Зоолошки градини во Македонија

СКОПЈАНИ ЖЕДНИ ЗА НОВО ЗАБАВНО КАТЧЕ

Ред за влез во Зоолошката градина

И во саботата и во неделата, пред билетарницата имаше огромен број посетители кои трпеливо чекаа и по петнаесетина, дваесет минути за да купат влезница и да ги видат новите атрактивни станари на градината - двата нови кенгури и седумте мајмуни со прстенести црно-бели опашки од видот лемури

Скопската Зоолошка градина викендов беше дефинитивно најпосетеното место во градов. И во саботата и во неделата, пред билетарницата имаше огромен број посетители кои трпеливо чекаа и по петнаесетина, дваесет минути за да купат влезница и да ги видат новите атрактивни станари на градината - двата нови кенгури и седумте мајмуни со прстенести црно-бели опашки од видот лемури.

Повозрасните не паметат кога имало толку гужва на ова место. Од медиумите се информирале дека Градината има нови животни за кои се изградени автентични живеалишта и дошле да го видат тоа со сопствени очи.
- Не паметам дека во изминативе дваесетина години имало толку посетители. Живеам на десетина минути одовде, а првпат после две години ја носам внука ми зашто последниот пат беше толку валкано и смрдливо, кафезите се распаѓаа, а животните беа толку тажни и прегладнети што прошетката наместо задоволство, ни испадна траума на двајцата. Сега гледам сликата се менува, ни рече еден од повозрасните посетители.

Во градината, навистина се чувствува мал напредок. Уште на влезот може да се забележи нова атмосфера, нови живеалиштата, патеки, но и вработени облечени во уредни униформи кои го чуваат редот.

Од неодамна во скопската ЗОО живеат два кенгура, а од пред неколку дена во новите, специјални живеалишта први станари се седум мајмуни со црно-бели опашки и ококорени очи кои децата ги препознаваат како лемурите од цртаниот филм Мадагаскар. Тоа се, всушност, првите мајмуни од ваков вид во скопската ЗОО и се подарок од зоолошката градина во Амстердам.
Од лани Зоолошката константно се подготвува за пристигнување на новите животни. Во следниот период се очекуваат уште нови животни, како пар тигри, пар зебри, два пара антилопи, пар црни лебеди. Исто така, во тек е големата акција за подобрување на условите за живот на старите станари, а се градат и детски игралишта за најмладите посетители.

(Е.А.)