Урбана опрема

Роза Петкова

Скопјани ги заборавија градските часовници и денес речиси никој не погледнува кон нив затоа што и не очекуваат тие да покажуваат точно време. Овие направи одамна не ја исполнуваат нивната вистинска функција поради која се поставени. Иако повеќе пати се местат, неколку од нив останаа неприклучени и никогаш не проработија, а повеќето и сега не се наместени да покажуваат точно време. Власта се менува, а часовниците во ниту еден мандат не проработија како што треба. Наместо да бидат препознатлив дел од градот, тие се претворија во убава, но некорисна декорација бидејќи надлежните не успеаја да се грижат за нив. Уличните часовници главниот град ги доби како донација од „Скопска пиварница“, а после долгиот период на неработење, скопјани веќе заборавија дека постојат. Постарите скопјани ги паметат и поранешните квадратни часовници, кои од сите четири страни имаа стрелки, но исто така никогаш не покажуваа исто време. Градската администрација вели дека е во тек изборот на фирма која ќе ги одржува часовниците, но не прецизира кога ќе биде тоа. Оттаму објаснија дека 20 часовници наследиле од претходната власт. Од нив поголемиот дел не биле во функција, па затоа Градот со свои средства ангажирал фирма да ги одржува часовниците и обезбедил довод на струја за тие што не биле приклучени. - Тие редовно се одржуваат, се врши замена на деловите што не работат и се местат според летното и зимското сметање на времето. Во моментов, не функционираат само два градски часовници поради тоа што за нив нема соодветна инсталација “ објаснуваат од Одделението за односи со јавност на Град Скопје. Различното време што го покажуваат часовниците властите го правдаат со лошите временски услови. Тие велат дека во изминатите денови зголемената влажност влијае врз механизмите во часовниците, па неколку од нив не покажуваат точно време. - Овој недостаток ќе се отстрани во најскоро време. Во тек е јавна набавка за избор на фирма што ќе биде задолжена за одржување и за местење на часовниците за оваа година. По изборот на сервисерот сите градски часовници ќе се наместат и ќе покажуваат исто време “ вели градската администрација. Донацијата од „Скопска пиварница“ броеше 30 часовници наменети за центарот на градот и скопските населби, а од нив само дваесетина се поставени. На тендерот од минатата година за нивно одржување беше избрана фирмата „М-плус“.