Даниела Трајковска

Откако се реновираше скопската Зоолошка градина и се збогати со животни, конечно, се најавува и целосна реконструкција на нејзиниот влез. Надлежните велат дека ќе се обнови влезната страна, при што билетарницата ќе остане од десната страна, додека во просторијата која што се наоѓаше од левата страна ќе се отвори продажен салон на тобакото „Тугедр“. Ќе се постави современо изработен натпис „ЗОО Скопје“, а влегувањето ќе биде целосно стандардизирано со светските влезови, односно ќе се влегува низ влезни пултови како оние во маркетите. Санацијата на влезната страна уште пред некое време беше најавено дека ќе се реализира со помош на донатори. - Заедно со Министерството за култура решивме преку тендер за јавно наддавање да ја понудиме просторијата бидејќи тие се сопственици на тој простор. При тоа условот беше тој што ќе го добие тендерот целосно да го реконструира влезот во градината. Тендерот го доби продажниот салон „Тугедр“ кој што уште денес ќе почне со реконструкција - изјави Дане Кузмановски, директор на Зоолошката градина. Според него, до први ноември целиот тој простор ќе биде речиси завршен, освен влезот низ кој ќе минуваат посетителите каде ќе треба да се работи малку подолго. - Влезовите ќе бидат како на сите светски влезови бидејќи целосно ќе биде сменет и начинот на кој што ќе се влегува во Зоолошката. Меѓутоа, реализацијата ќе трае малку подолго затоа што потребните елементи за да се направат влезовите, треба да се набават од Канада - додава Кузмановски. Како што вели тој, не брзаат премногу со овој дел кој е и најкомплициран за изработка бидејќи во зимскиот период бројот на посетители и онака е помал. Покрај ова, Зоолошката градина продолжува со своите активности, па така веќе е во подготовка проектот „Едукација за потребата од сепарирање и собирање отпад“ кој, всушност, е екопрограма наменета за деца од предучилишна и од училишна возраст. Во рамки на овој проект ќе се реализираат кратки предавања, ќе се поставуваат канти за сепарирање на отпадот, ќе се одреди определен надомест од страна на фабриките за рециклажа за оние што ќе учествуваат во процесот на собирање отпад, ќе се организираат масовни манифестации од забавен и од едукативен карактер, и многу други активности. Проектот, како што информираа од ЗОО, ќе трае една училишна година, а ќе се набавуваат два вида канти. Едни во форма на детски играчки за сепарирање отпад, а други во форма за животни, кои заедно чинат околу 850.000 денари.

Даниела Трајковска

Откако надлежните почнаа да ја обновуваат Зоолошката градина, но и откако во неа се збогати фондот на животни, граѓаните покажаа голем интерес за прошетка низ неа, па, речиси, секој викенд, кога временските услови го дозволуваат тоа, се чекаат редици за билет. Она што како новитет се нуди во Зоолошката градина, освен новите и многубројни животни, во целосно реконструирани кафези, е и можноста тука да се прослави роденденот, а во неа почнаа да се организираат и екскурзии за дечињата од градинките и за најмалите основци. - Навистина е убаво што можат да ги прошетаат децата во Зоолошката градина. Еве, ќерка ми беше вчера. Заедно со наставничката се запознавале со животните, со опасноста која што може да се појави при средба со дивите животни, учеле во кој вид спаѓаат, што јадат и слично - вели Весна Т., мајка на едно од дечињата. Според директорот, Дане Кузмановски, неодамна решиле да достават понуди до градоначалниците на скопските општини, кои потоа треба истите да им ги претстават на директорите на градинките и на училиштата, со цел да се запознаат со можноста за организирање еднодневни екскурзии за учениците, но и дечињата во градинките. - Понудата ја доставуваме до градоначалниците затоа што тие се главните кои раководат со општинските училишта - вели тој. Кузмановски додава дека овој проект ќе се организира и за другите градови низ Македонија, откако ќе заврши во скопските општини. - Интересот е огромен. Децата се презадоволни од посетата на зоолошката градина. Во зависност од временските услови, дневно се случува во посета да имаме по две-три школи и градинки, но, понекогаш, кога времето е лошо, посетите се откажуваат - вели Кузмановски. Според него, едукаторите од градината се задолжени за соработката на зоолошката со надворешните институции. Со нив најмладите при посетите се едуцираат за животинскиот свет, заедно ги хранат животните и слично. Покрај тоа што се организираат еднодневни посети на зоолошката градина, неодамна е отворена и можноста децата да ги прославуваат родендените во градината. Отворено е кафуле, кое функционира како игротека, каде што славениците со другарчињата добиваат бесплатно запознавање со животните, со помош на едукаторите. Исто така, со нив се шетаат низ зоолошката, ги хранат животните, јаваат пони, со што роденденот го минуваат на многу поинаков начин од оние што вообичаено се организираат. - Коњчињата „пони“, за жал, не се наши, туку се надворешни. Нашите мали коњи се дресираат за да се навикнат на седлото, но и на јавачите - вели Дане Кузмановски. Како новитет, тој го најавува и малиот воз, со кој најмладите ќе се возат низ градината, кој е репариран, меѓутоа, се уште не е пуштен во употреба. Инаку, во градината наскоро треба да пристигнат две двојки тигри, две птици „ему“, два папагала „ара“ и два пара кенгури. - Единствено немаме слон и жирафа, меѓутоа, работиме на тоа што поскоро да ги донесеме и овие животни - вели тој.