Скопски сообраќај (општо)

стратегиЈа за растоварување на шпицот во центарот на градот

Пошироки сообраќајници решение за метежот

До март главниот град ќе стане градилиште, во кое ќе се гради трамвајска траса, ќе се довршува клучката, ќе се пробиваат нови и ќе се прошируваат постојните булевари

Зголемениот број автомобили, несоодветниот јавен превоз и недостатокот од сообраќајна култура ја отежнуваат состојбата

Скопјани секој работен ден буквално бијат битка навреме да стасаат на работа. Ако до пред неколку години сообраќајниот шпиц беше наутро и попладне, сега го има буквално во текот на целиот ден. Недостигот од сообраќајна култура, но и недоволниот капацитет на сообраќајниците за се' поголемиот број возила се причините за метежот што се создава.

- Зголемен е бројот на возилата низ скопските сообраќајници, особено во центарот. Доволно е еден неискусен возач да направи еден кикс, да дојде до незгода за да се создаде колона и да се сопре сообраќајот за цел час - вели Сашо Рајчановски, сопственик на такси-компанијата „Коммак-комерц“ и претседател на Групацијата на автотакси-превоз при Стопанската комора на Република Македонија. За Рајчановски, решението е да се затвори Големиот ринг за сообраќај, како и во сите поголеми светски метрополи. Тој смета дека во тоа подрачје треба да биде дозволено само присуството на специјални возила, такси-служби и автобусите на јавниот градски превоз.

- Проблемите се детерминирани од несразмерниот урбанистички развој и изградба на соодветна сообраќајна мрежа која ќе ја следи зголемената фреквенција на учесници во сообраќајот. Зголемениот број автомобили, несоодветниот јавен превоз, немањето алтернатива, како и недостатокот од сообраќајна култура кај сите субјекти се дополнителни фактори што ја отежнуваат состојбата - сметаат градските власти.

Во изминатите три години Градот системски пристапи кон решавање на овие проблеми. Изграден е булеварот Словенија, прв новоизграден во Скопје по дваесетина години. Во минатата година почна изградбата и на клучката кај хотелот „Континентал“, прва по 25-годишна пауза. Изградбата е во завршна фаза и се очекува до крајот на оваа година да биде пуштена во сообраќај. Градот во клучката инвестираше 2,7 милиони евра. Се изведуваат кружниот тек и проширувањето на улицата Беласица. Пред нејзиното пуштање во употреба ќе биде поставена и сообраќајната сигнализација. Секторот за сообраќај , пред пуштањето во употреба на клучката, со помош на медиумите ќе изврши едукација на учесниците во сообраќајот како ќе се користи сообраќајниот режим.

- Клучката значително ќе го растовари сообраќајот на излезот и на влезот во Скопје, како и низ централниот дел, кон Бит-пазар, Чаир и најтесното централно градско јадро - истакнуваат градските власти.

Градот проширува повеќе сообраќајници. Во моментов се работи на булеварот Гоце Делчев, а се очекува и почеток на изградбата на клучката „Детелинка“, на постојниот натпатник на Бит-пазар. Ќе се пробиваат помали булевари, како што се Македонски војски и Србија. Тоа треба да биде само прва фаза во изградба на големите булевари кои ќе го растоварат сообраќајот во делот на излезот кон Тетово. Ќе се поврзуваат Аеродром и Кисела Вода. Наскоро ќе се проширува крстосницата кај Тутунскиот комбинат. Споменатите проекти треба да завршат до март в година.

Скопје во својата стратегија за подобрување на сообраќајот, ја предвиде и сигнализацијата, одбројувачите, новите лантерни и сообраќајни знаци, жолти ленти за автобуси и слично, воведување алтернативен превоз - трамвај и подобрување на организациските, материјалните и на финансиските перформанси на ЈСП. Сообраќајните решенија, покрај законската обврска за измена на ГУП-от, беа една од основните идеи-водилки за изработка на нов Генерален урбанистички план.

Според МВР, од 310.000 регистрирани возила во целата земја, една третина се од Скопје. Во просек од 25 до 30 незгоди се случуваат секој ден.

Од 1 до 8 септември биле утврдени 233 прекршоци поради истечени возачки дозволи, 212 поради нерегистрирано возило, 79 поради технички неисправно возило и 4 поради несоодветни регистраски таблички. На 10 септември биле утврдени 135 непрописни престигнувања, од кои најголем број биле во Скопје 28, во Велес - 15, Битола - 12 итн.

http://dnevnik.com.mk/?ItemID=C5E5133F96C67F469A22504948BCE85A

На раскрсницата кај Тутунски комбинат ќе има кружен тек

Градските власти моментно не прецизираат датум кога ќе започне изградбата

Раскрсницата на улиците „Пролет“ и „Трета македонска бригада“, кај Тутунскиот комбинат, ќе се прошири за уште една лента во сите правци, заради обезбедување полесен проток на возила, планираат градските власти. Една лента за вртење десно ќе се додаде покрај основното училиште, која ќе продолжи по улицата „Пролет“ до спојувањето со булеварот „Кузман Јосифовски- Питу“. Проширување ќе има и во спротивниот правец кон Аеродром. На тој начин, практично, ќе се изедначат сите правци кои сега ќе имаат по две ленти, со што ќе се намали застојот во движењето на оваа раскрсница, сметаат во Градот.

Истовремено, спроти раскрсницата, триаголникот со мали дуќанчиња каде што се наоѓа и ресторанот „Ив“, во иднина ќе има улога на своевиден кружен тек. Имено, движењето на возилата ќе биде регулирано на тој начин да нема пресечување на правците на движење на автомобилите, како што е случајот во моментов. Според планот на градските власти, движењето лево ќе се избегнува, а возилата ќе се движат десно околу триаголникот.

Во моментов, соопштуваат во Градот, се подготвува сообраќајното решение за привремено пренасочување на сообраќајот додека траат градежните работи, а се очекува и одобрението за реконструкција. Иако беше најавено дека проектот ќе почне во јуни, а ќе заврши на 1 август, градските власти во моментов не прецизираат датум кога ќе започне изградбата. Реализацијата на проектот ќе го чини Градот Скопје 11 милиони денари, а ќе ја изведе „Маврово - Ингра“. (С.Н.)

http://utrinski.com.mk/?ItemID=FDFC904F956E1D4C885A9910ABAD7E6D