Карпош - Скопје

Не само што може, туку мора да се примени поинаков модел на финансирање на општините, затоа што сегашниов модел едноставно е неодржлив. Итна реформа на ова поле е повеќе од потребна.

Сегашниов модел кој доминантно е базиран на приходи од комуналии веќе направи огромна и долгорочна штета врз урбанистичкото планирање,  врз квалитетот на животот во урбаните средини, а создаде и огромна корупција и криминал.

Општините мораат да имаат редовни и предвидливи приходи за да можат нормално да си ја остваруваат функцијата, а и да можат да планираат и среднорочно и долгорочно, а не да имаат варијабилни и непредвидливи приходи базирани на коруптивни шеми и трка за вцртување на што повеќе и што погабаритни градежни маркички на секој ќош.

На кои даноци и приливи треба да се базира новиот модел, а и како да се ребалансираат приливите со централната власт за да не дојде до зголемување на вкупното даночно оптоварување, не се чувствувам доволно упатен за да изнесам предлози, но секако дека има разни опции кои би функционирале многу подобро од постојнава катастрофа. Во секој случај многу е важно новиот модел да стимулира и проактивност на општините во сузбивање на локалната даночна евазија (нормално треба да им се дадат и механизми за тоа), затоа што факт е дека на пример собирањето на ДДВ е многу нерамномерно во разни општини. Ако некои општини сепак потфрлаат во сузбивањето на евазијата, последици ќе трпат така што ќе им се слеваат помали приходи во општинскиот буџет.