедноста на рекламите е атестирана и одобрена од Машинскиот факултет во Белград.

Возилата се опремени со ГПС-систем за следење и во нив нема радиостаници, а повикот од централата се преупатува според локацијата на возилото. Такси-возилата на „Наше такси“ имаат фискални таксиметри, а за организирана соработка со компании се предвидува и безготовинско плаќање со картички. Возачите како и возилата ќе бидат униформирани, а на видно место во возилото мора да биде истакната и цената на превозот. Тие ќе возат во две смени, од 6 часот изутрина до 3 по полноќ.

„Новата компанија на клиентите ќе им понуди модерни услуги во нови возила со поголема безбедност и удобности. Сите се со унифицирана боја, возачите се професионалци, преку кои ’Наше такси‘ ќе биде препознатлив по својата оригиналност“, истакна Ѓорѓи Ќосев, сопственик на „Наше такси“, нагласувајќи дека возилата се во согласност со сите новини од Законот за превоз на патници и Одлуката за такси-превоз на Градот Скопје.

Претставникот на Градот Трајко Базерко потенцираше дека сите возачи се лиценцирани во октомври минатата година. Возилата можат да носат реклами на покривот, бидејќи за тоа нема законска пречка, а тие се предвидени и во новата Одлука за такси-превоз, која треба во блиска иднина да ја усвои Советот на Градот. (С.Н.)