Скопски сообраќај (општо)

НОВИ КОЛОВОЗНИ ЛЕНТИ ЗА ПОМАЛ СООБРАЌАЕН МЕТЕЖ

„Илинденска“ и „Гоце Делчев“ ќе се прошируваат во јуни

Летово, како дел од Акциониот план на градоначалникот Костовски, ќе биде проширена и крстосницата кај Тутунскиот комбинат и ќе биде изграден нов надвозник кај Бит-пазар

Градските власти од наредниот месец со полна пареа ќе почнат градежна офанзива во Скопје. Ќе се прошируваат булеварите Илинден и Гоце Делчев, како и раскрсницата кај Тутунскиот комбинат и ќе се гради надвозникот кај Бит-пазар, кој ќе има форма на детелина. За поголема безбедност на пешаците, ќе бидат изградени повеќе натпатници. Од Градот велат дека со овие градежни активности Скопје ќе добие пошироки улици, нови тротоари и жардиниери со зеленило на средината на булеварите. Проширувањето на сообраќајниците се првите активности од Акцискиот план на градоначалникот Трифун Костовски за 2008 и 2009 година.Во тек се постапките за избор на изведувачи, кои се при крај. До крајот на мај ќе бидат избрани изведувачите на клучката детелина на Бит-пазар и на проширувањата на булеварите Гоце Делчев и Илинденска и на крстосницата кај Тутунски. Спроведуваме и тендерска постапка за избор на изведувач за средишните зеленила за седум булевари. И овој јавен повик треба да заврши до крајот на мај. По затворањето на јавните набавки, веднаш ќе почне реализацијата на проектите, според предвидената динамика - објаснуваат од Градот. Паралелно со новите градежни активности, ќе се одвиваат и неколку стари проекти, кои се почнати лани или пред неколку месеци. Тоа се пробивањето на булеварите Србија и Македонска војска, како и изградбата на клучката кај „Континентал“. Кај пробивањата на булеварите има извесни задоцнувања од административен карактер, меѓутоа деновиве очекуваме работите да почнат со полна пареа и многу брзо да заврши изградбата. Проблем се појави на булеварот Македонска војска во Ѓорче Петров со дислокација на еден привремен објект на Јавното претпријатие за стопанисување станбен и деловен простор, од каде што бевме замолени да почекаме некое време - објаснуваат надлежните. Градските власти велат дека и проектот за изградба на натпатници е веќе готов. Избрале два вида, кои ќе бидат поставени над некои улици и булевари, но се' уште не откриваат над кои. Пред да бидат поставени натпатниците, Градот ќе се координира со општините. Унифицирани се два вида натпатници, бидејќи магистралните улици се разликуваат според широчината и средишната структура. На пример, за локацијата кај Бит-пазар е предвиден типот на натпатник за улици со помал профил и без средишно зеленило, а за булеварите како што е „Партизанска“ се предвидени натпатници од друг тип. Тоа е затоа што „Партизански одреди“ има поширок профил и средишно зеленило во кое не можат да се поставуваат носечки столбови за преминот - велат во Градот. Се очекува проширувањето на улиците и изградбата на нови да го намалат сообраќајниот метеж во Скопје.

Јорданка Ивановска

http://www.dnevnik.com.mk/?ItemID=0B42C30FBF4F6449A42279D69C1A4CFD

ИЗВЕШТАЈ НА СВР СКОПЈЕ ЗА БЕЗБЕДНОСТА ВО СООБРАЌАЈОТ ВО 2007 ГОД

Партизанска и Првомајска најнебезбедни улици

Главни причини за сообраќајните несреќи се брзо возење, непочитување на првенство на минување, неправилното свртување и возење наназад и неправилното движење на пешаците

Булеварот Партизански одреди и улиците Илинденска и Првомајска се најнебезбедните сообраќајници во Скопје и важат за црни точки. Таму лани се случиле најмногу сообраќајни несреќи во кои повеќе граѓани загинаа, а десетици беа повредени. Од Секторот за внатрешни работи - Скопје како најчести причини за сообраќајните незгоди ги посочуваат брзото возење, непочитувањето на правилата на првенство на минување, неправилно свртување и возење наназад, како и неправилното движење на пешаците. Според документот, кој утре треба да биде усвоен на седница на Советот на Градот Скопје, лани во градот и во околината се случиле вкупно 9.411 несреќи, од кои 1.551 со потешки последици. Шеесет луѓе го загубиле животот, а 2.298 биле повредени. Во 100 случаи виновни биле пешаците,кои се движеле непрописно. Според согледувањата за 2007 година, најзагрозени беа фреквентните улици и булевари. На булеварот Партизански одреди лани имаше 44 сообраќајни незгоди, во кои беа повредени 52 лица. На „Илинденска“ се случија 39 сообраќајки, во кои едно лице загина, а 60 беа повредени. Тројца граѓани загинаа на „Првомајска“, каде што се случија 34 несреќи, а 49 лица беа повредени - се вели во извештајот.

БРЗО ВОЗЕЊЕ И БАВНИ ОРГАНИ

Улицата Првомајска со години важи за една од поопасните улици во градот. Особено откако пред неколку години беше обновена и проширена во делот на населбата Кисела Вода. Таму се вози брзо и непрописно се претекнува, исто како и на делот од „Првомајска“ кон Драчево. Овој дел остана необновен, темен и тесен.  Несовесните возачи престигнуваат на полна линија, возат со расипани фарови, а чести причинители на незгоди се и многуте запрежни коли и велосипедистите, кои возат без светла. Со години бараме Градот Скопје да изгради улично осветление на улицата кон Драчево - вели Ц.З., жителка на Драчево.На „Партизанска“ со децении најмногу страдаат пешаците, поради несовесните возачи што возат брзо и не застануваат на пешачки премин. По целиот булевар, од Центар до Ѓорче Петров, со години се случуваат сообраќајки и поради трките што несовесни граѓани ги организираат доцна навечер, кога возат многу брзо и не застануваат на црвено светло на семафорите. Скоро секоја вечер ги слушаме како се тркаат со возила и со мотори. Намалуваат и зголемуваат гас и не' вадат од памет. Тоа не е ништо ново, а органите ништо не преземаат - вели жител од Центар.Градските власти најавија дека ќе ги заштитат пешаците со тоа што годинава ќе изградат надземни пешачки премини на повеќе булевари.

СЕКОЕ ПЕТТО ВОЗИЛО Е НЕИСПРАВНО

Во извештајот на СВР-Скопје е посочено и дека секое петто возило од оние на кои им била извршена контрола е технички неисправно, а секој 22-ри возач бил пијан. Контролирани се вкупно 186.869 возила, при што е утврдено дека 37.281 биле технички неисправни. Од безбедносни причини од сообраќај се исклучени 512 неисправни и 6.606 нерегистрирани возила. Од околу 195.000 возачи, со алкотест беа проверени 10.111 возачи. За 8.877 од нив е утврдено дека консумирале алкохол - се вели во извештајот.

Јорданка Ивановска