ветија...

пишува Маја Илиевска Пачемска

Каз­ни за фрлање медицински отпад во контејнер

„Комунална“ ќе се обиде да чисти и во селата

Пилот-проектот ќе се реализира во Трубарево, вели градоначалникот на Гази Баба, Тони Трајковски

Градот и општините ја разгледуваат можноста да спроведат пилот-проект, со кој екипи на Јавното претпријатие „Комунална хигиена“ би го собирале комуналниот смет во руралните средини во Скопско. Градоначалникот на Гази Баба, Тони Трајковски, вели дека за реализација на пилот-проектот ќе биде земено селото Трубарево.

- Тоа ќе биде првото рурално место надвор од опфатот на Генералниот урбанистички план на Скопје, каде што „Комунална хигиена“ ќе го собира сметот. Оваа можност беше разгледувана на седниците на Координативното тело на градоначалници - вели Трајковски.

Проблемот со собирањето на комуналниот смет во селата е особено изразен, оти таму никој организирано не го носи ѓубрето до домаќинствата. Жителите се оставени сами на себе и се снаоѓаат како умеат. Дел од нив своето ѓубре го фрла во најблиските контејнери во урбаните средини, поради што садовите за отпад во населбите што се граничат со селата се постојано преполнети. Поголем е проблемот што го создаваат несовесните граѓани, кои ги има во огромен број и кои сметот го фрлаат на ливадите и покрај реките. Поради нивните навики сите речни корита во Скопје се претворени во депонии.

- Оваа иницијатива е покрената поради тоа што со донесувањето на новиот Генерален урбанистички план некои од руралните средини ќе влезат во опфатот на планот, но поради тоа што во селата проблемот со нехигиената е најизразен - вели Трајковски.Од Градот велат дека ова било предложено и на средбите меѓу скопскиот градоначалник Коце Трајановски и претставниците на урбаните и месните заедници во општините.

- Прво треба да се видат техничките можности за да почне реализацијата на ваков пилот-проект. Исто така треба да се видат и начините на кои ќе се спроведе. Градот се согласи да ја разгледа иницијативата, иако тоа не е во негова надлежност. Градското јавно комунално претпријатие е надлежно само за собирање смет во подрачјата што се во генералниот план - вели Неделчо Крстевски, портпарол во Градот.Тој додаде дека прво треба да се изработи сеопфатна студија за издржливоста и економската оправданост на проектот, па потоа ќе се утврди и можноста за неговата реализација.И во „Комунална хигиена“ велат дека се запознаени со иницијативата да собираат ѓубре и во селата.

- Треба да се разгледаат сите опции пред да почнеме нешто такво. Исто така „Комунална хигиена“ треба да се доопреми со новите шест возила за собирање на смет и да се состави нов ценовник - вели Катерина Лаова, портпарол во „Комунална хигиена“.

Казни од 2.000 евра за градилиштата што валкаат

Граѓаните се незадоволни од работата на градежните инспектори и негодуваат поради тоа што се принудени да газат во кал и да ја дишат правта од градилиштата

Камионите што излегуваат од градилиштата ги покриваат улиците и булеварите со слоеви земја и кал. Во недостиг од строга инспекциска контрола, возилата слободно си излегуваат валкани од градилиштата и собраните слоеви кал и песок ги растураат по коловозите. Така прекршуваат повеќе закони, меѓу кои и законите за безбедност на патиштата и за јавна чистота.

Проблемот е присутен низ целиот град, а најизразен е во реоните во кои градењето е интензивно, како во центарот, Ново Лисиче, Кисела Вода итн. Дел од градоначалниците ветија дека ќе ја спречат таа појава со казни на инвеститорите.

Од Општина Центар велат дека нивните инспектори веќе почнале да казнуваат. Според Законот за јавната чистота, инвеститорите на градежните објекти ќе платат казна од 2.000 евра, а градежните инспектори ќе им забранат да градат ако нивните товарни возила ги извалкаат околината и сообраќајниците по кои се движат.

- Согласно со Законот, комуналните инспектори на Општината заедно со инспекторите на Градот го казнија со глоба од 2.000 евра инвеститорот на објектот „Дилајла“ на улицата Васил Ѓоргов. Таму при ископ на градежна јама за објектот беше извалкана улицата се' до бројот 18. Работата веднаш беше стопирана. За да продолжи градењето, инвеститорите ќе треба да направат шахта на излез од градилиштето, за да ги мијат со црево тркалата на камионите пред да ги изнесат на улица. По соодветна опомена на градилиштето на „Веро“ спроти банките, исто така направија шахти за миење на камионите - велат во Одделението за односи со јавноста во Општина Центар.Градоначалникот на Центар, Владимир Тодоровиќ, пред еден месец вети дека ќе ги преземе сите законски мерки за да го исчисти градот од валканици.

- Центарот е лице на државата и мора да биде чист. Ќе ги средам градилиштата. Сега се гради на многу места - зад „Рамстор“, кај банките, на плоштадот, кај црквата „Свети Димитрија“. Граѓаните не се должни да ја голтаат правта од градилиштата и да газат во нивната кал. Затоа писмено ги опоменавме сите инвеститори дека ќе им ги затвориме градилиштата ако не ја исчистат околината - рече неодамна Тодоровиќ.Сепак, граѓаните не се задоволни од „третманот“ на градилиштата. Реакции пристигнуваат од сите страни на Скопје.

- Облаци прав се креваат по булеварот Видое Смилевски-Бато во Ново Лисиче. Навистина е за пофалба тоа што се' брзо се гради и што се проширува булеварот, но мора да се внимава и на здравјето на луѓето. Вистина не сум должен да ја дишам правта. Кога и да одам во некој европски град, секогаш гледам дека нешто се гради или се реконструира, ама никаде нема земја по улиците или прав по воздухот. Кај нас, како никому да не му е гајле за тоа што градилиштата ги валкаат улиците - вели Драган Павловски од Ново Лисиче. И градоначалникот на Аеродром, Ивица Коневски, се согласува дека граѓаните имаат право да реагираат за сите недоследности што ќе ги забележат.

- Комуналните инспектори беа на терен и преземени се сите мерки. Веќе на булеварот Видое Смилевски-Бато нема ниту кал ниту прав. Инвеститорот што гради во Реонски центар нема алтернативна сообраќајница за приод до градилиштето, но затоа на крајот од работното време таму минува цистерна со вода и ги мие околните сообраќајници. Се трудиме да ги запазиме сите мерки за заштита на граѓаните - вели Коневски.