Урбана мафија и дивоградби (општо)

Покојници ќе градат надградба во Карпош

Станарите од Никола Тесла 8 дознале дека во времето на градоначалникот Сашо Димиќ било издадено решение за надградба на зграда на инвеститор што плаќал комуналии на име на луѓе што не му дале согласност

Во Карпош излегуваат на видело сомнителни градежни одобренија од времето на в.д. градоначалникот Сашо Димиќ. Служби и поединци потпишувале и издавале решенија за надградби на неколкудецениски стари згради, без да се запази целосно правна постапка, и тоа во време на избори. Освен одобрението за сомнителна надградба на зграда на улицата Даскал Камче од пред два месеца, кој го обелодени градоначалникот Стевчо Јакимовски и кое падна на Управен суд, сега има ист таков нов случај, на улицата Никола Тесла број 8 во Карпош 1. Заедничко за двата случаја е што како инвеститор се јавува извесен Тони Вељановски, потврдуваат во Општина Карпош. За случајот на улицата Никола Тесла информираат самите станари од зградата кои не ставиле потпис за градење надградба, а се водат како градители. Револтирани и гневни на ваквиот башибозук, изминатава недела се растрчани во Општината, со цел да истераат правдина и да се укине одобрението за надградба на нивната зграда, градена пред земјотресот.

- Зградата е нестабилна и тоне в земи. Тоа беше случај со многу згради во Карпош поради подземните води. Наместо да собереме пари и да ја зајакнеме зградата, дознавме дека за време на избори било издадено некакво одобрение за надградба, и тоа за еден кат, на кој ќе има 15 стана. Не го познаваме инвеститорот. Од надлежните добивме фотокопии за платени комуналии и останавме вџашени кога видовме дека тие се уплаќани на наше име, без ние да знаеме за такво нешто. Потписите на уплатниците не се наши и речиси сите се иницијали. На некои уплатници се водат како градители и починати лица, наши поранешни соседи - изјави И.К., еден од станарите на зградата на „Никола Тесла“. Тој објаснува дека она што ги плаши, освен нефункционирањето на правната држава, е и стабилноста на зградата. Таа е сериозно доведена во прашање, имајќи предвид дека објектот е веќе нестабилен поради тоа што станарите од првите катови пред некоја година пробиле влезови кај терасите, при што урнале носечки ѕидови. Од Општината изјавија дека целата постапка за издавање на ова одобрение е деликатна. Инвеститорот платил комуналии на име на оние што не му дале согласност, а под прашалник го ставаат и квалитетот на приложената сеизмичка студија.

- Студија за остварен квалитет на сеизмичка заштита на објектот нема. Има дадено некоја статика, но тоа не е тоа што треба да биде. Според нашите сознанија од Секторот за урбанизам, инвеститор на надградбата е Тони Вељановски, кој добил согласност од повеќе од 51 отсто од станарите, односно од 45 станари во три влеза, овластување му дале 28, а 17 станари не дале согласност, но тој платил комуналии и за тие што му дале и за тие што не му дале согласност - изјави Виолета Цветковска, портпарол во Општина Карпош. Во одобрението за градба, објаснуваат оттаму, стои дека на станарите од зградата им се одобрува доградба на тераси, а на инвеститорот Вељановски искористување на таванскиот простор за изградба на потпокривни станови.Сепак, она што е вистинска дупка во целата процедура и остава место одобрението да падне на Управен суд е зошто на станарите не им била оставена можност за жалба, туку станало правосилно неколку дена по издавањето.

- Решението станало правосилно на 3 април 2009 година. Тоа е во ред можеби за Тони Вељановски и тие што го овластиле, но не и за оние 17 луѓе што имаат право на жалба, а згора, не му дале овластување да гради и да уплаќа во нивно име. Токму тие сега со право реагираат - изјавија општинарите. Од таму тврдат дека Карпош нема да заличи на Кисела Вода, Дебар маало, Аеродром, Центар, каде што владее војна за профит и врие од корупциски скандали.  Нема да дозволиме да се повторат споменатите негативни искуства по скопските општини. Тоа дефинитивно е став и стратегија на новиот менаџмент и пред се' на градоначалникот на Општина Карпош, Стевче Јакимовски - изјави портпаролот Цветковска.

Јорданка Ивановска

Балконот на соседите од зградата што е спроти нашата е во непосредна близина до нашиот. Кога ќе седнеме на терасата да се напиеме кафе со сопругот, се чувствувам дури непријатно зашто изгледа како да им ѕиркаме во станот. Всушност, тоа и не е далеку од вистината зашто гледаме директно во нивните прозорци. Затоа и се поретко, откако ја изградија соседната зграда, го користиме балконот, раскажува Наташа Мартиновска, која живее во централното градско подрачје. Голем дел од скопјани, особено тие што живеат во новоизградените згради подигнати на мали простори каде некогаш се наоѓале куќи, се соочуваат со овој проблем. Велат дека им е нарушена приватноста и интимноста на семејниот дом, па најчесто живеат со спуштени ролетни, скриени од погледите на соседите, а и за нивните комшии да го немаат истото чувство. - Најлошо е навечер кога ќе се запалат светлата зашто при секое поминување до прозорецот се гледа што прават соседите. Навистина е непријатно и не ми е јасно кој дозволува да се гради на ваков начин - револтирана е Наташа. Иако Законот за градба, за изградба на станбени згради една спроти друга има низа одредби за тоа како да не им се навлегува во домашната атмосфера на првите соседи, сепак во Скопје ретко кој ги почитува поради густото населување на просторот во Градот. Архитектот Никола Велковски вели дека при изградбата на станбен објект постојат многу прецизни правила за тоа како треба да изгледа една зграда, но и за тоа колкава оддалеченост треба да се наоѓаат еден од друг објект. - Според урбанистичките планови, една зграда од друга зграда треба да бидат оддалечени најмалку една и пол висина, односно ако едната зграда е висока десет метри, новата зграда којашто треба да се гради во нејзина непосредна близина треба да биде оддалечена најмалку 15 метри “ објаснува Велковски. Според него, ова треба да го почитува секој инвеститор за да се избегне создавањето вештачка сенка врз објектите, а со тоа и принудно да им се скратува сончевата светлина на станарите. Велковски вели дека доколку зградите се градат на такво растојание, нема да им се одзема ниту приватноста на станарите коишто живеат едни спроти други. - Сепак, кај нас ретко кога се почитува тоа растојание за градба поради малиот простор на кој се градат поголеми станбени објекти “ вели Велковски.

Се урива доградбата на ресторанот Езерце во Скопје

Општина Центар денеска започна со уривање на доградбата на ресторанот Езерце, лоциран во Градскиот парк во Скопје.  Оваа мерка како што информираат од општината била преземана, бидејќи закупецот не престанал со градежните работи околу реконструкција на објектот.

“Градежниот инспекторат при општината испрати решение до закупецот да престане со реконструкција на објектот. Но, бидејќи од негова не беше прекината реконструкцијата вчера беше донесено ново решение да се извршено рушење“, изјави портпаролката на општина Центар, Лидија Неделковска.

Во лиферуваното соопштение стои дека со оваа постапка Општината го штити сопствениот имот, бидејќи овој деловен објект е во сопственост на Општина Центар. Наемопримателот по своја иницијатива без никакво одобрение неодамна започна да гради на општинскиот имот. Денешната акција треба да претставува порака дека во Општина  Центар не се толерираат било какви градби без дозволи и веднаш истите ќе бидат санкционирани од страна на Општината.

"Езер­це" рас­те, Оп­шти­на Цен­тар ми­жи

До­де­ка ин­тен­зив­но се ра­бо­ти на ка­фе­а­на­та, и пок­рај тоа што има ре­ше­ние за заб­ра­на на гра­деж­ни­те ак­тив­нос­ти, од­го­вор­ни­те од Оп­шти­на­та ни­ка­де ги не­ма за да ка­жат што ќе пре­зе­мат