Скопски сообраќај (општо)

Почнува проширувањето на булеварот „Гоце Делчев“

Иако беа најавени за јуни, засега нема активности на клучките на Бит-пазар, кај Тутунски комбинат и на „Илинденска“

Сања Наумовска

Проширувањето на булеварот „Гоце Делчев“ ќе започне во текот на неделава, информираат градските власти. Булеварот, на потегот од Судска палата кон новиот мост на Вардар и од другата страна од Скопски саем кон Универзитетот „Свети Кирил и Методиј“, ќе добие уште една сообраќајна лента.

Тоа е првиот од четирите капитални проекти кои беа најавени дека ќе се реализираат летово. Иако беа најавени дека ќе започнат во јуни, засега нема никакви активности околу изградбата на клучките на Бит-пазар, кај Тутунски комбинат или за проширувањето на „Илинденска“. Засега, само за проширувањето на „Гоце Делчев“, Градот добил потврда за новото сообраќајно решение од Министерството за внатрешни работи. Моментно, на терен во тек се подготвителните работи пред да започнат градежните зафати. Се преместуваат канделабрите од зелените површини на кои ќе се проширува булеварот. Светилките привремено ќе бидат преместени во средишното зеленило. Деновиве се очекува да се дислоцираат и билбордите, а се собираат податоци и за подземните инсталации кои се наоѓаат на овој потег. Во Градот соопштуваат дека фирмата која е избрана да го реализира проширувањето е градежната компанија „Конструктор“.

„Градежните работи ќе започнат во текот на следните неколку дена, кога ќе завршат подготвителните работи на теренот. Првично ќе се работи лентата на потегот од Саемот кон Универзитетот. Сообраќајот ќе биде затворен на лентата до рабникот од тротоарот каде што ќе се работи и ќе се пренасочи само по една сообраќајна лента од булеварот“, вели Бранко Андонов од Секторот за урбанизам.

Што се однесува до другите три најавени проекти, во Градот информираат дека се' уште немаат потврда на сообраќајните решенија од МВР. Решението за клучката кај Тутунскиот комбинат било вратено на доработка, а се чека и тоа за Бит-пазар. Според плановите на градските власти, со клучката кај Бит-пазар ќе се избегне секое вртење влево и нема да има потреба од семафори, а изградбата ќе чини 40 милиони денари. Објектот требаше да биде готов во септември, но веројатно тогаш ќе започне изградбата. „Илинденска“ ќе се проширува од фонтаната „Лотос“ до раскрсницата кај Воената болница, а требаше да биде готова до крајот на годината. Проширување со по една лента во сите правци е предвидено да има и на раскрсницата кај Тутунски комбинат.

ВО МАРТ В ГОДИНА

Нов мост ќе го поврзе Сарај со градот

Бетонскиот мост што ќе се гради стотина метри низводно од постојниот Железен мост се очекува да биде готов до март в година

Железниот мост ќе биде затворен за моторен сообраќај и ќе
 го користат само пешаци

На почетокот на септември ќе почнат градежните работи на новиот мост на влезот во Сарај, кој ќе се гради стотина метри погоре од веќе постојниот Железен мост.Според градоначалникот на Општина Сарај, Беким Фазлиу, во тек е тендерската постапка за избор на изведувач на градежните работи. Се очекува дека мостот ќе биде готов до март идната година.Новоизградениот мост ќе биде бетонски, широк од 12 метри. Ќе има две сообраќајни ленти, по една во двата правца и тротоари од двете страни со велосипедска и пешачка патека. На мостот ќе има железна ограда.Проектот за мостот го изработи фирмата „Карпош“ и чини 600.000 денари. Изградбата на мостот ќе чини 30 милиони денари, а парите ги обезбеди Министерството за транспорт и врски.Постојниот Железен мост ќе биде затворен за моторен сообраќај и ќе го користат само пешаци.Уште пред четири години беше предвидено во урбанистичкиот план да се гради овој мост, но поради немање пари тој досега не е изграден. Новиот мост е на погодна локација бидејќи во негова близина се предвидува изградба на средно училиште, универзитет и болница - вели градоначалникот Фазлиу. Повеќе години општинските и градските власти се натегаа околу реконструкцијата на Железниот мост. Конечно, со пари од Владата се дојде до конечното решение да се изгради нов, покрај веќе постојниот мост.

Од Градот велат дека градоначалникот на Сарај, Фазлиу, пред неколку месеци имал средба со скопскиот градоначалник Трифун Костовски, на која го информирал дека Министерството за транспорт и врски му обезбедило средства за изградба на нов мост на влезот во Сарај.На почетокот на годинава извршивме санација на коловозот на постојниот Железен мост во Сарај - велат од одделението за односи со јавноста во Градот. Експертите од Градежниот факултет во Скопје пред повеќе од четири години предупредија дека Железниот мост кон Сарај се наоѓа во лоша состојба и оти треба итно да се преземат мерки за негова реконструкција или за изградба на нов мост. Тие препорачаа мостот да се затвори за тешки товарни возила, што беше и сторено во минатата година.Железниот мост е главната врска на Општина Сарај со центарот на градот и низ него секојдневно минуваат повеќе илјади жители. Освен автомобили, по него сообраќаат и автобуси од јавниот градски превоз и товарни возила.

Анела Петрова

ПОЧНАА ГРАДЕЖНИТЕ ПРОЕКТИ ЗА НАМАЛУВАЊЕ НА МЕТЕЖОТ

Проширување на „Илинденска“ и „Гоце Делчев“ месецов

Имајќи предвид дека се очекува сообраќаен хаос, градските власти, ќе утврдат сообраќајни решенија кон кои граѓаните ќе мора да се придржуваат додека траат градежните работи

Градските власти имаат големи очекувања дека со овие проекти ќе го намалат сообраќајниот метеж во Скопје

Кон средината на месецов градските власти ќе почнат со изградба на клучката-дијамант на Бит-пазар, проширувањето на улицата кај Тутунски комбинат, како и на булеварите Илинденска и Гоце Делчев кај Судската палата. Проширувањето на булеварите е проект од Акциониот план на градоначалникот Трифун Костовски за 2008/2009 година. Од Градот велат дека се завршуваат договорите со фирмите изведувачи на градежните активности. Имајќи предвид дека се очекува сообраќаен хаос, градските власти во наредната недела ќе утврдат привремени сообраќајни решенија кон кои граѓаните ќе мора да се придржуваат додека траат градежните работи.

ЛЕТНИТЕ ОДМОРИ ПОГОДНИ ЗА СТАРТ

- Постапката за почнување на изградбата на клучката-дијамант на Бит-пазар, проширувањето на Илинденска и на булеварот Гоце Делчев, како и проширувањата на потегот кај Тутунски комбинат е во завршна фаза и се потпишуваат договорите со изведувачите избрани на јавниот оглас. Во наредната недела ќе бидат утврдени привремените сообраќајни решенија, а за нив граѓаните ќе бидат известени благовремено за да се намали метежот при реализацијата на овие сообраќајни проекти мошне значајни за граѓаните на Скопје - изјавија од градското одделение за односи со јавноста. Од Градот најавија дека со почетокот на градежните зафати постепено ќе се затвораат улиците. Градежните активности за четирите проекти требаше да почнат во јуни годинава, но од Градот велат дека се одолжиле поради темпирање на времето со почетокот на летните одмори. По промоцијата на привремените решенија, кон средината на јули ќе почне изведбата на четирите проекти, кои треба да се спроведат со предвидената динамика, особено поради фактот дека во наредниот еден и месец се очекува намалена сообраќајна фреквенција поради годишните одмори - објаснуваат градските власти.

ЌЕ СЕ НАДМИНАТ ИМОТНИТЕ ПРОБЛЕМИ

Што се однесува до имотно-правните проблеми со неколку субјекти на Илинденска, од Градот велат дека интензивно разговараат со засегнатите граѓани. Очекуваат во интерес на потребите на развојот на сообраќајната мрежа на градот наскоро да биде најдено решение.Според проектот, предвидено е Илинденска д се проширува од фонтаната кај Градски парк до раскрсницата пред Воена болница. За сите четири проекти, кои ќе се финансираат од градскиот буџет, потребни се вкупно 3,8 милиони евра Во рамките на Акциониот план, освен проширувањето и изградбата на булевари и надвозници, ќе се градат и жардинери со средишно зеленило. За поголема безбедност на пешаците е најавена изградба на натпатници.Градската власт истакнува дека има големи очекувања оти се овие проекти ќе го намали сообраќајниот метеж во Скопје имајќи предвид дека лани за таа цел беше отворен и новоизградениот булевар Словенија, кој ги поврзува Карпош и Бутел, а набрзо ќе биде готова и клучката кај „Континентал“.