Градска инфраструктура (општо)

Жителите на Кленоец во кал до колена

Шест месеци чекаме да направат улица од 200 метри, велат жителите од Влае, а од општина Карпош објаснуваат дека се во тек повеќе инфраструктурни зафати на тој дел и најавуваат дека од 15 март ќе почне и асфалтирањето

Жителите од околните згради кај улицата Кленоец, во населбата Влае, во Скопје, се жалат дека веќе шест месеци живеат во неподносливи услови, во кал до колена, бидејќи не им се асфалтирани пристапните улици. Тие реагираат и на тоа што постојано нешто се копа, се прекопува, а инфраструктурата практично не се гради.

- Иако две години сме вселени во зградите, с` уште ставаме најлонски кеси на нозете за да можеме да стигнеме до асфалтот, кој е на педесетина метри. Секој копа, раскопува, никој не затрупува. Колите ги паркираме во кал. Додека надлежните си ја префрлаат топката едни на други, се давиме во кал. Ние уредно плативме комуналии кон општината и државата, плативме и данок на промет при купувањето на становите - реагираат жителите.

Граѓаните од Влае прашуваат зошто на надлежните им е потребно толку време за да се направат улиците кога нивната вкупна должина не е повеќе од 200 метри.

Велат дека ако за овие шест месеци се асфалтираше по еден метар дневно, досега ќе беа готови.

Од општина Карпош објаснуваат дека во тој дел во континуитет се вршат интензивни градежни работи, бидејќи станува збор за комплекс од нови згради и дека со почетокот на градежната сезона на 15 март ќе почне и асфалтирањето.

- Ова е голем градежен комплекс, се прават фекална и атмосферска канализација, а ќе се менуваат и тротоарите на улицата Кленоец, која ќе биде комплетно реконструирана. Досега поставивме топловод на новопроектирани улици, но и на улицата Кленоец. Сега се изведува секундарен вреловод на новопроектираните улици, а за тоа е потребно време - изјави Виолета Цветковска, портпарол во општина Карпош.