Со сончеви колектори ќе заштедат и граѓаните и државата

За да загреете 400 литри вода дневно, колку што приближно се потребите на четиричлено семејство, треба да потрошите меѓу 1.100 и 1.700 евра за поставување целосен систем

Со поставување фотоволтаични сончеви системи, сопственикот може сам да си произведе струја

Како да ги намалиме сметките за струја?

Поскапувањата на струјата и најавите за нејзин понатамошен пораст може да бидат поттик граѓаните да поставуваат сончеви колектори со кои ќе ги намалат своите сметки за струја. За да го зголеми интересот Министерството за економија неколку години доделува државни субвенции за 300 семејства. Неодамна министерот Ваљон Сарачини најави дека во банките ќе бидат договорени зелени кредити, кои ќе се однесуваат само за вакви зафати. Со досегашните субвенции државата покриваше 30 отсто од трошоците на домаќинствата, но не повеќе од 300 евра. Што значи дека годишно во овој проект се инвестираат околу 100.000 евра. Експертите велат дека заштеда на едно домаќинство е околу 200 евра годишно на сметките за струја, па доколку сите домаќинства во земјава инвестираат во колектори, ќе се заштедат 80 милиони евра годишно за струја, благодарение на енергијата што ни ја дава сонцето. 

Системите Ччинат од 1.100 до 1.700 евра

Еден систем за обезбедување топла вода за четиричлено семејство со бојлер од 150 литри чини од 1.100 до 1.700 евра во зависност од потребите и од желбите на муштериите. Со ваков систем се обезбедува топла вода за сите бојлери во домаќинството, како и топла вода за машините за перење алишта и за миење садови. Во просек, едно четиричлено семејство користи 300-400 литри вода дневно за своите потреби. Бидејќи водата се користи 30-40 отсто загреана, со споменатото количество има доволно топла вода во текот на целиот ден. 

- Системите се најискористливи од март до октомври или до ноември. Во зимските месеци сѐ зависи од продорот на сончевите зраци. Со најновите панели што се појавуваат на пазарот има можности и во зимскиот период да се загрева вода, секако ако има доволно сонце, но таа мора да се пригрева - вели Илија Чулев, сопственик на компанија за поставување и одржување сончеви колектори „Етерна солар“. Неговата компанија обезбедува гаранција со бесплатен сервис и одржување за поставениот систем седум години, по што се наплаќа за одржување 10 проценти од вредноста на системот. 

- Пред неколку месеци со нас контактираше семејство на кое му имаме поставено сончеви колектори пред 17 години, за да направиме ситен сервис. Системот функционираше беспрекорно, ние само го исчистивме, без никакви поправки - истакнува Чулев. 

Топлата вода во бојлерите се задржува и во текот на ноќта, кога сонцето не ги загрева панелите. Доколку времето е облачно, а има загреана вода, таа останува топла 24 часа. Во случај кога подолго време е облачно, односно кога има мал продор на сончева светлина, повторно се грее водата, бидејќи панелите апсорбираат од сончевите зраци. Доколку клиентите сакаат поголем комфор и редовно топла вода, можат да постават двојно повеќе колектори и бојлер со кои ќе биде обезбедено поголемо количество на топла вода, но за тоа секако ќе треба да платат двапати повеќе. 

- Користиме исклучиво сончеви панели од европско потекло со висок квалитет, најчесто од Германија, Словенија и во Италија. Исто така соработуваме со Халк банка и на клиентите им нудиме попуст на цената доколку кредитот го земат кај нив - вели Чулев, додавајќи дека средствата се враќаат за 5-6 години, во зависност од големината на системот. 

Досега искористеноста на сонцето на дневна база од сончевите панели била до 14 проценти, а со најновите панели се опфаќаат 33 проценти од сончевите зраци. Најчесто системи за загревање вода преку панели поставуваат сопственици на куќи, поретко се сопственици на станови, кои доколку не се на поткровје, треба да обезбедат согласност од соседите за поставување цевки за проток на водата. 

Фотоволтаични колектори за викенд-куќи

Со поставување фотоволтаични сончеви системи, сопственикот може сам да си произведе струја, но тоа задоволство ќе ги чини многу повеќе отколку инсталирање соларни колектори за загревање вода. Имено, со инсталиран фотоволтаик од 1 киловат, на годишно ниво има можности да се добијат од 1.300 до 1.500 киловат-часа електрична енергија. Додека за неговата инсталација клиентот ќе треба да обезбеди 1.800 евра. Дневните потреби од електрична енергија за едно четиричлено семејство се движи од 8 до 10 киловат-часа електрична енергија. 

- Фотоволтаиците повеќе се препорачливи и искористливи во бизнис-секторот. Имено, компании што имаат поголема потрошувачка на електрична енергија можат да си постават фотоволтаици. Друга варијанта е граѓаните што поставуваат фотоволтаици да договорат таа да ја продаваат на МЕПСО по повластена тарифа - вели Влатко Стојановски, консултант од компанијата „ИТ логистик“. 

Тој истакнува дека неговата компанија користи исклучиво европски производи, бидејќи имаат поголем квалитет и обезбедуваат гаранција до десет години. 

Стојановски истакнува дека со сегашната цена за електрична енергија помалку исплатливо е фотоволтаиците да се поставуваат на индивидуални градби, иако и таа опција не се исклучува. Според него, тие се доста исплатливи за викендички што се пооддалечени од дистрибутивната мрежата на ЕВН и за чие приклучување ќе бидат потребни многу финансии.