Мост на цивилизациите во Македонија (Мост Око)

Мостот „Око“, за кој беше удрен камен - темелник уште во септември, ќе почне да се гради следниот месец, кога, според ветувањето од фирмата-изведувач, ќе пристигне нова специјална машина. Со современата механизација треба да се направат 18 столбови на кои ќе се потпира конструкцијата на мостот. - Градежната фирма „Конструктор Сплит“ понуди побрза технологија за изградба на која нема да влијае тоа дали водостојот на Вардар е висок или низок. Станува збор за изградба на бунари, кои потоа се полнат и се добиваат темелите за мостот. Тие ќе бидат со пречник од 1,8 метри. По четири од нив ќе се изградат под кос агол од 15 степени, а другите ќе бидат исправени. За нив изведувачот ќе донесе специјална машина, која треба да пристигне до крајот на април и тогаш ќе почнат да се дупчат и изведуваат бунарите - објасни ќе Владимир Тодоровиќ, градоначалникот на општина Центар. Како образложение за бавната изградба на мостот, кој се уште нема ни темели, општината прво кажуваше дека се отстрануваат подземните инсталации, па застојот бил поради нив, а потоа дека нивото на Вардар е многу високо за да може да се гради во речното корито. Паралелно со тоа, општината ќе ги избира и ликовите на 28 скулптури, кои треба да го украсуваат овој мост. Според градоначалникот, на конкурсот се пријавиле 27 автори со 70 решенија, но не открива кои ќе бидат ликовите што ќе се претстават. Единствено се знае дека се историски личности, од периодите од кои ќе бидат поставени предмети во новиот археолошки музеј. - Ќе направиме изложба на овие трудови, за да можат и самите автори да ги споредат своите дела. Но, прво во план ни е да ги изложиме идејните решенија за споменикот на свети Климент Охридски, кој ќе биде поставен пред универзитетската библиотека. Во жирито што ги избираше решенијата се Паско Кузман, Коста Мангаровски и Томе Серафимовски - рече Тодоровиќ. Општината нема да се откаже ниту од изградбата на фонтаните во Вардар, па овој проект, кој се најавува веќе неколку години, а никако да се реализира, ќе почнел од јуни, кога водостојот на реката е низок. Бидејќи во последно време Општина Центар е присутна во јавноста најмногу со проектите од „Скопје 2014“, а речиси ја нема во решавањето на секојдневните комунални, сообраќајни и други локални проблеми на жителите, оттаму велат дека паралелно ги продолжуваат и другите активности. - На тендерот за монтажниот паркинг што треба да се гради во населбата Капиштец се пријавија три фирми. Една од нив даде најевтина понуда, но, сепак, тоа е повеќе од моите очекувања и сознанија за ваков тип градба. Понудата е за десет милиони денари повисока од сумата што сме подготвени да ја платиме. Затоа го продолживме рокот на тендерот - вели градоначалникот. Покрај ова, тој најавува дека во наредниот период ќе ги санира оштетените општински улици, за кои признава дека се полни со дупки.

Р. П.