Спомен куќа на Мајка Тереза

ИЗГРАДБАТА НА СПОМЕН-КУЌАТА НА МАЈКА ТЕРЕЗА Е ВО ПОЛН ЕК

Светлината на Блажената го грее градилиштето

Изградбата на овој објект не ни е само предизвик, туку работа што ја извршуваме со многу љубов и посветеност. Можеби за вас е неверојатно, но додека градиме сите ние ја чувствуваме енергијата и светлината која зрачи од објектот - вели еден од градежниците и додава дека градилиштето е многу атрактивно за странските туристи кои дури земаат и парче градежен материјал за спомен

Спомен-куќата на Мајка Тереза, која пред четири месеци почна да се гради пред Домот на АРМ, ќе биде готова за еден месец. Деновиве беше поставена првата плоча, а во тек се подготвителните работи за леење на плочата на потпокривот. Градежните екипи од Гранит велат дека првично предвидениот рок од пет месеци целосно ќе биде испочитуван, па затоа понекогаш работат и во трета смена.
- Изградбата на спомен-домот на Мајка Тереза не ни е само предизвик, туку работа што ја извршуваме со многу љубов и посветеност. Можеби за вас е неверојатно, но додека градиме сите ние ја чувствуваме енергијата и светлината која зрачи од објектот - вели еден од градежниците и додава дека градилиштето е многу атрактивно за странските туристи. "Доаѓаат посетители, се распрашуваат, сакаат да знаат кога ќе биде целосно готова, а странците земаат камче или парче градежен материјал за спомен, вели нашиот соговорник.

Музејот се гради според идејното решение на архитектот Вангел Божиновски на парцела од 1.000 квадрати, врз темелите на некогашната католичка црква "Пресвето срце Исусово", од каде што Гонџа Бојаџиу тргнала во хуманитарните мисии низ светот. Самата градба претставува многу атрактивен спој на световната и на духовната природа на Мајка Тереза. Има два подземни катови, приземје и потпокрив кои се необичен спој на македонската традиционална архитектура и футуристички елементи изработени од витражно стакло и кристал. Во внатрешноста ќе има аквариум во форма на цилиндар, во кој ќе пливаат златни рипки, како потсетување на бунарот во куќата во која живеела Мајка Тереза. Куќата има мултифункционален карактер со делови наменети за одржување на разни културни манифестации, со галериски простор, за духовни обреди. Од Стојан Тренчевски од Граѓанската асоцијација Мајка Тереза, којшто го затекнавме на градилиштето, дознавме дека витражот и панорамската купола се нарачани и веќе се изработуваат во Италија.

За два месеца ќе биде готова куќата на Мајка Тереза

Објектот е стасан до првата плоча на приземјето, деновиве ќе се бетонираат ѕидовите

Два месеца од почетокот на изградбата на спомен-куќата на Мајка Тереза, објектот е стасан до изведба на првата плоча на приземјето. Деновиве е предвидено да се бетонираат ѕидовите. Градежните работи се одвиваат според планот на инвеститорот - Министерството за култура - и се очекува објектот да биде готов до средината на октомври. Левко Манчевски, раководител на проектот што го изведува АД „Гранит“, вели дека е задоволен од досегашниот тек на активностите и посочува дека засега на теренот не се појавиле некои поголеми непредвидени проблеми.

„Два-три дена задоцнивме со почетокот на изградбата поради неопходната дислокација на водоводната и телекомуникациската инсталација, но сето тоа се надомести. Се работи секојдневно, па дури и за време на викенди“, вели Манчевски. Тој укажува дека спомен-куќата ќе биде единствениот објект не само во Скопје, туку и во државава изведен делумно со специфични материјали. Станува збор за стаклата, делот од фасадата и топката што ќе се постави на врвот од објектот, која најверојатно, ќе биде донесена од Колорадо. Објектот ќе поседува и специфична конструкција, која во делови се изведува како еден вид скулптура.

Инаку, проектот за спомен-куќата на Мајка Тереза, чиј автор е архитектот Вангел Божиновски, предвидува објектот да има подрум, приземје, кат и потпокрив изградени во духот на македонската архитектура. Куќата ќе зафаќа површина од 592 квадратни метри и околу неа ќе има плоштад и двор. Инвеститор на објектот е Владата, односно Министерството за култура кое инвестира околу два милиона евра. (Дс.Т.)

Хрватскиот амбасадор во земјава Иво Кујунџиќ вчера положи свежо цвеќе пред Споменикот на Мајка Тереза, а потоа ги посети Феудалната кула и градилиштето на спомен-куќата за големата хуманитарка пред Домот на АРМ во центарот на Скопје. Кујунџиќ рече дека е добар гест тоа што Владата на Република Македонија ја финансира изградбата на спомен-куќата на Мајка Тереза и оти тоа е доказ за отвореност кон мултикултуралноста на Македонија. Тој рече дека и Владата на Република Хрватска помага вакви значајни проекти, како што е изградбата на оргулите во Католичката црква во Скопје, која се надева дека ќе заврши до крајот на годината.
Градежниците од "Гранит" го информираа амбасадорот дека немаат проблеми при изградбата и дека спомен-куќата ќе биде готова во предвидениот рок од четири месеци кои истекуваат во септември. (Е.А.)

http://www.vest.com.mk/default.asp?id=153941&idg=8&idb=2419&rubrika=Skopje